BRN

1   Svanga hesvi vanyingi vadzringisiki kutlhanganisa wudzrunguli bza timhaka letiyencekiki amakazri kwezru,

2   hi la hitlhasiseliwiki timhaka leti ha kone hi lava kusukela amasungulwini vaviki timboni ni vazrumiwa va zritu,

3   na mine, antsrhaku ka kulandzrelelisisa timhaka leti hinkwatu hi wunyaminyami kusukela amasungulwini, nivone sviyampsa kukutsralela tone hi kulongoloka ka tone, wene Tewoflu, lwachavekaka ngopfu,

4   akuva ukota kutivisisa kudumbeka ka minchumu leyi udondzrisiwiki yone.

5   Amasikwini ya Heroda, hosi ya Judeya, aku ni muprista lwavitaniwaka Zakariya, wa ntlawa wa Abiya. Nsati wake aali mun’we wa vana va Aroni, nakone vito dzrake aali Elizabeti.

6   Hi wubidzri bzavu avalulamile amahlweni ka Xikwembu, nakone avafamba hi kulandzra minawu hinkwayu ni svileleto sva Jehovha na vange na xisolo.

7   Kambe avange na n’wana, hikusa Elizabeti aange na yone nyiko ya kupsala, nakone hi wubidzri bzavu avakule ngopfu hi ntanga.

8   Kutani siku dzrin’wana aali ntizrweni wake wa wuprista amahlweni ka Xikwembu, loko kutlhase nkama wa ntlawa wake.

9   Hi kulandzra mukhuva wa vaprista, vahamba mpshampsha, yiwela yene akuva anhingena ahisa muzri wa kunun’hwela atempeleni dzra Jehovha.

10   Kutani xitsrhungu hinkwaxu axili handle xikhongota hi nkama wa kuhisa muzri wa kunun’hwela.

11   Kutani kuhumelela ntsrumi ya Jehovha amahlweni kwake, yiyima atlhelweni dzra xinene dzra alitari dzra muzri wa kunun’hwela.

12   Kambe loko Zakariya ayivona, achuka, atala hi kuchava.

13   Kambe ntsrumi yiku ka yene: “Ungachavi, Zakariya, hikuva xikombelo xaku xiyingeliwile, kutani nkataku Elizabeti atakupsalela n’wana wa jaha; utamuchula vito dzra Johani.

14   Utanyonxa utlhela uhlekelela ha yene, nakone vanyingi vatanyonxa hi kupsaliwa kwake,

15   hikusa atava nkulu amahlweni ka Jehovha. Kambe angafanelanga kunwa vhinyo kumbe bzala bzini na bzini, nakone atatala hi moya wa kuxwenga kusukela akhuzrini dzra mamana wake.

16   Nakone atayenca lesvaku vanyingi va vana va Yisrayele vatlhelela ka Jehovha, Xikwembu xavu.

17   Nakone atafamba amahlweni kwake hi moya ni ntamu wa Eliya, akuva ayenca lesvaku timbilu ta vatatana titlhelela ka vana ni lesvaku lava kukala vangayiseti vavona wutlhazri bza kuhanya hi kululama, akuva abekisela Jehovha vhanu lavatsrhamisekiki.”

18   Zakariya aku ka ntsrumi: “Nitasvitivisa kuyini lesvaku i ntiyiso? Hikusa niduhwalile; nkatanga na yene akule ngopfu hi ntanga.”

19   Kutani ntsrumi yimuyangula, yiku: “Hi mine Gabriyele, lweyi ayimaka amahlweni ka Xikwembu, nakone nizrumiwe kutatakhanela na wene, nikubzela madzrungula lawa lamanene.

20   Kambe, lavisa, utapfaleka zritu uva uhluleka kukhanela kuyatlhasa asikwini ledzri minchumu leyi yitakahetiseka ha dzrone, hikuva awukholwanga mazritu yanga, lawa matakahetiseka hi nkama wa kone.”

21   Na vhanu vahayimela Zakariya, avahlamala lesvaku hayini ahlwela kuhuma atempeleni.

22   Kambe loko ahuma, angahasvikotanga kukhanela navu, kutani vasvitwisisa lesvaku ahumeleliwe hi mhunu wa moya atempeleni. Aavulavula na vone hi mavoko kambe zritu adzringahumi.

23   Kutani atlhanganisa masiku yake ya kutizra, agama amuka akaya kwake.

24   Kutani antsrhaku ka masiku lawo, Elizabeti, nkatake, akuma nyimba, kambe aheta ntlhanu wa tihweti na atifihla, aku:

25   “Hi svosvo Jehovha anganiyencela svone masiku lawa: Anilavisile akuva anisusa tingana avhanwini.”

26   Kutani hi hweti ya wu-6, ntsrumi Gabriyele azrumiwa hi Xikwembu kuya ka dzrin’we dzra madoropa ya Galileya ledzri valiki i Nazareta,

27   ka mun’we wa n’hwanyana lweyi aakombeliwe muchatu hi wanuna wa kukazri lweyi valiki i Josefa, wa muti wa Davhida. Vito dzra lweyo wa n’hwanyana aali Mariya.

28   Kutani ntsrumi yitlhasa ka yene, yiku: “Xawani, wene wa kunyonxeliwa svinene! Jehovha a na wene.”

29   Kambe loko ayingela mazritu lawo, Mariya achuka, ativutisa he ndzreni ka mbilu lesvaku malosela lawo mangava na majula kuhlaya lesvaku yini.

30   Kutani ntsrumi yiku ka yene: “Ungachavi, Mariya, hikusa unyonxeliwe hi Xikwembu.

31   Kutani, lavisa, utava ni nyimba nakone utapsala n’wana wa jaha; utamuchula vito dzra Yesu.

32   Atava nkulu nakone atavitaniwa N’wana wa Lwanga Henhlahenhla; kutani Jehovha Xikwembu atamunyika xitsrhamu xa wuhosi xa Davhida, tatana wake.

33   Atafuma muti wa Jakobe hi la kungahelikiki, nakone Mfumu wake wungetiva na wugamu.”

34   Kambe Mariya aku ka ntsrumi: “Svitayencekisa kuyini, hikusa anifambelani ni wanuna?”

35   Kutani ntsrumi yimuyangula, yiku: “Moya wa kuxwenga wutava henhla kwaku, kutani utafuneketiwa hi ntamu wa Lwanga Henhlahenhla. Xisvosvo, ni yelweyi atakapsaliwa atavitaniwa wa kuxwenga, N’wana wa Xikwembu.

36   Nakone lavisa, Elizabeti, xaka dzraku, na yene atamele n’wana wa jaha awuduhwatini bzake. Kutani leyi i hweti yake ya wu-6, yelweyi valiki angapsali.

37   Hikusa aku na nchumu wa kukala wungakoteki ka Xikwembu.”

38   Kutani Mariya aku: “Lavisa, ni nandzra wa Jehovha! Ingiki svinganiyencekela hi la usvihlayiki ha kone.” Kutani ntsrumi yisuka yimusiya.

39   Kutani amasikwini lawo, Mariya asuka akhoma ndlela hi kukahlula, aya atikweni dzra tinhava, adoropeni dzra Juda,

40   atlhasa anhingena akaya ka Zakariya, alosela Elizabeti.

41   Kutani, kuyenceka lesvaku loko Elizabeti ayingela kulosela ka Mariya, xibebetana andzreni kwake xitlula; Elizabeti atala hi moya wa kuxwenga,

42   atlakuxa zritu, aku: “Ukatekile amakazri ka vavasati, nakone kukatekile n’wana lweyi anga ndzreni kwaku!

43   Nakone yipfela kwini njombo leyi ninga nayu, ya kupfuxeliwa hi mamana wa Hosi yanga?

44   Hikusa, lavisa, ankama lowu tindleve tanga tingayingela zritu dzraku loko ulosela, xibebetana andzreni kwanga xitlulatlulile hi kunyonxa!

45   Nakone nyonxani ka lweyi akholwiki, hikusa lesvi angabzeliwa svone ha Jehovha svitahetiseka!”

46   Kutani Mariya aku: “Hika dzranga dzridzrumisa Jehovha,

47   ni moya wanga wunyonxa hi Xikwembu, xinga Muhuluxi wanga;

48   hikuva xilavise kudzreleka ka nandzra wa xone. Hikusa lavisa, kusukela ka svosvi vhanu va tinguva hinkwatu vatanihlaya mhunu wa njombo,

49   hikuva Lwe wa Ntamu aniyencele minchumu ya yikulu, nakone vito dzrake dzrixwengile,

50   funtsrhi timpsalu take ka lavamuchavaka i ta hi masiku ni masiku.

51   Atizrise ntamu hi voko dzrake, ahangalasa lavatikulisaka atimbilwini tavu.

52   Axixe lava ntamu asvitsrhan’wini svavu sva wuhosi, akhwelisa lava kudzreleka.

53   Axuzrise lavanga ni ndlala hi minchumu leyinene, ahlongola lavanga svigogo na vange na nchumu.

54   Apfune Yisrayele, nandzra wake, adzrimuka timpsalu take,

55   svanga hesvi akhanelisiki xisvone ni vatatana vezru, Abrahamu ni vanake, hi la kungahelikiki.”

56   Kutani Mariya atsrhama na Elizabeti kusuhi ni tihweti tizrazru, agama amuka akaya kwake.

57   Kutani kutlhasa nkama wa kuva Elizabeti aphuluka; apsala n’wana wa jaha.

58   Kutani vayakelani ni maxaka yake vayingela lesvaku Jehovha amuyencele timpsalu letikulu, vanyonxa naye.

59   Kutani hi siku dzra wu-8, vabuya vasokisa xin’wanana, vasungula kuxichula vito dzra tatana wa xone, Zakariya.

60   Kambe mamana wa xone avayangula, aku: “Ihina! N’wana lweyi atavitaniwa Johani.”

61   Kutani vaku ka yene: “Aku na ni mun’we wa maxaka yaku lwavitaniwaka hi vito ledzro.”

62   Kutani vavutisa tatana wa kone hi mavoko lesvaku anavela akuva n’wana avitaniwa mani.

63   Kutani akombela xa kutsralela ka xone, atsrala lesvi: “Vito dzrake i Johani.” Hinkwavu vahlamala ha svone.

64   Kutani kola ni kola nomu wake wupfuleka ni lidzrimi dzrake dzritlhantlheka, asungula kukhanela, adzrumisa Xikwembu.

65   Kutani hinkwavu vayakelani vavu vatala hi kuchava nakone timhaka leti hinkwatu tihangalaka atikweni hinkwadzru dzra tinhava dzra Judeya.

66   Kutani hinkwavu lava vasviyingelaka avasvibekisa ambilwini, na vaku: “Xana xin’wanana lexi xitava xa muxaka muni?” Hikusa kunene voko dzra Jehovha adzrili na xone.

67   Kutani Zakariya, tatana wa n’wana, atala hi moya wa kuxwenga, asungula kuprofeta, aku:

68   “Akudzrumisiwe Jehovha, Xikwembu xa Yisrayele, hikuva alavise vhanu vake, avantsrhunxa.

69   Funtsrhi ahitlakuxele limhondzro dzra kuhuluxa amutini wa Davhida, nandzra wake,

70   hi la adumbisiki ha kone, hi nomu wa vaprofeta vake lava kuxwenga aminkameni ya khale,

71   lesvaku atahihuluxa ka valala vezru ni le vokweni dzra hinkwavu lavahivengaka;

72   akuva ayencela vatatana vezru timpsalu ni kudzrimuka xipfumelelanu xake lexa kuxwenga,

73   minchumu leyi angayifungela Abrahamu, tatana wezru,

74   lesvaku, antsrhaku ka loko hihuluxiwile amavokweni ya valala vezru, atahipfumelela kumutizrela na hingachavi nchumu,

75   hi kuxwenga ni kululama amahlweni kwake awuton’wini bzezru hinkwabzu.

76   Kambe wene, n’wananga, utavitaniwa muprofeta wa Lwanga Henhlahenhla, hikusa utapfa uzranga amahlweni ka Jehovha akuva ululamisela tindlela take,

77   akuva unyika vhanu vake wutivi lebzihuluxaka, hi kudzrivaleliwa ka svidoho svavu,

78   hi kola ka ntwelawusiwana lowukulu wa Xikwembu xezru, lowu ha wone kuxa ka dambu kutakahiyendzrela na kupfa hi le henhla,

79   kuvaningela lavatsrhamiki amunyameni ni le ntsrhutini wa lifu, ni kufambisa minkondzro yezru andleleni ya kuzrula.”

80   Kutani n’wana akula atlhela atiya amoyeni. Nakone aatsrhama amananga kuyatlhasa asikwini ledzri angatikombekisa ha dzrone amahlweni ka Yisrayele.