BRN

1   Kutani antsrhaku ka lesvo, Hosi yihlawula van’wana va 70, yivazruma hi vabidzribidzri amahlweni ka yone amadoropeni hinkwawu lawa yone hi ntshima ayitagama yiya ka wone.

2   Yigama yiku ka vone: “Kunene, ntsrhovelo i wukulu, kambe vatizri i vatsrongo. Xisvosvo, kombelani N’winyi wa ntsrhovelo azrumela vatizri antsrhovelweni.

3   Fambani! Lavisani, nimizruma kufana ni tihamba amakazri ka timhisi.

4   Mingateki xipachi xa mali kumbe nkwama wa manghunghu kumbe masandhazi, funtsrhi mingalosi mhunu andleleni.

5   Kwini na kwini lomu mitakanhingena amutini wa kukazri, zrangani hi kuhlaya lesvi: ‘Hinavelela muti lowu kuzrula!’

6   Kutani loko ku ni n’wana wa kuzrula, kuzrula kwenu kutatsrhama na yene. Kambe loko angali kone, kutatlhelela kwenu.

7   Kutani tsrhamani amutini wolowo, mida lesvi vamiphamelaka svone, hikusa mutizri afaneliwa hi muholo wake. Mingasukasuki ka muti lowu miya ka wun’wana.

8   “Nakone, adoropeni dzrini na dzrini ledzri mitakanhingena ka dzrone vamiyamukela, danani lesvi vamiphamelaka svone,

9   midaha timbabzi ta dzrone, mitlhela mivabzela lesvi: ‘Mfumu wa Xikwembu wutsrhindzrekele kusuhi na n’wine.’

10   Kambe adoropeni dzrini na dzrini ledzri mitakanhingena ka dzrone, loko vangamiyamukeli, humani miyayima svitaratwini sva dzrone, miku:

11   ‘Nhambi ntsrhuzri wa doropa dzrenu lowunamazreliki minkondzrweni yezru, hawuphumuna. Nhambitanu, tsrhamani na misvitiva lesvaku Mfumu wa Xikwembu wutsrhindzrekelile.’

12   Nimibzela lesvaku lesviyencekeliki Sodoma svitayampsa kutlula doropa ledzro asikwini ledzro.

13   “Yowee, Korazini! Yowee, Betsayda! Hikuva loko masingita lamayenciwiki kwaku ameyenciwa Tire na Sidoni, inhaka vatisole khale svinene na vayambale masaka, vatsrhama ni le nkumeni.

14   Nhambitanu, asikwini dzra yavanyiso svitayampsela Tire na Sidoni kutlula wene.

15   Na wene Kapernawume, ungaka ungatlakuxeliwi atilweni; utafulametiwa Sizreni!

16   “Lweyi amiyingisetaka ayingiseta na mine. Ni lweyi amidzrelaka na mine awanidzrela. Kambe lweyi adzrelaka mine adzrela ni yelweyi anizrumiki.”

17   Kutani lava 70 vabuya na vatale hi kunyonxa, vaku: “Hosi, nhambi mademona himahlulile hi kutizrisa vito dzraku.”

18   Kutani aku ka vone: “Nivona Sathana na awile hi le tilweni kufana ni lihati.

19   Lavisani, niminyike ntamu wa kupsanya tinyoka ni svizavanana, ni wa kuhlula ntamu hinkwawu wa nala, kutani aku na nchumu lowutakamivavisa.

20   Nhambitanu, minganyonxi hilesvi mihlulaka mademona, kambe nyonxani hilesvi mavito yenu matsraliwiki amatilweni.”

21   Hi nkama wolowo atala hi kunyonxa ka moya wa kuxwenga, aku: “Nakukhensa, Tatana, Hosi ya tilo ni misava, hikuva ufihlele tintlhazri ni tintivi minchumu leyi, uyipfuletela svivanana. Ina, we Tatana, hikuva lesvi hi lesvi svikunyonxisiki.

22   Kutani hinkwasvu svinyiketiwe mine hi Tatana, nakone aku na mhunu lwativaka N’wana handle ka Tatana, nakone aku na mhunu lwativaka Tatana handle ka N’wana na mani na mani lweyi N’wana anyonxelaka kumukomba Tatana wake.”

23   Agama andzruluka alavisa vadondzrisiwa akhanela na vone hi tlhelo, aku: “Ma ni njombo matihlo lamavonaka lesvi misvivonaka.

24   Hikusa nimibzela lesvaku vaprofeta vanyingi ni tihosi vanavele kuvona lesvi misvivonaka kambe avasvivonanga, ni kuyingela lesvi misviyingelaka kambe avasviyingelanga.”

25   Kutani kuhumelela ntivi yin’we ya nawu yitlhasa yiyima, yimudzringa, yiku: “Mudondzrisi, xana nifanela kuyenca yini akuva nikuma wutomi lebzingahelikiki?”

26   Ayihlamula aku: “Kutsraliwe yini Nawini? Udondzra lesvaku yini?”

27   Yihlamula yiku: “‘Zrandzra Jehovha, Xikwembu xaku, hi mbilu yaku hinkwayu ni hi hika dzraku hinkwadzru ni hi ntamu waku hinkwawu ni hi miyanakanyu yaku hinkwayu’, nakone ‘zrandzra muyakelani waku svanga hi lesvi utizrandzrisaka xisvone.’”

28   Kutani aku ka yene: “Uhlamule svone; yenca svosvo utakuma wutomi.”

29   Kambe hi kujula kutiyenca n’wamunene, ntivi ya nawu yiku ka Yesu: “Muyakelani wanga hi ntshimantshima i mani?”

30   Kutani Yesu ahlamula, aku: “Mhunu wa kukazri aafulamela hi le Jerusalema aya Jeriko. Kutani adumeliwa hi svigevenga, svimuhlivila mpahla, svimubukutela, svigama svifamba, svimusiya na ali kusuhi ni kufa.

31   Kutani, njombo ya kone, muprista wa kukazri ofulamela hi xitaratu lexo, kambe loko amuvona, agega, afamba hi tlhelo ledzrin’wana.

32   Hi ndlela leyifanaka, mun’we wa mulevhi loko akhalute hi kone amuvona, agega, afamba hi tlhelo dzrin’wana.

33   Kambe mun’we wa musamariya lweyi aatiyela lomu aatiyela kone, ahuma hi yene; loko amuvona, amutwela wusiwana.

34   Kutani amutsrhindzrekelela amubandicha svilondzra, asvichela mafuzra ni vhinyo. Agama amukhwelisa ka mbongolo yake amuheketa ka muti wa kuyamukela vayeni, amuhlayisa.

35   Kutani mundzruku ka kone ahumexa madenari mabidzri ahakela n’winyi wa muti wa vayeni, aku: ‘Nihlayisele mhunu lweyi, kutani xini na xini lexi utakaxitizrisa xa kukhaluta mali leyi, nitatakuhakela loko nitlhela.’

36   Uvona lesvaku hi wini ka lavazrazru angava muyakelani wa mhunu lweyi adumeliwiki hi svigevenga?”

37   Kutani aku: “Hi lweyi amuyenceliki timpsalu.” Yesu kutani aku ka yene: “Famba uyayenca svosvo na wene.”

38   Kutani loko vali kazri vafamba, anhingena axidoropaneni xa kukazri. Kutani mun’we wansati lwavitaniwaka Marta amuhoyozela akaya kwake.

39   Marta aali ni makwavu lwavitaniwaka Mariya. Yelweyo atlhase atsrhama kusuhi ni minkondzro ya Hosi ayingiseta lesvi ayikhanela ha svone.

40   Kambe Martha aahingeletiwa hi mintizro ya kutala. Kutani abuyela Yesu, aku: “Hosi, xana awu na mhaka lesvi makwezru anisiyiki nitizra wusvanga? Mubzele abuya anipfunisa.”

41   Kutani Hosi yimuhlamula yiku: “Marta, Marta, ukazrateka utlhela utinyika ntizro hi minchumu ya kutala.

42   Kambe lesvijulekaka ahi svinyingi; nhambi xin’we xayanela. Hikusa Mariya atilangele nchumu lowunene, nakone anga kone lwatakamuwutlela wone.”