BRN

1   Ankameni lowo, loko kuhlengeletana vhanu va ntsrandzravahlayi, lava avapatsra ni kukandzretelana hi kutala, asungula kukhanela ni vadondzrisiwa vake kusungula, aku: “Tivonelani ka svikukumukisu sva vafarisi, bzinga wukanganyisi bzavu.

2   Kambe aku na nchumu lowufihliwiki lowungetikipaluxiwa alivaleni, nakone aku na nchumu wa xihundla lowungetikitiviwa.

3   Xisvosvo, xin’wana ni xin’wana lexi mixihlayaka amunyameni xitatwiwa alivaleni, ni lesvi mihlevetelanaka svone atindleveni atindlwini letipfalekiki svitahuweleliwa ahenhla ka tiyindlu.

4   Kutani nibzela n’wine minga vanghanu vanga, lesvaku mingachavi lavadlayaka mizri vagama vangahakoti kuyenca svin’wana sva kutlula svosvo.

5   Kambe nitamikomba lweyi mifanelaka kuchava yene: Chavani lwewa kuva, antsrhaku ka kudlaya mhunu, a ni ntamu wa kumucukumetela Xikheleni xa Kuhelisiwa. Ina, nimibzela lesvi: Chavani Yelweyo.

6   Xana ntlhanu wa svinjingiritana asvixavisiwi hi minkinyenta yibidzri? Kambe Xikwembu axidzrivali ni xin’we xa svone.

7   Kambe nhambi misisi ya tinhloko tenu yikontiwile hinkwayu. Mingachavi; mi ni lisima dzra kutlula svinjingiritana sva kutala.

8   “Nakone nili ka n’wine: Mani na mani lwapfumelaka lesvaku awanitiva amahlweni ka vhanu, N’wana wa Mhunu na yene atapfumela lesvaku awamutiva amahlweni ka tintsrumi ta Xikwembu.

9   Kambe mani na mani lwaniyalaka amahlweni ka vhanu atayaliwa amahlweni ka tintsrumi ta Xikwembu.

10   Nakone mani na mani lwahumexaka zritu dzra kusola N’wana wa Mhunu, atadzrivaleliwa, kambe lweyi azrukaka moya wa kuxwenga angetidzrivaleliwa.

11   Kutani loko vamiyisa amahlweni ka masinagoga, ni vafumi, ni wuhosi, mingavindlavindleki hi lesvi mitakavulavulisa xisvone kumbe lesvi mitakasvihlaya loko mitilwela,

12   hikusa moya wa kuxwenga wutamidondzrisa hi nkama wolowo lesvi mifanelaka kusvihlaya.”

13   Kutani mun’we aku amakazri ka xitsrhungu: “Mudondzrisi, bzela makwezru ayavelana na mine pfindla.”

14   Aku ka yene: “Nanduwe, i mani anganibeka muyavanyisi kumbe wa kutsrema timhaka tenu?”

15   Agama aku ka vone: “Basopani mitlhela mitivonela makwanga hinkwawu, hikuva nhambiloko mhunu a ni minchumu ya kutala, wutomi bzake abzibuyi hi ka minchumu leyi anga nayu.”

16   Agama avahambela xifananiso, aku: “Masimu ya wanuna wa kukazri lweyi aali xigogo mabindzrule svinene.

17   Kutani asungula kupimisa lesvi andzreni kwake: ‘Xana nitayenca yini lesvi ningeke na mbangu wa kubeketela lesvi nisvitsrhoveliki amasin’wini?’

18   Agama aku: ‘Nitayenca lesvi: Nitahohlota svintlhanta svanga niyaka lesva svikulu, nibeketela kone tirigu dzranga hinkwadzru ni minchumu yanga hinkwayu,

19   nigama niku ka hika dzranga: “We hika, u ni minchumu yinyingi leyinene leyibekiseliwiki malembe ya kutala. Wisa, uda, unwa, utikholisa.”’

20   Kambe Xikwembu xiku ka yene: ‘Ximphunta ndzriwene, wusiku bzolebzi vatajula hika dzraku. Kutani lesvi usvibeketeliki svitasala na mani?’

21   Svi tanu ka mhunu lweyi atihlengeletelaka wukosi kambe angeke na wunghanu bzikulu ni Xikwembu.”

22   Agama aku ka vadondzrisiwa vake: “Hi svosvo nimibzelaka ha svone, niku: Mingavindlavindleki hi wutomi bzenu lesvaku mitada yini, kumbe hi mizri wenu lesvaku mitayambala yini.

23   Hikusa wutomi bzi ni lisima kutlula svakuda ni mizri wu ni lisima kutlula sviyambalu.

24   Lavisisani magwavava: Amabzali funtsrhi amatsrhoveli; ama na matsrhala kumbe svintlhanta; kambe Xikwembu xamadisa. N’wine mi ni lisima ledzrikulu ngopfu kutlula tinyanyana.

25   I mani ka n’wine lweyi hi kutsrhama hi kupimisa hi svikazratu angayengetelaka masiku yake ya kuhanya hi wora dzrin’we?

26   Kutani ke, loko mingasvikoti kuyenca nchumu lowutsrongo, mivindlavindlekela yini hi minchumu leyin’wana?

27   Lavisisani lesvi magon’hwa makulisaka xisvone: Amatizri nakone amazrungi mpahla; kambe nimibzela lesvaku nhambi Salomoni akuphatimeni kwake hinkwaku angazanga ayambala kufana ni dzrin’we dzra wone.

28   Xilesvo, loko Xikwembu xiyambexisa xilesvi bzanyi anhoveni, lebzinga kone namunhla, mundzruku bzicukumetiwa andzrilweni bzipsha, ngopfungopfu xitayambexa n’wine, va lipfumelo dzritsrongo!

29   Kutani mingatsrhami hi kuvindlavindleka hi lesvi mitakada svone ni lesvi mitakanwa svone, funtsrhi mingatsrhami hi kukazrateka miyanakanyu;

30   hikusa lesvi hinkwasvu hi lesvi matiko matikazrataka ha svone, kambe Tatana wenu awasvitiva lesvaku masvivilela lesvo.

31   Kambe tikazratani hi Mfumu, kutani minchumu leyo mitayengeteleliwa yone.

32   “Ungachavi, we ntlhambinyana, hikusa svinyonxise Tatana wenu kuminyika Mfumu.

33   Xavisani minchumu yenu mihanana sva kupfuna svisiwana. Tihambelani svipachi sva mali lesvingagugikiki, ni wukosi lebzingahelikiki amatilweni, lomu kunganhingenikiki muyivi kone ni lomu minchumu yingadiwikiki hi tinsumba.

34   Hikusa lomu wukosi bzenu bzinga kone, hi lomu na tone timbilu tenu titakava kone.

35   “Tsrhamani na mitibekisele kutizra funtsrhi na mimotsre yenu na yitlhavikiwile,

36   mifana ni malandzra lamayimelaka n’winyi wa wone, lesvaku ankama wini na wini lowu atlhelaka ha wone hi le muchatwini, loko atlhasa aba xipfalu, matekela kumupfulela.

37   Nyonxani ka malandzra lawo, lawa loko n’winyi wa wone atlhasa, amakumaka na mavona! Nihlaya na nitiyisile niku ka n’wine: Atacinca mpahla amatsrhamisisa kudeni, abuya amabekela svakuda ni mati.

38   Kutani loko atlhasa makazri ka wusiku kumbe loko bziya kuxeni amakuma na malungile, nyonxani ka wone!

39   Kambe tivani lesvi, loko n’winyi wa yindlu aetiva lesvaku muyivi aatata hi nkama muni, inhaka angatsrhikanga yindlu yake yitlhanyiwa.

40   Na n’wine, tsrhamani na milungile, hikuva N’wana wa Mhunu atatlhasa hi nkama lowu mingawuyimelangakiki.”

41   Kutani Petrosi aku: “Hosi, xana xifananiso lexi uxibzela hine ntsena kumbe ni hinkwavu?”

42   Kutani Hosi yiku: “Svone, i mani mulaviseli lwewa kudumbeka ni wa kutlhazriha lweyi n’winyi wake atakamubeka akuva alavisela malandzra yake lesvaku amanyika mpimu wa wone wa svakuda hi nkama wa kone?

43   Nyonxani ka nandzra lweyo, lweyi loko n’winyi wake atlhasa, amukumaka na ayenca tanu!

44   Nihlaya na nitiyisile niku ka n’wine: Atamubeka akuva alavisela minchumu yake hinkwayu.

45   Kambe loko nandzra lweyo ochuka apimisa lesvi mbilwini yake: ‘N’winyi wanga awahlwela kubuya’, kutani asungula kuba malandzra ya xinuna ni ya xisati, ni kuda, anwa atlhela apopsa,

46   n’winyi wa nandzra lweyo atatlhasa hi siku ledzri angamuyimelangakiki ha dzrone ni nkama lowu akalaka angawutivi, amukwapa svinene ava amunyika lesvitakakumiwa hi lava kukala vangadumbeki.

47   Kutani nandzra lweyo lwativaka kuzrandzra ka n’winyi wake kambe angatibekiseli nambi kuyenca kuzrandzra ka n’winyi atapshitiwa hi minkhavi yinyingi.

48   Kambe lweyi ayenciki minchumu leyifanelaka hi minkhavi na angasvitivi atapshitiwa hi minkhavi yitsrongo. Hikusa lweyi anyikiwiki svinyingi atalondzriwa svinyingi, ni lweyi atamelisiwiki svinyingi atavutisiwa svinyingi kutlula van’wana.

49   “Nibuyele kutatantlhontlha ndzrilo la misaveni, nakone ninganavela yini handle ka kuwuvona na wupfuzra kutani?

50   Hikusa ni ni babatiso ledzri nifanelaka kubabatisiwa ha dzrone, nakone mbilu yanga yikameke njhani loko dzringesiyenceka!

51   Xana mipimisa lesvaku nitele kubuyisa kuzrula amisaveni? Nimibzela lesvaku anitelanga svone, kambe nitele kutavanga kuyavana.

52   Hikusa kusukela ka svosvi kutava ni ntlhanu amutini lowuyavaniki, vazrazru vatalwa ni vabidzri, vabidzri valwa ni lavazrazru.

53   Tatana ni n’wana vatahambana, tatana alwa ni n’wana, n’wana alwa ni tatana, mamana alwa ni n’wanake wa xisati, ni n’wana wa xisati alwa ni mamana wake, mamana wa jaha alwa ni n’wingi ni n’wingi alwa ni mamana wa jaha.”

54   Agama akhanela ni svitsrhungu, aku: “Loko mivona tlavi dzritlhantuka hi le mpeladambu, mitekela kuhlaya lesvi: ‘Xata xidzedze’, kutani sviyencekisa xisvosvo.

55   Ni loko mivona moya wuhunga hi le nyingitimu, mili: ‘Kutahisa’, svigama sviyenceka.

56   Vakanganyisi, mikota kukambisisa matsrhamela ya misava ni ya tilo, kambe sviyencekisa kuyini mingawutivi nkama lowu minga ka wone?

57   Nakone, hayini mingayavanyisi ha wusvenu lesvilulamiki?

58   Hikusa loko wene ni lweyi uholovisanaka naye miya wuhosini, na mahali ndleleni, dzringisa kuheta mholova na yene, hikusa angachuka akukokakoka akuyisa ka muyavanyisi, kutani muyavanyisi akunyiketa ka mukhatisi, mukhatisi akupfalela jele.

59   Nikubzela lesvi: Ungaka ungahumi kone na ungahakelanga nkinyenta wa wugamu.”