BRN

1   Ankameni lowo, van’we va lava avali kone vamudzrungulela ta vagalileya lava Pilatu angapatsrinyeta ngati yavu ni svitlhavelo svavu.

2   Kutani Yesu avayangula, aku ka vone: “Mipimisa lesvaku vagalileya lavaya avali vadohi vakulu kutlula hinkwavu vagalileya hilesvi vakumiwiki hi khombo ledzri kee?

3   Nimibzela lesvaku ahi svone lesvo; kambe loko mingatisoli, na n’wine mitahelisiwa kufana na vone.

4   Kumbe mimipisa lesvaku lavaya va 18 lavangaweliwa hi xihondzro xa Silowame, xivadlaya avova ni nandzru wa kutlula vhanu hinkwavu lavahanyaka le Jerusalema?

5   Nili ahi svone lesvo; kambe loko mingatisoli, hinkwenu mitahelisiwa kufana na vone.”

6   Agama avabzela xifananiso lexi: “Kave ni mhunu lweyi aa ni nkuwa lowubzaliwiki ansin’wini yake ya mavhinya. Kutani abuye atatajula mihandzru ka wone kambe angakumanga nchumu.

7   Kutani abzela mudzrimi wa mavhinya, aku: ‘Lavisa, ledzri kutani i lembe dzra wuzrazru na nibuya nikamba mihandzru ka nkuwa lowu, kambe aningikuma nchumu. Wutsreme! Woheta mbangu wanga mahala!

8   Kutani amuhlamula, aku: ‘Hosi, wutsrhike lembe dzrin’we kukondzra nidzrima matlhelweni ka wone nibeka ni svinonisi.

9   Loko wupsala mihandzru, svilungile; kambe loko svinge tanu, wutsreme.’”

10   Kutani aadondzrisa ka dzrin’we dzra masinagoga hi Savata.

11   Kutani, kuhumelela mun’we wansati lweyi aa ni moya wa kumuvabzisa kudzringana 18 wa malembe; kutani aakhotsrhekile nakone aangasvikoti kuwololoka ni kutsrongo.

12   Loko amuvona, Yesu amuvitana atsrhindzrekela, aku: “Wansati, untsrhunxiwile ka mavabzi yaku.”

13   Kutani amutlhanteka mavoko, atekela kuwololoka, asungula kudzrumisa Xikwembu.

14   Kambe muzrangeli wa sinagoga ayangula, na ahlundzrukile hilesvi Yesu ahanyisiki mhunu hi Savata, aku ka xitsrhungu: “Ku ni 6 wa masiku lawa svifanelaka kutizra ha wone. Kutani buyani midahiwa hi masiku lawo, kunge hi siku dzra Savata.”

15   Kambe Hosi yimuhlamula, yiku: “Vakanganyisi, xana mun’wana ni mun’wana wenu hi Savata angatlhantlhi homu yake kumbe mbongolo yake axib’ayeni ayiheleketa yiyanwa mati?

16   Xana lwe wansati, lwanga n’wana wa Abrahamu ni lweyi Sathana ahetiki 18 wa malembe na amupfalelile, angafaneliwanga kuntsrhunxiwa ka wub’ochwa hi siku dzra Savata?”

17   Kuteloko ahlaye lesvo, valala vake hinkwavu vadana, kambe xitsrhungu hinkwaxu axinyonxa hi minchumu hinkwayu ya kuxonga leyi aayiyenca.

18   Kutani ayengeta, aku: “Xana Mfumu wa Xikwembu wufana na yini? Ningawufanisa na yini?

19   Wufana ni nhleke ya sinapi leyi mhunu ayitekiki ayayibzala ansin’wini yake, yikula yihamba nsinya, kutani tinyanyana ta tilo titatayaka svisaka amazravini ya wone.”

20   Atlhela aku: “Xana ningawufanisa na yini Mfumu wa Xikwembu?

21   Wufana ni svikukumukisu lesvi wansati asvitekiki asvipfuva ni tirigu dzra kutata muqgomo, mbila hinkwayu yikukumuka.”

22   Kutani aafambafamba hi madoropa ni svidoropana adondzrisa, na ali ndleleni ya kuya Jerusalema.

23   Kutani mun’we aku ka yene: “Hosi, hi svone lesvaku lavatakahuluka i vatsrongo?” Aku ka vone:

24   “Lwanani hi ntamu akuva minhingena hi nyangwa leya kukhuma, hikuva nimibzela lesvaku vanyingi vatajula kunhingena kambe vatahluleka.

25   Loko n’winyi wa muti apfuka akhiyela xipfalu, mitasala handle migongondzra xipfalu, miku, ‘Hosi, hipfulele.’ Kambe atamihlamula, aku: ‘Animitivi n’wine, mfuzri ni lomu mitaka ha kone anikutivi.’

26   Kutani mitaku: ‘Hide na wene hiva hinwa na wene, nakone ubuye udondzrisa asvitaratwini svezru.’

27   Kambe ataku ka n’wine: ‘Nili anikutivi lomu mitaka ha kone. Sukani la kwanga, hinkwenu n’wine vayenci va lesva kubiha!’

28   Hi kone kutakava ni svidzrilo ni kuketsrela ka matinyo yenu, loko mivona Abrahamu, Izaki, Jakobe ni vaprofeta hinkwavu amfun’wini wa Xikwembu, na n’wine micukumeteliwa handle.

29   Mfuzri vatabuya hi le wuxeni ni le mpeladambu, ni le n’walungu ni le nyingitimu vakugee, vada, amfun’wini wa Xikwembu.

30   Kambe phelasi ku ni lava wugamu vatakava va kusungula, ni lava kusungula vatakava va wugamu.”

31   Kutani hi nkama lowo van’we va vafarisi vamubuyela, vaku: “Huma la ufamba, hikuva Heroda ajula kukudlaya.”

32   Kutani aku ka vone: “Fambani miyabzela buwana ledzriyani, miku: ‘Lavisa, nahahlongola mademona nidaha vhanu namunhla ni mundzruku, kutani nitava nihetile mundlwana.’

33   Kambe kujuleka nifamba namunhla, mundzruku ni mundlwana, hikuva asvikoteki kuva muprofeta adlayiwa ahandle ka Jerusalema.

34   Jerusalema, Jerusalema, wene lweyi udlayaka vaprofeta, utlhela ukhandla lavazrumeliwaka kwaku hi mazribze: I kangani ningajula kuhlengeleta vanaku mbangu mun’we kufana ni huku leyihlengeletaka svicuwana sva yone ahansi ka timpapa ta yone! Kambe wene awusvijulanga.

35   Svosvi ke, yindlu yenu yitasala na yinge na mhunu. Nimibzela lesvaku mingehetitlhela minivona kukondzra miku: ‘Akukhensiwe lweyi ataka hi vito dzra Jehovha!’”