BRN

1   Atiki anhingena akaya ka mun’we wa vazrangeli va vafarisi hi Savata, vamulangutisisa.

2   Kutani kuhumelela mhunu lweyi aapfimbe mizri hi mati amahlweni kwake.

3   Kutani Yesu avutisa tintivi ta Nawu ni vafarisi, aku: “Xana nawu wasvipfumelela kudaha hi Savata kumbe ihina?”

4   Kambe vamiyela vakutititi. Kutani amukhoma, amudaha, agama amutsrhika atifambela.

5   Agama aku ka vone: “I mani ka n’wine lweyi loko n’wanake kumbe homu yake yopela anhlobzeni, angetikikahlula ayitsravula hi siku dzra Savata?”

6   Kutani vahluleka kumuhlamula.

7   Agama abzela vazrambiwa xifananiso loko avavona na valanga mimbangu ya le phambeni, aku ka vone:

8   “Loko vakuzramba amuchatwini, ungatsrhami ambangwini wa le phambeni, hikusa kungachuka kuzrambiwe ni mhunu mun’wana lwabekeliwaka xichavu ngopfu kutlula wene.

9   Kutani lweyi azrambiki wene na yene atata kwaku, aku: ‘Tsrhika tatana lweyi atsrhama ka xitsrhamu lexi.’ Kutani utasuka hi tingana uyatsrhama ambangwini wa wugamu.

10   Kambe loko vakuzramba, famba uyatsrhama ambangwini wa wugamu, akuva loko lweyi angakuzramba akutela, ataku: ‘Nakulozri, buya utsrhama hi halenu phambeni.’ Kutani utabekeliwa xichavu amahlweni ka hinkwavu lava utsrhamiki navu.

11   Hikusa mani na mani lwatitlakuxaka atatsrongahatiwa, kasi lweyi atitsrongahataka atatlakuxiwa.”

12   Agama abzela ni lweyi amuzrambiki, aku: “Loko uhamba xifihlulo kumbe xilalelo, ungavitani vanghanu vaku kumbe vamakwenu kumbe maxaka kumbe vayakelani va lavanga svigogo. Hikusa na vone vangachuka vakuzramba vakutlhelisela, svihamba hakelo ka wene.

13   Kambe loko uhamba nkhuvu, zramba svisiwana, lavanga ni wulima, lavakhutaka, lavangavonikiki;

14   kutani utava ni wutomi bza kunyonxisa, hikuva ava na nchumu wa kukuhakela ha wone. Hikusa utahakeliwa akupfuxiweni ka lava kululama.”

15   Loko ayingela lesvo, mun’we wa lava avada naye aku ka yene: “Nyonxani ka lweyi atakanghena ada amfun’wini wa Xikwembu!”

16   Kambe Yesu aku ka yene: “Mhunu wa kukazri ahambe xilalelo lexikulu, kutani azramba vhanu va kutala.

17   Azruma nandzra wake hi nkama wa xilalelo kuyabzela vazrambiwa aku: ‘Buyani, hikuva hinkwasvu svilungile.’

18   Kambe hinkwavu vasungula kuyima hi zritu dzrin’we vajula xa kuyala ha xone. Lwewa kusungula aku ka yene: ‘Nixave nsimu kutani kujuleka niyayivona; Nakukombela, unganihlayeli nandzru.’

19   Kutani mun’wana aku: ‘Nixave ntlhanu wa minkatsrwa ya tihomu kutani noyatidzringisa svosvi. Nakukombela, unganihlayeli nandzru.’

20   Kutani mumbenyana aku: ‘Nahakuchata, xilesvo ningebuyi.’

21   Kutani nandzra abuya adzrungulela n’winyi wake minchumu leyo. Kutani n’winyi wa yindlu ahlundzruka, aku ka nandzra wake: ‘Huma hi kukahlula uya svitaratwini ni le svikontlhweni sva doropa, uyabuyisa svisiwana ni lavanga ni wulima ni lavangavonikiki ni lavakhutaka.’

22   Kutani nandzra aku: ‘Hosi, lesvi usvihlayiki sviyenciwile, kambe mbangu wehetsrhama.’

23   Kutani n’winyi wa yindlu aku ka nandzra: ‘Huma uya svitaratwini ni le minkintazri uvasindzrisa kunhingena, akuva yindlu yanga yitala.

24   Hikusa nimibzela lesvaku anga kone ni mun’we wa lavazrambiwiki atakadzringa xilalelo xanga.’”

25   Kutani svitsrhungu lesvikulu asvimulandzrelela. Lesvi andzrulukiki aku ka svone:

26   “Loko mhunu ata kwanga nakuve angamuvengi tatana wake ni mamana wake ni nsati wake, ni vanake, ni vamakwavu va xinuna ni va xisati, ina, kumbe nhambi wutomi bza ka kwake hi ntshima, angevi mudondzrisiwa wanga.

27   Lweyi akalaka angazrwali mhandzre yake anilandzra angevi mudondzrisiwa wanga.

28   Hikusa, hi mani ka n’wine lweyi loko ajula kuyaka xihondzro, angazrangikiki hi kutsrhama hansi ahamba tinkonta ta mali leyijulekaka, akuva atavona lesvaku kumbe a nayu mali ya kuyanela akuva axiheta kee?

29   Loko svinge tanu, angaxisungula kambe ahluleka kuxiheta, kutani hinkwavu lavasvivonaka vasungula kumuhleka,

30   vaku: ‘Mhunu lweyi asungule kuyaka kambe ahluleke kuheta!’

31   Kumbe hi yini hosi leyi loko yihuma yiyalwa yimpi ni hosi yin’wana yingazrangikiki hi kutsrhama hansi ni madoda ya yone yiyingela mavonela ya wone akuva yitativa lesvaku yingasvikota kulwa ni leyibuyaka ni 20.000 na yova ni 10.000 wa masocha?

32   Kutani loko yinge na kusvikota, na leyin’wana yahali kule, yizrumela madoda ya yone mayakombela kuzrula.

33   Hi ndlela leyifanaka, lweyi ka n’wine akalaka angatsrhiki minchumu yake hinkwayu angevi mudondzrisiwa wanga.

34   “Kunene munyu i wunene. Kambe loko munyu wupshama, xana wutalungiwa hi yini kee?

35   Wungehetizreli kuva misava kumbe kuva xinonisi. Wocukumetiwa. Lweyi anga ni tindleve ta kuyingela aayingele.”