-
Luka 15
1 Kutani vahakelisi va tinemba hinkwavu ni vadohi avamutsrhindzrekelela akuva vamuyingiseta.
2 Kutani vafarisi ni vatsrali vangurangura, vaku: “Mhunu lweyi ayamukela vadohi ada navu.”
3 Lesvi avahambeliki xifananiso lexi, aku:
4 “I mani amakazri kwenu lweyi loko a ni 100 wa tihamba, alahlekeliwa hi yin’we, angetikisiya leta 99 anhoveni, alandzra leya kulahleka kukondzra ayikuma?
5 Kutani loko ayikumile, ayipakatsra hi makatla anyonxa.
6 Kutani loko atlhasa akaya, avitana vanghanu ni vayakelani vake, aku ka vone: Nyonxani na mine, hikusa niyikumile hamba yanga leyi ayilahlekile!’
7 Nimibzela lesvaku hi ndlela leyifanaka, kutava ni kunyonxa kukulu atilweni hi mhaka ya mudohi mun’we lweyi atisolaka kutlula hi mhaka ya 99 lava svingavilelekiki akuva vatisola.
8 “Kumbe hi wini wansati lweyi anga ni 10 wa madrakma, lweyi loko olahla drakma dzrin’we, angetikitlhavika motsre akukula yindlu yake ajuletela ha hombe kukondzra adzrikuma?
9 Kutani loko adzrikumile, avitana vanghanu ni vayakelani, aku: ‘Nyonxani na mine, hikusa nidzrikumile drakma dzranga ledzri anidzrilahlile.’
10 Hi ndlela leyifanaka, nimibzela lesvaku tintsrumi ta Xikwembu tanyonxa hi mhaka ya mhunu mun’we lweyi atisolaka.”
11 Agama aku: “Tatana wa kukazri aa ni vana vabidzri va majaha.
12 Kutani lwentsrongo aku ka tatana wake: ‘Tatana, ninyike pfindla ledzri unibekiseliki dzrone.’ Kutani avayavela minchumu yake hi wubidzri bzavu.
13 Antsrhaku ka masiku mange mangani, n’wana lwentsrongo alongelela minchumu yake hinkwayu aya ka tiko dzra le kule, ayaheta pfindla dzrake hi kuhanya wutomi bza kutlanga ni vavasati.
14 Kutani loko ahete hinkwasvu, kuhumelela ndlala leyikulu atikweni ledzro hinkwadzru, asala awusiwaneni.
15 Apatsre ni kusuka ayakhonzha ka mun’we wa vayaki va tiko ledzro, lweyi angamuzrumela kuyabzisa tinguluve take.
16 Aanavela kudlaya ndlala hi makamba lawa amadiwa hi tinguluve, kambe kungavi na mhunu wa kumunyika.
17 “Kambe loko nhloko yake yisungule kutizra ha hombe, aku: ‘I manyingi njhani malandzra mangatholiwa hi tatana wanga lamadaka maxuzra, nakuve mine nofa lomu hi ndlala!
18 Nahasekeleka niya ka tatana wanga niyaku ka yene: “Tatana, nidohele tilo na wene.
19 Anahafaneliwi hi kuvitaniwa n’wanaku. Niyence kufana ni mun’we wa malandzra yaku lawa umatholiki.”’
20 Kutani asekeleka aya ka tatana wake. Kutani na ahali kule svinene, tatana wake amuvona amutwela wusiwana, atsrutsruma amuxingazra, amun’quta.
21 Kutani n’wana aku ka yene: ‘Tatana, nidohele tilo na wene. Anahafaneliwi hi kuvitaniwa n’wanaku.’
22 Kambe tatana wake abzela malandzra yake, aku: Kahlulisani mihumexa nkhancu lowa hombe wa kone mimuyambexa; mimubekela ni xitlan’wana avokweni, ni masandhazi aminkondzrweni.
23 Nakone fambani miyateka zrole dzra kunona, midzritlhava, hitada hinyonxa,
24 hikusa n’wana lweyi wa ka kwanga aafile kambe kutani awahanya; aalahlekile, kutani akumiwile.’ Kutani vasungula kutinyonxela.
25 “Ankameni lowo n’wanake lwenkulu aali amasin’wini; atiki awatsrhindzrekela amutini, oyingela lesvaku kuchayiwa wunanga funtsrhi kakiniwa.
26 Kutani avitana mun’we wa malandzra amuvutisa, aku: Kova na yini la kaya?
27 Kutani nandzra aku ka yene: ‘Hi lesvaku makwenu atlhelele kaya, kutani tatana waku adlaye zrole dzra kunona hikuva amuyamukele na ahanya.’
28 Kambe ahlundzruka, ayala kunhingena. Kutani tatana wake ahuma ayamukombela.
29 Kutani ahlamula tatana wake, aku: ‘Lavisa, malembe lawa hinkwawu nikutizrelile funtsrhi aningisama nitlula nawu ni wun’we wa ka kwaku, kambe awungisama uninyika nhambi ximbutana akuva ninyonxa ni vanghanu vanga.
30 Kambe konatlhasa lwewa n’wanaku, lweyi angada minchumu yaku ni tinghwavana, umudlayele zrole dzra kunona.’
31 Kutani tatana wake aku ka yene: ‘N’wananga, wene minkama hinkwayu uve na mine, nakone hinkwasvu lesvinga svanga i svaku.
32 Kambe svafanela kuva hikulungela hitlhela hinyonxa, hikusa makwenu aafile kambe atlhele ahanya; aalahlekile kutani akumiwile.’”