BRN

1   Agama akhanela ni vadondzrisiwa, aku: “Aku ni mun’we wa xigogo lweyi aa ni mulaviseli wa yindlu. Siku dzrin’we vamuzrwexe nandzru vaku aatlanga hi minchumu ya n’winyi wake.

2   Kutani amuvitana, aku: ‘I mpsini lesvi nisviyingelaka ha wene? Buyisa mabuku ya tinkonta, hikusa awehe na kutama ulavisela yindlu yanga.’

3   Kutani mulaviseli wa yindlu apimisa lesvi hi le ndzreni ka mbilu: ‘Xana nitayenca yini, lesvi n’winyi wanga anitekelaka wulaviseli? Ani na ntamu wa kuba focholo, nakone svanidanisa kuhanya hi kukombela.

4   Aham! Nasvitiva lesvi ningasviyencaka, akuva loko nihlongoliwa ka xikhundla xa wulaviseli, vhanu vataniyamukela amakaya kwavu.’

5   Kutani avitana ha mun’wemun’we wa lava ava ni xikweneti ka n’winyi wake, aku ka lwewa kusungula: ‘Hi xini xikweneti lexi ufanelaka kuhakela n’winyi wanga?’

6   Aku: ‘100 wa svingumbungumbu sva mafuzra.’ Aku ka yene: ‘Teka papela dzraku, ukahlula utsrhama, utsrala 50.’

7   Agama aku ka lwemun’wana: ‘Wene ke, hi xini xikweneti lexi ufanelaka kuxihakela?’ Aku: ‘100 wa matambori ya tirigu.’ Aku ka yene: ‘Teketa papela dzraku, utsrala 80.’

8   Kutani n’winyi wake adzrumisa mulaviseli lwiya nambesvi aangalulamanga, hikuva ayence hi wutlhazri; hikusa vana va misava leyi vatlhazrihile kutlula vana va livaningo ka kuhanyisana ni vhanu va nguva yavu.

9   “Na mine, nili ka n’wine: Tihambelani vanghanu hi wukosi lebzingalulamangakiki, kuyencela lesvaku loko bzihela, vatamiyamukela awuyakweni lebzitsrhamaka hi masiku.

10   Lweyi adumbekaka ka lesvitsrongo awadumbeka ni ka lesvinyingi, ni lweyi angadumbekiki ka lesvitsrongo ni ka lesvinyingi angadumbekanga.

11   Xisvosvo, loko mingadumbekanga ka wukosi lebzingalulamangakiki, i mani atakamitamelisa lesvinga sva ntiyiso?

12   Nakone loko mingadumbekanga ka minchumu leyilumbaka mhunu mun’wana, i mani atakaminyika lesvinga svenu?

13   Anga kone nandzra lweyi angakotaka kutizrela tihosi tibidzri, hikusa atasindzriseka kunyenya yin’we azrandzra leyin’wana, kumbe atanamazrela yin’we adzrela leyin’wana. Mingesvikoti kuva svikazrawa sva Xikwembu ni sva mali.”

14   Kutani vafarisi, lava avazrandzra mali, avayingiseta mazritu lawa hinkwawu; kutani vasungula kumuhleka.

15   Kutani aku ka vone: “N’wine hi n’wine mitiyencaka valulami amahlweni ka vhanu, kambe Xikwembu xatitiva timbilu tenu. Hikusa lesvi vhanu valiki i sva lisima svanyenyentsa amahlweni ka Xikwembu.

16   “Nawu ni vaprofeta svive kone kuyagamela ka Johani. Kusukela ankameni wolowo, Mfumu wa Xikwembu wazrezriwa, kutani hinkwavu vakunyuluta akuva vanhingena ka wone.

17   Kunene, svanabzala kuva tilo ni misava svinyamalala kutlula kuva ntsrhati wa kukazri wa mazritu ya Nawu wuba hansi.

18   “Mani na mani lwadlayaka wukati ni nsati wake ateka mun’wana ayenca wumbuye, na mani na mani lwachataka ni wansati lweyi atsrhikiwiki hi nuna ayenca wumbuye.

19   “Kayenceke lesvi: Aku ni mhunu mun’we lweyi aali xigogo, lweyi aayambala mpahla ya tihosi ni linyu dzra kuxonga, atsrhama hi kutikholisa siku ni siku awuton’wini bzake bza mhunu lwanga nasvu.

20   Kutani xisiwana xin’wana lexi axivitaniwa Lazaru axihamba xibekiwa anyangweni yake, na xitale hi svilondzra,

21   na xinavela kuxuzra hi matlhantlha lawa amawa hi le tafuleni dzra lwewa xigogo, kambe nhambi timbzana atibuya timunampsetela svilondzra.

22   Kutani xisiwana xifa, xitlakuliwa hi tintsrumi xiyisiwa axifuveni xa Abrahamu. Na yene lwewa xigogo afa ava alahliwa.

23   “Kutani loko ali Sizreni, na axaniseka, atlakuxa nhloko avona Abrahamu hi le kule na Lazaru atlhelweni kwake.

24   Kutani abandlukana aku: ‘Tatana Abrahamu, nitwele wusiwana uzruma Lazaru apeta wugamu bza litiho dzrake amatini atataniholisa lidzrimi, hikusa naxaniseka hi ndzrilo lowu.’

25   Kambe Abrahamu aku: ‘N’wananga dzrimuka lesvaku uyamukelile lesvinene hinkwasvu awuton’wini bzaku hinkwabzu, kambe Lazaru ayamukele lesva kubiha. Kambe svosvi awachaveleliwa lani, kambe wene waxaniseka.

26   Nakone, handle ka lesvo hinkwasvu, kubekiwe xikhele lexikulu amakazri kwezru na n’wine, akuva lavajulaka kutsremakanya vasuka halenu vaya halanu vangasvikoti, ni lavajulaka kutsremakanya vasuka halanu vata halenu vangasvikoti.’

27   Agama aku: ‘Xilesvo ke, tatana, nakukombela lesvaku umuzruma aya kaya ka tatana wanga,

28   hikusa ni ni ntlhanu wa vamakwavu va xinuna, akuva ayavabekela wumboni lesvaku na vone vangabuyi ka mbangu lowu wa kuxaniseka.’

29   Kambe Abrahamu aku: ‘Va na Moxe ni vaprofeta. Avayingisete vone.’

30   Kutani aku, ‘Ihina, svingavi tanu, tatana Abrahamu, kambe loko mun’we wa lavafiki avayela, vatatisola.’

31   Kambe aku ka yene: ‘Loko vangayingiseti Moxe ni vaprofeta, nhambi kopfuka mhunu wa kukazri ka vafi, vangaka vangakholwi.’”