BRN

1   Agama avahambela xifananiso xa kukomba ndlela leyi svijulekaka ha yone kuva vakhongota minkama hinkwayu na vangakazrali,

2   aku: “Adoropeni dzra kukazri aku ni muyavanyisi lweyi aangaxichavi Xikwembu, nhambi hi mhunu aange na mhaka na yene.

3   Nakone adoropeni dzra kone aku ni mun’we wa mufelwa lweyi aahamba amuyela, ayaku: ‘Nilamulele ka nala wanga.’

4   Kutani kuhele nkamanyana na angasvijuli, kambe antsrhaku hi le ndzreni ka mbilu ate: ‘Anixichavi Xikwembu, ni mhunu ani na mhaka na yene,

5   kambe lesvi lwewa mufelwa atsrhamaka hi kunikazrata, nitamulwela akuva atatsrhika kutama abuya atatanisvawula.’”

6   Kutani Hosi yiku: “Yingelani lesvi lwewa muyavanyisi asvihlayiki, nhambilesvi abihiki!

7   Kutani ke, xana Xikwembu xingaka xingalweli vahlawuliwa va xone lavaxidzrilelaka nhlikanhi ni wusiku, na xivalehisela mbilu?

8   Nimibzela lesvaku xitakahlula xivalwela. Nhambitanu, loko N’wana wa Mhunu atlhasa, xana mpelampela atadzrikuma lipfumelo ledzro la misaveni?”

9   Atlhela ahambela xifananiso lexi van’we lava avativona na valulamile, vavona vhanu van’wana na vangali va nchumu, aku:

10   “Vhanu vabidzri vatlhantukele tempeleni vayakhongota. Mun’we aali mufarisi kasi lwemun’wana aali muhakelisi wa tinemba.

11   Mufarisi atlhasa ayima akhongota, ahlaya lesvi hi le mbilwini: ‘We Xikwembu, nakukhensa lesvi ningafanikiki ni vhanu lavan’wana vayivi, vabihi, vayenci va wumbuye — kumbe nhambi muhakelisi lweyi wa tinemba.

12   Nititsrona svakuda kabidzri hi vhiki; nihumexa wukhume bza minchumu yanga hinkwayu, hi kuya hi lesvi niyikumisaka xisvone.’

13   Kambe lwewa muhakelisi wa tinemba atlhasa ayima hi le kule, angasvijuli nhambi kutlakuxela matihlo atilweni, kambe atibetetela xifuva, aku: ‘We Xikwembu, nitwele wusiwana mine mudohi.’

14   Nimibzela lesvaku muhakelisi lweyi wa tinemba amuke akaya kwake na ahlayiwe mululami kutlula mufarisi lwiyani. Hikuva mani na mani lwatitlakuxaka atatsrongahatiwa, kambe lweyi atitsrongahataka atatlakuxiwa.”

15   Kutani vamubuyisela svivanana akuva asvikhumba, kambe loko vadondzrisiwa vasvivona, vavakawuka.

16   Kambe Yesu avitana svivanana sviya ka yene, aku: “Tsrhiketani svivanana svibuya kwanga, mingasvisiveli, hikusa Mfumu wa Xikwembu i wa lavafanaka na svone.

17   Nihlaya na nitiyisile niku ka n’wine: Lweyi akalaka angayamukeli Mfumu wa Xikwembu kufana ni xin’wanana angaka anganhingeni ka wone.”

18   Kutani mun’we wa hosana amuvutisa, aku: “Mudondzrisi Lwenene, nifanela kuyenca yini akuva nikuma wutomi lebzingahelikiki?”

19   Yesu aku ka yene: “Univitanela yini “lwenene”? Anga kone lwenene handle ka mun’we ntsena, anga Xikwembu.

20   Wasvitiva svileleto lesviliki: ‘Ungambuyeti, ungadlayi, ungayivi, unganyikeli wumboni bza madzrimi, komba xichavu tatana waku ni mamana waku.’”

21   Kutani aku: “Hinkwasvu lesvi nisvilandzre kusukela wumpsheni bzanga.”

22   Loko amuyingelile, Yesu aku ka yene, “Kambe kahasale nchumu wun’we ka wene: Xavisa hinkwasvu lesvi unga nasvu uphakela svisiwana, utava ni wukosi amatilweni; ubuya unilandzra.”

23   Kuteloko ayingela lesvo, axukuvala ngopfu svinene, hikusa aali xigogo lexikulu.

24   Kutani loko Yesu amuvona, aku: “Svitavabindzrela njhani lavanga ni timali kunhingena amfun’wini wa Xikwembu!

25   Hikuva svanabzala kuva kamela dzrinhingena hi mbhovo wa ximazri kutlula kuva mhunu lwanga xigogo anhingena amfun’wini wa Xikwembu.”

26   Kutani lavasviyingeliki vaku: “Svone, hi mani lwangahulukaka?”

27   Aku: “Lesvingakotekiki ka vhanu svakoteka ka Xikwembu.”

28   Kambe Petrosi aku: “Lavisa, hine hitsrhike svezru hikulandzra.”

29   Aku ka vone: “Nihlaya na nitiyisile niku ka n’wine: Anga kone lweyi atsrhikiki yindlu kumbe nsati, kumbe vamakwavu, kumbe vapsele, kumbe vana hi mhaka ya Mfumu wa Xikwembu,

30   lwangetikikuma kanyingi minchumu leyo hi kuhindzrahindzra ankameni wa svosvi, atlhela akuma wutomi lebzingahelikiki amisaveni leyitaka.”

31   Agama ateka lava 12 hi tlhelo, aku ka vone: “Lavisani, svosvi hitlhantukela Jerusalema, kutani kutahetiseka hinkwasvu lesvitsraliwiki hi vaprofeta mayelanu ni N’wana wa Mhunu.

32   Hikusa atanyiketiwa ka vhanu va matiko, vatlanga hi yene, vamuxanisa, vamuthukela mazri.

33   Loko vahete kumuba hi ntshilana, vatamudlaya, kambe atapfuka hi siku dzra wuzrazru.”

34   Kambe avasvikumanga ni kutsrongo lesvi aajula kuvabzela svone, hikusa avafihleliwe ntlhamuxelo wa svone; xilesvo avazanga vasvitwisisa lesvihlayiwiki.

35   Kutani ankama lowu Yesu atsrhindzrekelaka Jeriko, aku ni mhunu mun’we lwangavonikiki lweyi aatsrhame xitaratwini akombela zimole.

36   Kutani loko ayingele vhanu va vanyingi na vakhaluta, avutisa lesvaku koyenceka yini.

37   Vamubzela, vaku: “Kokhaluta Yesu, wa Nazareta!”

38   Kutani atlakuxa zritu, aku: “Yesu, N’wana Davhida, nitwele wusiwana!”

39   Kutani lava avali mahlweni vamukawuka, vaku: “Miyela!” Kambe ayengetela kubandlukana, aku: “N’wana Davhida, nitwele wusiwana!”

40   Kutani Yesu ayima aleleta lesvaku vamubuyisa ka yene. Loko atsrhindzrekelile, Yesu amuvutisa, aku:

41   “Ujula lesvaku nikuyencela yini?” Aku: “Hosi, nikombela kutlhela nivona.”

42   Kutani Yesu ka yene: “Tlhela uvona! Lipfumelo dzraku dzrikuhanyisile.”

43   Kutani atekela kutlhela avona, asungula kumulandzra, na adzrumisa Xikwembu. Na vone vhanu hinkwavu, loko vasvivona, vadzrumisa Xikwembu.