BRN

1   Kateloko Yesu alavisa, avona svigogo na svipetetela svihananu sva svone amabokisini ya wukosi bza tempele.

2   Agama avona mun’we wa mufelwa wa xisiwana na apeta minkinyenta yibidzri.

3   Kutani aku: “Nihlaya na nitiyisile niku ka n’wine: Lwewa mufelwa wa xisawana apete svinyingi kutlula lava hinkwavu.

4   Hikusa lava hinkwavu vapete svihananu ka lesvi vasvipambuliki ka lesvingavatalela, kambe lwewa mufelwa, andzreni ka wusiwana bzake, anyikele hinkwasvu lesvi aadumba kuhanya hi svone.”

5   Kutani loko van’we vavulavula hi tempele, hi ndlela leyi dzringaxongiseliwa ha yone hi mazribze ya kudula ni hi minchumu leyinganyikiwa Xikwembu, aku:

6   “Mayelanu ni lesvi misvivonaka, mata masiku lawa kungetikisala zribze ahenhla ka zribze na dzringahohlotiwanga.”

7   Kutani vamuvutisa, vaku: “Mudondzrisi, xana lesvi svitayenceka siku muni, nakone xitava xini xikombiso xa lesvaku svijula kuhumelela?”

8   Aku: “Tivonelani lesvaku mingalahlekisiwi, hikusa vanyingi vatabuya hi vito dzranga, vaku ‘Hi mine’ kumbe ‘Nkama wutsrhindzrekelile.’ Mingavalandzri.

9   Nakone loko miyingela madzrungula ya tiyimpi ni madzolonga, mingatsremeki nhlana; hikusa lesvo svifanela kuzranga sviyenceka, kambe wugamu bzingetitekela kutlhasa.”

10   Agama aku ka vone: “Tiko dzrin’we dzritapfukela tiko dzrin’wana, ni mfumu wun’we wutapfukela wun’wana.

11   Nakone kutava ni kutsrekatsreka lokukulu ka misava, ni tindlala ni mintungu ka mimbangu ya kuhambanahambana; kutatlhela kuva ni svivoniso lesvichavisaka atilweni ni svikombiso lesvikulu.

12   “Kambe na lesvo hinkwasvu svingesihumelela, vhanu vatamikhoma vamixanisa, vaminyiketa amasinagogeni ni le majele, vamiyisa ka tihosi ni vafumi hi mhaka ya vito dzranga.

13   Lesvi svitamipfuna kunyikela wumboni.

14   Xisvosvo, atimbilwini tenu, tibzelani lesvaku akujuleki kululamisela mazritu ya kumahlaya akuva mitilwela loko mithethisiwa,

15   hikusa nitaminyika mazritu ni wutlhazri lesvi valala venu hinkwavu vangetikikota kulwa na svone kumbe kusvihlamula.

16   Nakone mitadlayisiwa hi vapsele venu, nhambi hi vamakwenu ni maxaka ni vanghanu; funtsrhi van’we va n’wine vatavadlaya,

17   nakone mitavengiwa hi vhanu hinkwavu hi mhaka ya vito dzranga.

18   Kambe nhambi nsisi wun’we lowunga tinhlokweni tenu wungaka wungalovi.

19   Mitahuluxa wutomi bzenu hi kutiyisela kwenu.

20   “Kambe, loko mivona Jerusalema na atsrandzreliwe hi masocha lamadzimiki minxaxa, svitivani ke, lesvaku kesala kutsrongo akuva ahelisiwa asala hi mazrumbi.

21   Kutani lavanga Judeya avatsrutsrume vaya atinhaveni, ni lavanga ndzreni kwake avasuke, ni lavanga masin’wini vangahatlhele vanhingena andzreni kwake,

22   hikuva lawa i masiku ya kudzrihisela akuva kuhetiseka hinkwasvu lesvitsraliwiki.

23   Va ni khombo njhani vavasati lavanga ni tinyimba ni lavayan’wisaka amasikwini lawo! Hikusa kutava ni kukazrateka lokukulu atikweni ni mahlundzru ahenhla ka tiko ledzri.

24   Kutani vatatsremiwa hi lipanga vafa, vatlhela vakhomiwa vayisiwa amatikweni hinkwawu; kutani Jerusalema atakandzreteliwa hi matiko kuko kutlhangana minkama leyibekisiwiki ya vamatiko.

25   “Nakone kutava ni svikombiso adambzini, ni le n’wetini, ni le tinyeletini; kutani matiko matatalataleka amisaveni, mangaxitivi ni xa kuxiyenca hi mhaka ya kudzruma ka lwandle ni kulebza ka mavimbi ya dzrone.

26   Vhanu vatatitivala hi kuchava ni kulavisela lesvitakayenceka amisaveni, hikusa mintamu ya matilo yitatsrekatsrekisiwa.

27   Kutani hi nkama lowo vatavona N’wana wa Mhunu na abuya hi tlavi, na a ni ntamu ni kuphatima lokukulu.

28   Kutani loko minchumu leyi yisungula kuyenceka, wololokani, mitlakuxa tinhloko tenu, hikuva kuhuluxiwa kwenu ku kusuhi.”

29   Agama avahambela xifananiso xifaniso, aku: “Lavisani nkuwa ni minsinya hinkwayu.

30   Loko yisungula kuhluka makamba, mitekela kusvivona mitlhela misvitiva lesvaku malanga ma kusuhi.

31   Hi ndlela leyifanaka, na n’wine, loko mivona minchumu leyi yihumelela, svitivani lesvaku Mfumu wa Xikwembu wu kusuhi.

32   Nihlaya na nitiyisile niku ka n’wine: Lixaka ledzri dzringaka dzringaheli na kungesihumelela lesvi hinkwasvu.

33   Tilo ni misava svitanyamalala, kambe mazritu yanga mangaka manganyamalali.

34   “Kambe tivonelani lesvaku timbilu tenu tingachuki tibindzriwa hi kuda ni kunwa kutlula mpimu, ni kuvindlavindleka hi sva wutomi, kutani siku ledzro dzrimichuketa,

35   kufana ni ntlhamu. Hikusa dzritawela hinkwavu lavahanyaka amisaveni hinkwayu.

36   Xilesvo, tsrhamani na mivonelela, na mihamba svikhongoto nkama hinkwawu akuva mikuma ntamu wa kuhuluka ka minchumu leyi hinkwayu leyifanelaka kuyenceka, ni kuyima amahlweni ka N’wana wa Mhunu.”

37   Kutani kusukela amixweni kuya amadambzeni aahamba adondzrisa atempeleni, asuka awusikwini aayatsrhama anhaveni leyivitaniwaka Nhava ya Minhlwazri.

38   Kutani vhanu hinkwavu avahamba vamuyela atempeleni na wehe mixo svinene akuva vayamuyingela.