-
Luka 23
1 Kutani xitsrhungu hinkwaxu xisekeleka, ximuyisa ka Pilatu.
2 Kutani vasungula kumulumbeta, vaku: “Hikume mhunu lweyi na apfilunganyisa tiko dzrezru, atlhela atsimbisa vhanu kuhakela tinemba ka Khezari, na aku yene i Kriste ni hosi.”
3 Kutani Pilatu amuvutisa, aku: “Xana u Hosi ya vajuda?” Yesu amuhlamula, aku: “Wene ha wusvaku uhlaya tanu.”
4 Kutani Pilatu aku ka vaprista lavakulu ni svitsrhungu: “Anikumi nandzru ka mhunu lweyi.”
5 Kambe vaphikelela, vaku: “Ahlohlotela xitsrhungu hi kudondzrisa atikweni hinkwadzru dzra Judeya, kusukela Galileya kutatlhasa halenu.”
6 Loko ayingele lesvo, Pilatu avutisa, aku: “Mhunu lweyi ahuma Galileya?”
7 Antsrhaku ka loko akambisisile, akuma lesvaku Yesu aali hansi ka mfumu wa Heroda, amuzrumela ka Heroda, lweyi na yene aali Jerusalema amasikwini lawo.
8 Loko Heroda avona Yesu, anyonxa ngopfu svinene, hikusa aa ni nkama wa kuleha na ajula kuvona Yesu hikuva aayingele sva kutala ha yene, nakone aanavela kumuvona na ahamba singita dzra kukazri.
9 Kutani atizra kumuhamba svivutiso sva kutala, kambe angamuhlamuli.
10 Kambe vaprista lavakulu ni vatsrali avayime hi tlhelo vamulumbeta minchumu ya kutala svinene.
11 Kutani Heroda xikan’we ni masocha yake vatlanga hi yene, vatlhela vamuhleka, vamuyambexa nkhancu wa kudula svinene vagama vamutlhelisa ka Pilatu.
12 Kutani hi siku ledzro Heroda na Pilatu vasungula kuva vanghanu, hikusa akusunguleni avali valala.
13 Kutani Pilatu atlhanganisa vaprista lavakulu, vazrangeli ni xitsrhungu,
14 aku ka vone: “Minibuyisele mhunu lweyi na miku ahlohlotela xitsrhungu kupfukela wuhosi. Phela, mine nimukambisisile amahlweni kwenu kambe anikumanga nchumu ni wa wun’we ka mhunu lweyi ka lesvi mimulumbetaka ha svone.
15 Nhambi Heroda angawukumanga, hikusa atlhele amuzrumela halenu kwezru; kutani svivonani lesvaku angayencanga nchumu lowufaneliwaka hi lifu.
16 Xisvosvo, nitomukhatisa ntsena nigama nimuntsrhunxa.”
17 --
18 Kambe xitsrhungu hinkwaxu xibandlukana, xiku: “Mususe lweyo, uhinyika Barabasi!”
19 (Mhunu lweyi aapfaleliwe jele hi mhaka ya kupfukela wuhosi lokuviki kone adoropeni ni kudlaya vhanu.)
20 Kutani Pilatu atlhela avulavula ni vhanu, na ajula kuntsrhunxa Yesu.
21 Kambe vabandlukana, vaku: “Mugongondzrele amhandzreni! Mugongondzrele amhandzreni!”
22 Atlhela akhanela navu ka wuzrazru, aku: “Hi mhaka muni? Ehona yini mhunu lweyi? Anikumanga nchumu ka yene wa kufaneliwa hi lifu. Xisvosvo, nitomukhatisa ntsena nigama nimuntsrhunxa.”
23 Vasindzrisa hi zritu ledzritlakukiki vaku vajula kuva Yesu adlawa, kutani mazritu yavu mahlula.
24 Kutani Pilatu atsrema lesvaku kuyenciwa lesvi avasvijula.
25 Lesvi antsrhunxiki mhunu lweyi avajula yene, lweyi aapfaleliwe jele hi mhaka ya kupfukela wuhosi ni kudlaya vhanu, kambe anyiketa Yesu lesvaku vayenca kuzrandzra hi yene.
26 Kutani ankama lowu vamufambisaka, vakhoma mun’we wanuna lwavitaniwaka Simoni wa le Sireni, lweyi aabuya hi le ntlhaveni, vamuzrwexa mhandzre akuva alandzra Yesu na yone akatleni.
27 Kutani aalandzriwa hi xitsrhungu lexikulu xa vhanu, ni xa vavasati lava avaba nkosi, vamudzrilela.
28 Kutani Yesu andzruluka aku ka vavasati lavo: “Van’hwanyana va Jerusalema, mingadzrili hi mhaka yanga. Dzrilani hi mhaka yenu ni vanenu;
29 hikusa, lavisani, mata masiku lawa vatakaku: ‘Mawaku vavasati lavangeke na vana, ni makhuzri lamangikitamela n’wana, ni mavele lamangikiyan’wisa!’
30 Kutani vatasungula kubzela tinhava, vaku: ‘Hiwelani’, ni svitsrunga, vaku: ‘Hinkhapametani!’
31 Hikusa loko vayenca lesvi ka nsinya lowahatsrakamaka, kutayenceka yini loko wuwomile?”
32 Aku ni svigevenga svibidzri, lesvingafambisiwa xikan’we na yene akuva sviyadlayiwa.
33 Kutani loko vatlhasa ambangwini lowuvitaniwaka “Pala”, vamugongondzrela amhandzreni xikan’we ni svigevenga, xin’we axineneni, xin’wana aximatsrini xake.
34 Kambe Yesu aku: “Tatana, vadzrivalele, hikusa avasvitivi lesvi vasviyencaka.” Kutani vayavelana sviyambalu svake hi kuhamba mpshampsha.
35 Kutani vhanu avayime vahlalela, kasi vafumi avapatsra ni kumupoyilela, vaku: “Van’wana avahuluxile. Aatihuluxe loko ali Kriste, Muhlawuliwa wa Xikwembu!”
36 Nhambi masocha matlange hi yene, mabuya mamunyika vhinyo dzra kutsatsavela,
37 maku: “Loko uli Hosi ya vajuda, tihuluxe.”
38 Nakone aku ni tsralwa ahenhla kwake, ledzri adzriku: “Leyi i Hosi ya Vajuda.”
39 Kutani xin’we xa svigevenga lesvi asvihayekiwile xisungula kumupoyilela, xiku: “Kasi ahi wene Kriste? Tihuluxe, uhuluxa na hine!”
40 Kutani lexin’wana xixikawuka, xiku: “Nhambi Xikwembu awuxichavi, lesvi unyikiwiki xikhatiso xo xa xin’we?
41 Hine svahifanela, hikusa hohakelisiwa hi lesvi hisviyenciki; kambe lweyi angayencanga nchumu ni wun’we wa kubiha.”
42 Xigama xiku: “Yesu, nidzrimuke loko unhingena amfun’wini waku.”
43 Kutani aku ka xone: “Nihlaya na ni nitiyisile namunhla, niku ka wene: Utava na mine Paradeyisini.”
44 Kutani ankameni wolowo asviya ka dina, kambe munyama wumbhonye tiko hinkwadzru kuyatlhasa 15 wora.
45 Dambu adzrimphumile; kutani kapulana dzra kusizrela mbangu wa kuxwenga dzrihandzruka hi makazri.
46 Kutani Yesu abandlukana hi zritu dzra kutlakuka, aku: “Tatana, ninyiketa moya wanga amavokweni yaku.” Loko ahlaye lesvo, afa.
47 Kutani loko avone lesviyencekiki, muzrangeli wa masocha adzrumisa Xikwembu, aku: “Hakunene, mhunu lweyi aalulamile.”
48 Kuteloko vhanu hinkwavu va kutala lava avabuye vatatahlalela vavona lesviyencekiki, vatlhelela makaya na vatiba svifuva.
49 Kutani hinkwavu lava avamutiva avayime hi le kule vahlalela minchumu leyi, kupatsra ni vavasati lava avamuhelekete kusukela Galileya.
50 Kutani aku ni mun’we wanuna lweyi aavitaniwa Josefa, xizro xa Huvo ya Xijuda, lweyi aali mhunu lwenene ni wa kululama,
51 lweyi akalaka angaseketelanga makungu ni sviyenco sva Huvo ya Xijuda. Aali wa le Arimateya, dzrin’we dzra madoropa ya xijuda, nakone aayimela Mfumu wa Xikwembu.
52 Ayekhanela na Pilatu, akombela ntsrumbu wa Yesu.
53 Kutani awuxixa, awutsrondzriyela hi linyu dzra kudula, awubeka ka sizra ledzrikeliwiki azribzeni, lomu akungingisama kulahliwa mhunu kone.
54 Kutani aali siku dzra Malulamiselo, nakone Savata adzrili kusuhi ni kusungula.
55 Kambe vavasati lavabuyiki naye hi le Galileya valandzrelelile, vayavona sizra ni malahliwela ya ntsrumbu wake,
56 vagama vamuka vayalulamisela mizri ya kunun’hwela ni mafuzra ya kutola. Kambe hi Savata dzra kone vawisa hi kulandzra nawu.