-
Luka 3
1 Hi lembe dzra wu-15 dzra kufuma ka Tiberyu Khezari, nkama lowu Pontiyu Pilatu aali hosi ya xifundzrankulu xa Judeya, na Heroda ali muzrangeli wa xifundzra xa Galileya, Filipi, makwavu, ali muzrangeli wa xifundzra lexitlhanganisaka muganga wa Itureya na Trakoniti, na Lisaniya ali muzrangeli wa xifundzra xa le Abileni,
2 hi nkama lowu Anasi na Kayafasi avali vaprista lavakulu, zritu dzra Xikwembu dzribuyela Johani, n’wana Zakariya, amananga.
3 Kutani afambafamba atikweni hinkwadzru ledzringa matlhelweni ya Jordani, azrezra babatiso dzra kutisola akuva vhanu vadzrivaleliwa svidoho,
4 svanga hesvi svitsraliwiki ha kone abukwini dzra mazritu ya muprofeta Ezaya: “Kutwala zritu dzra mhunu lwabandlukanaka amananga, aku: ‘Lulamisani ndlela ya Jehovha! Mukhulelani tindlela ta kululama.
5 Nkova wun’wana ni wun’wana wutaseleteliwa, ni nhava yin’wana ni yin’wana ni ganga dzrin’wana ni dzrin’wana svitahizrimuxiwa; tindlela ta kujikajika titawololoxiwa, ni tindlela ta svikhelekhele titalulamisiwa tifambeka ha hombe;
6 kutani vhanu hinkwavu vatavona huluxu dzra Xikwembu.’”
7 Kutani aaku ka svitsrhungu lesvi asvimuyela akuva asvibabatisa: “N’wine vana va svipshahla! I mani amibiki ndleve akuva mitsrutsruma mahlundzru lamataka?
8 Ina ka, humexani mihandzru ya kufambelana ni kutisola. Mingasunguli kutibzela lesvi andzreni kwenu: ‘Hine hi vana va Abrahamu.’ Hikusa nimibzela lesvaku Xikwembu xingapfuxela Abrahamu vana hi mazribze lawa.
9 Nakone funtsrhi chati kutani dzrigineteliwe amitsrwini ya minsinya. Xisvosvo, nsinya wun’wana ni wun’wana lowungapsalikiki mihandzru leyinene wutatsremiwa wucukumeteliwa andzrilweni.”
10 Kutani vhanu avamuvutisa, vaku: “Kutani ke, hifanela kuyenca yini?”
11 Kutani aavahlamulisa xilesvi: “Lweyi anga ni minkhancu yibidzri aahanane lweyi angeke na nchumu, ni lweyi anga ni svakuda aayencise xisvosvo.”
12 Kutani na vone vahakelisi va tinemba vayile, na vajula kubabatisiwa, vaku ka yene: “Mudondzrisi, hifanela kuyenca yini?”
13 Aku ka vone: “Mingahakelisi vhanu sva kutlula lesvi mifanelaka kuvahakelisa svone.”
14 Nakone, na vone lava avali ntizrweni wa wusocha avaku: “Xana hifanela kuyenca yini?” Kutani aku ka vone: “Mingachaviseli vhanu mivatekela svavu kumbe mivalumbeta sva madzrimi, kambe nyonxani hi lesvi miholeliwaka svone.”
15 Kutani vhanu avali kulanguseleni, nakone hinkwavu avapimisa lesvi ha Johani atimbilwini tavu: “Angava ali yene Kriste?”
16 Johani aavayangula hinkwavu, aku: “Mine, kunene, nimibabatisa hi mati, kambe awata lweyi anitlulaka hi ntamu, lweyi nikalaka ningafaneliwi nhambi hi kumutlhantlha tingoti ta masandhazi. Atamibabatisa hi moya wa kuxwenga ni hi ndzrilo.
17 Atamele focholo dzra kuchefulela ha dzrone akuva abasisa mbangu lowu ahulaka ka wone tirigu wusala na webaa! Atahlengeletela tirigu atsrhaleni dzrake, kambe makamba ya kone, atamahisa hi ndzrilo lowungatimekiki.”
18 Nakone aavatsratsriya hi tindlela tin’wana ta kutala, atlhela azrezrela tiko madzrungula lamanene.
19 Kambe Heroda, hosi ya xifundzra, lesvi aakawukiwa hi Johani hi mhaka ya Herodiya, nsati wa makwavu, ni hi mhaka ya minchumu hinkwayu ya kubiha leyi Heroda angayiyenca,
20 atiyengetelele minandzru hi kupfalela Johani ajele.
21 Kutani loko vhanu hinkwavu vababatisiwile, Yesu na yene ayebabatisiwa. Nkama lowu ahambaka xikhongoto, matilo mapfuleka,
22 kutani moya wa kuxwenga wuxikela henhla kwake na wu ni xivumbeko xa mizri xa kufana ni tuva, kugama kutwala zritu ledzrihumaka atilweni, dzriku: “Wene u N’wananga wa kuzrandzreka, lweyi ninyonxaka ha yene.”
23 Kutani loko Yesu asungula ntizro wake, aa ni kusuhi ni 30 wa malembe, na hi nawu ahlayiwa lesvaku i
n’wana Josefa,
n’wana Heli,24 n’wana Matati,
n’wana Levhi,
n’wana Melki,
n’wana Janayi,
n’wana Josefa,25 n’wana Matatiya,
n’wana Amosi,
n’wana Nahume,
n’wana wa Esli,
n’wana Nagayi,26 n’wana Mahati,
n’wana Matatiya,
n’wana Semeyni,
n’wana Joseki,
n’wana Joda,27 n’wana Johanani,
n’wana Resa,
n’wana Zerubabele,
n’wana Seyaltiyeli,
n’wana Neri,28 n’wana Melki,
n’wana Adi,
n’wana Kosami,
n’wana Elmadami,
n’wana Eri,29 n’wana Yesu,
n’wana Eliyezeri,
n’wana Jorimi,
n’wana Matati,
n’wana Levhi,30 n’wana Simiyoni,
n’wana Juda,
n’wana Josefa,
n’wana Jonami,
n’wana Eliyakimi,31 n’wana Meleya,
n’wana Mena,
n’wana Matata,
n’wana Nathani,
n’wana Davhida,32 n’wana Jese,
n’wana Obede,
n’wana Bowazi,
n’wana Salomoni,
n’wana Nasoni,33 n’wana Aminadabe,
n’wana Arini,
n’wana Hesroni,
n’wana Perezi,
n’wana Juda,34 n’wana Jakobe,
n’wana Izaki,
n’wana Abrahamu,
n’wana wa Tera,
n’wana Nahori,35 n’wana Serugi,
n’wana Rewu,
n’wana Pelege,
n’wana Eberi,
n’wana Sela,36 n’wana Kayinani,
n’wana Arpakixadi,
n’wana Semi,
n’wana Nowa,
n’wana Lameki,37 n’wana wa Metusela,
n’wana Enoki,
n’wana Jaredi,
n’wana Mahalaleli,
n’wana Kayinani,38 n’wana Enoxi,
n’wana Sete,
n’wana Adamu,
n’wana Xikwembu.