BRN

1   Kutani Yesu, asuka hi Jordani na atale hi moya wa kuxwenga, akongomisiwa hi moya kuya amananga,

2   aheta 40 wa masiku, ava adzringiwa hi Diyavulosi. Ahete masiku lawo na angadi nchumu; xilesvo loko magamile, atwe ndlala.

3   Kutani Diyavulosi aku ka yene: “Loko uli n’wana wa Xikwembu, bzela zribze ledzri dzrihamba pawu.”

4   Kambe Yesu amuhlamula, aku: “Kutsraliwe lesvi: ‘Mhunu angafanelanga kuhanya hi svakuda ntsena.’”

5   Kutani Diyavulosi amuteka ayamukomba mimfumu hinkwayu ya misava hi nkamanyana.

6   Kutani Diyavulosi aku ka yene: “Nitakunyika wuhosi lebzi hinkwabzu ni kuphatima ka bzone, hikuva ninyiketiwe bzone, kutani nibzinyika lweyi nimuzrandzraka.

7   Xisvosvo, loko wene unikhinsamela, lesvi hinkwasvu svitava svaku.”

8   Kutani Yesu aku ka yene: “Kutsraliwe lesvi: ‘Khinsamela Jehovha, Xikwembu xaku, ugandzrela yene ntsena.’”

9   Agama amuyisa Jerusalema, amuyimisa axihlungwini xa tempele, aku ka yene: “Loko uli n’wana wa Xikwembu, dladlama ahansi,

10   hikusa kutsraliwe lesvi: ‘Ataleleta tintsrumi tikubuyela, titatakusizrelela’,

11   nakone, ‘titakuqhamukela hi mavoko ya tone, lesvaku ungachuki utitlirinya nkondzro hi zribze.’”

12   Kutani Yesu amuhlamula, aku: “Kuhlayiwe lesvi: ‘Ungachuki udzringa Jehovha, Xikwembu xaku.’”

13   Kutani loko Diyavulosi ahete kumudzringa hi tindlela hinkwatu, amutsrhika kuko kutlhasa mukhandlu wun’wana.

14   Kutani Yesu atlhelela Galileya hi ntamu wa moya; kutani ndhuma yake yihangalaka amugangeni hinkwawu.

15   Kutani aadondzrisa amasinagogeni yavu, atlhela akhuziwa hi hinkwavu.

16   Agama aya Nazareta, lomu angakulela kone. Kutani hi kulandzra ntolovelo wake hi siku dzra Savata, anhingena asinagogeni, agama asekeleka akuva adondzra buku.

17   Lesvi vamunyiketiki buku dzra muprofeta Ezaya; kutani loko adzripfulile, akuma lomu akutsraliwe lesvi:

18   “Moya wa Jehovha wule henhla kwanga, hikuva anitotile akuva nibzela svisiwana madzrungula lamanene. Anizrumele kutativisa vabohiwa lesvaku vatantsrhunxiwa, ni lavangavonikiki lesvaku vatatlhela vavona, ni kuntsrhunxa lavakandzreteliwaka,

19   ni kutwalisa lembe ledzrinyonxisaka dzra Jehovha.”

20   Agama apfala buku, adzritlhelisela mupfunisi wa sinagoga, ayatsrhama. Kutani hinkwavu lava avali asinagogeni vamupondzrolela matihlo.

21   Kutani asungula kuvabzela lesvi: “Namunhla, tsralwa ledzri migamaka kudzriyingela dzrihetisekile.”

22   Kutani hinkwavu vamuyimelela, vahlamala hi mazritu ya kunandzrika lamahumaka anon’wini wake, vaku: “Xana lweyi ahi yene n’wana wa Josefa?”

23   Kutani aku ka vone: “Kunene mitanibzela xihlayahlaya lexi: ‘Mudahi, tidahe. Hinkwasvu lesvi hisviyingeliki lesvaku sviyencekile le Kapernawume, sviyence ni kola tikweni dzraku.’”

24   Agama aku: “Nihlaya na nitiyisile niku ka n’wine: Aku na muprofeta lwanyonxeliwaka atikweni dzrake.

25   Nimibzela mhaka leyi leyitiyiki: Amasikwini ya Eliya aku ni mafelwa manyingi Yisrayele loko tilo dzripfaliwile hi malembe mazrazru ni 6 wa tihweti, kuva ni ndlala leyikulu atikweni hinkwadzru.

26   Kambe Eliya angazrumeliwanga ka ni mun’we wa vone, loko kunge ntsena ka mufelwa wa le Zarefati, atikweni dzra Sidoni.

27   Nakone, ankameni wa muprofeta Elixa aku ni vhanu vanyingi va nhlokonho le Yisrayele. Kambe akubasisiwanga ni mun’we wa vone, loko angali Nahamani, lwewa musirya.”

28   Kutani loko vayingela lesvo, hinkwavu lava avali asinagogeni vatala hi mahlundzru,

29   kutani vasekeleka vamuhumexa adoropeni, vamuyisa axiweni xa nhava leyi doropa dzravu adzriyakiwe ahenhla ka yone, lesvaku vatamucukumetela ahansi.

30   Kambe aphondla hi le makazri kwavu, atifambela.

31   Agama afulamela Kapernawume, dzrin’we dzra madoropa ya Galileya. Kutani avadondzrisa hi masavata;

32   kutani vhanu avahlamala hi madondzrisela yake hikuva mazritu yake ama ni ntamu.

33   Kutani asinagogeni aku ni mhunu lweyi aa ni moya lowunyamiki, wa demona; kutani demona dzribonga hi zritu dzra kutlakuka, dzriku:

34   “Ha! Hikuhonele yini, wene Yesu wa Nazareta? Xana utele kutatahihelisa? Nasvitiva lesvaku u mani: U Muxwengi wa Xikwembu!”

35   Kambe Yesu adzrikawuka, aku: “Miyela, uhuma ka yene!” Kutani dzrimutlatlalata amakazri ka vhanu, dzrigama dzrihuma ka yene na dzringazanga dzrimuvavisa.

36   Kutani hinkwavu vatala hi kuhlamala, vasungula kubzelana lesvi: “Hi ledzra kuyini zritu ledzri? Hikusa nhambi mimoya leyinyamiki, oyenca hi kuyileleta kufana ni hosi, yihuma!”

37   Kutani ndhuma yake yihangalaka amimbangwini hinkwayu ya le kusuhi.

38   Agama asuka asinagogeni, anhingena akaya ka Simoni. Kutani mamana wa nsati wa Simoni aavabza hi kuhiseta lokukulu ka mizri, kutani vamukombela lesvaku amupfuna.

39   Kutani akazrama ahenhla kwake abzela kuhiseta ka mizri lesvaku kusuka; kutani kumutsrhika. Atekela kupfuka avayencela lesvi ni lesviyani.

40   Kambe loko dambu dzripela, hinkwavu lava avavabzeliwa vamubuyisela vhanu lavanga ni mavabzi ya mixakaxaka. Kutani atlhanteka mavoko ka mun’wana ni mun’wana wavu, avadaha.

41   Ni mademona amahuma ka vhanu vanyingi, na mabandlukana, maku: “Wene u n’wana wa Xikwembu!” Kambe amakhwavela, angamatsrhiki mavulavula, hikusa amamutiva lesvaku hi yene Kriste.

42   Kutani, loko bzixile, ahuma aya ka mbangu wa mananga. Kambe svitsrhungu svimujuletela sviva svimuyela lomu aali kone, svimukhomeletela lesvaku angasuki asvisiya.

43   Kambe aku ka svone: “Kujuleka niyazrezra madzrungula lamanene ya Mfumu wa Xikwembu ni le madoropeni man’wana, hikuva hi svosvo ningazrumeliwa svone.”

44   Kutani ayazrezra amasinagogeni ya le Judeya.