BRN

1   Kutani kuteloko xitsrhungu ximukamanyalata, na xiyingela zritu dzra Xikwembu, ayayima atlhelweni ka tiva dzra Genezareti,

2   kutani avona maboti mabidzri na matsrimbiwe atlhelweni ka tiva, kambe vaphasi va kone avahume vahlampsa minkukutu.

3   Lesvi anhingeniki ka dzrin’we dzra maboti, dzra Simoni, amukombela lesvaku adzritsrhindzreta kulenyana ni sava. Loko atsrhamisile, asungula kudondzrisa svitsrhungu na ali botini.

4   Loko ahete kukhanela, aku ka Simoni: “Weta uya lomu ka kuyenta, miyapeta kone minkukutu yenu mitaphasa.”

5   Kambe Simoni ahlamula, aku: “Mudondzrisi, hitikazrate wusiku hinkwabzu kambe ahiphasanga nchumu, kambe hi kuhlaya kwaku nitapeta minkukutu.”

6   Loko vayence lesvo, vaphase tinhlampfi ta kutala ngopfu svinene, lakakuva minkukutu yavu yihandzrukela.

7   Kutani vatlakuxa mavoko vavitana vanghanu vavu lava avali botini ledzrin’wana lesvaku vabuya vavapfuna. Kutani vabuya, vatata maboti ha mabidzri, lakakuva masungula ni kumbombomela.

8   Kutani loko avona lesvo, Simoni Petrosi awela amatsrolweni ya Yesu, aku: “Hosi, suka la ka mine, hikuva ni mhunu wa svidoho.”

9   Hikusa yene ni lava avali naye avatale hi kuhlamala lokukulu hi mhaka ya tinhlampfi ta kutalisa xilesviya leti vatikumiki,

10   kutani svive tanu na Jakobe na Johani, vanga vana va Zebedewu, lava avatizrisana na Simoni. Kambe Yesu aku ka Simoni: “Ungachavi. Kusukela ka namunhla utaphasa vhanu.”

11   Kutani vatlhelisa maboti asaveni, vatsrhika hinkwasvu, vamulandzra.

12   Kuteloko ali ka dzrin’we dzra madoropa, okuma lesvaku aku ni mun’we wanuna wa kutala hi nhlokonho! Loko avona Yesu, awela hansi hi mombo, amukombela, aku: “Hosi, loko usvijula, unganibasisa.”

13   Kutani Yesu analavuta voko, amukhumba, aku: “Nasvijula! Basisiwa.” Kolanu nhlokonho yinyamalala ka yene.

14   Agama amuleleta akuva angabzeli mhunu, aku: “Kambe famba uyatikomba ka muprista, uyahumexa gandzrelo dzraku dzra kubasisiwa, hi la Moxe aleletiki ha kone, lesvaku bziva wumboni ka vone.”

15   Kambe ndhuma yake ayoya yihangalaka, ni svitsrhungu lesvikulu asvihlengeletana lesvaku svimuyingiseta ni kudahiwa mavabzi ya svone.

16   Kambe aatolovela kuya mimbangwini ya mananga ayakhongota.

17   Siku dzrin’wana na ali kazri adondzrisa, akutsrhamise vafarisi ni vadondzrisi va Nawu, na vapfa hi le svidoropaneni hinkwasvu sva Galileya ni sva Judeya, ni le Jerusalema; kutani Jehovha amunyika ntamu wa kuhanyisa vhanu.

18   Kohumelela vavanuna lava avazrwale mhunu wa kukhwanyala svizro hi likuku, vadzringisa kumunhingenisa lesvaku vatamubeka amahlweni ka Yesu.

19   Kutani, hi kuvona lesvaku avayikumi ndlela ya kumunhingenisa hi mhaka ya xitsrhungu, vakhwela ahenhla ka lwangu, vaphendla mathayela vamuxixa hi likuku amakazri ka lava avali amahlweni ka Yesu.

20   Loko avona lipfumelo dzravu, aku: “Nanduwe, svidoho svaku svidzrivaleliwile.”

21   Kutani vatsrali ni vafarisi vasungula kupimisa lesvi atimbilwini tavu: “I mani lweyi, lwavulavulaka svizruku? I mani angadzrivalelaka loko angali Xikwembu ntsena?”

22   Kambe Yesu, hi kuvona mimpimiso yavu, avayangula, aku: “Mipimisa yini atimbilwini tenu?

23   Xana kunabzala ngopfu yini: Kuhlaya lesvaku ‘Svidoho svaku svidzrivaleliwile’, kumbe kuhlaya lesvaku ‘Sekeleka ufamba’ kee?

24   Kambe akuva mitasvitiva lesvaku N’wana wa mhunu a ni ntamu la misaveni wa kudzrivalela svidoho—”, aku ka mhunu lwewa kukhwanyala svizro: “Nili ka wene: ‘Sekeleka utlakula likuku dzraku, utimukela.’”

25   Kutani kolanu asekeleka amahlweni kwavu atlakula likuku ledzri aayetlele ka dzrone, amuka kaya kwake, na adzrumisa Xikwembu.

26   Kutani hinkwavu vatala hi kuhlamala, vasungula kudzrumisa Xikwembu, vatlhela vatala hi nchavu, vaku: “Hivone minchumu ya kuhlamalisa namunhla!”

27   Kutani antsrhaku ka lesvi, ahuma, agama avona muhakelisi wa tinemba lwavitaniwaka Levhi na atsrhame andlwini ya kuhakelisa tinemba. Kutani aku ka yene: “Buya unilandzra.”

28   Ahangatsrhika hinkwasvu, asekeleka amulandzra.

29   Levhi agama amuhambela nkhuvu wa wukulu akaya kwake, kutani kukumeka xitsrhungu lexikulu xa vahakelisi va tinemba ni vambeni lava avada navu.

30   Kutani vafarisi ni vatsrali vasungula kungurangurela vadondzrisiwa vake, vaku: “Midela yini mitlhela minwa ni vahakelisi va tinemba ni vadohi?”

31   Kutani Yesu avayangula, aku: “Lavanga vatomi avajuli mudahi; ntsena lavavabzaka.

32   Anitelanga kutavitana lavalulamiki, kambe nitele kutavitana vadohi lesvaku vatisola.”

33   Kutani vaku ka yene: “Vadondzrisiwa va Johani vatsrhama hi kutitsrona svakuda ni kuhamba svikhongoto; na vone vadondzrisiwa va vafarisi vayenca tanu, kambe lava ka kwaku vada vatlhela vanwa.”

34   Kutani Yesu aku ka vone: “Xana mingayenca vanghanu va muteki vatitsrona svakuda na muteki ahali navu kee? Ihina.

35   Kambe mata masiku lawa muteki atakahambanisiwa navu; lanu ke, ina, vatatitsrona svakuda amasikwini lawo.”

36   Atlhela avahambela xifaniso, aku: “Aku na mhunu atsremaka xihlama ka xiyambalu xa ximpsha axizrungela ka xiyambalu xa kuguga. Hikusa loko oyenca lesvo, kutani xihlama leximpsha xitahandzruka nakone xihlama xa xiyambalu leximpsha xingetiyelana ni xiyambalu xa kuguga.

37   Nakone, aku na mhunu lweyi achelaka vhinyo dzrimpsha ka minkwama ya kuguga. Hikusa loko oyenca lesvo, vhinyo ledzrimpsha dzritahandzrula minkwama, bzihalakela, nakone minkwama ya kone yitahoneka.

38   Kambe vhinyo ledzrimpsha dzrifanela kubekisiwa aminkwameni leyimpsha.

39   Nakone aku na mhunu ajulaka vhinyo ledzrimpsha antsrhaku ka kunwa ledzra khale, hikusa ali: ‘Kunandzrika ledzra khale.’”