BRN

1   Kate hi dzrin’we dzra masiku ya Savata, akhaluta hi le masin’wini ya tirigu, kutani vadondzrisiwa vake vasungula kukhaya mimoko vayisvosva hi mavoko, vada.

2   Kutani van’we va vafarisi vaku: “Miyencela yini lesvitsimbisiwaka hi nawu hi siku dzra Savata?”

3   Kambe Yesu avayangula, aku: “Xana amingidondzra lesvi Davhida angasviyenca loko ayingela ndlala, yene ni vanghanu vake?

4   Anhingene andlwini ya Xikwembu, ateka makati ya magandzrelo ada, ava anyika ni lava avali naye, nakuve nawu watsimba kuva mhunu ada handle ka vaprista ntsena!”

5   Agama aku ka vone: “N’wana wa mhunu i Hosi ya Savata.”

6   Kutani hi dzrin’wana Savata, anhingena asinagogeni asungula kudondzrisa. Kutani aku ni mun’we wanuna lweyi aakhwanyale voko dzra xinene.

7   Kutani vatsrali ni vafarisi vamulavisisa svinene, na vajula kuvona lesvaku atahanyisa mhunu hi Savata kumbe ihina, akuva vatakuma xa kumuzrwexa nandzru ha xone.

8   Kambe yene aayitiva miyanakanyu yavu. Xilesvo abzela wanuna lwewa voko dzra kukhwanyala, aku: “Sekeleka utatayima la makazri.” Kutani asekeleka ayima kone.

9   Yesu agama aku ka vone: “Nivutisa lesvi ka n’wine: ‘Xana hi Savata, svapfumeleliwa kuyenca sva svinene kumbe sva kubiha; kuhuluxa hika kumbe kudzridlaya kee?”

10   Kutani andzruluka matlhelo hinkwawu avalavisa, agama aku ka lweyo wanuna: “Nalavuta voko dzraku.” Adzrinalavuta, kutani voko dzritlhela dzrihanya.

11   Kambe vatala hi mahlundzru, vasungula kukombisana lesvaku vangamuyenca yini Yesu.

12   Kate hi dzrin’we dzra masiku, ahuma aya anhaveni ayakhongota; aheta wusiku hinkwabzu na akhongota ka Xikwembu.

13   Bzitiki bzaxa, avitana vadondzrisiwa vake vata ka yene, ahlawula 12 amakazri kwavu, lava angatlhela avavitana vapostola:

14   Simoni, lweyi atlhelaka avitaniwa Petrosi, Andreye, makwa Petrosi, Jakobe, Johani, Filipi, Bartolomewu,

15   Matewu, Tomasi, Jakobe n’wana Alfewu, Simoni, lwachuliwaka “Muhiseki”,

16   Juda n’wana Jakobe, na Juda Iskariyota, lwangagama amudlayisa.

17   Lesvi agamiki afulamela navu ayima ambangwini wa livala. Kutani aku ni xitsrhungu lexikulu xa vadondzrisiwa vake, ni xitsrhungu lexikulu xa vhanu lavapfaka hi le tikweni hinkwadzru dzra Judeya ni le Jerusalema, ni le mugangeni wa tlhelo dzra lwandle wa le Tire na Sidoni, lava avatela kutamuyingela ni kudahiwa mavabzi yavu.

18   Nhambi lava avahluphiwa hi mimoya leyinyamiki avahanyisiwa.

19   Nakone xitsrhungu hinkwaxu axijula kumukhumba, hikusa akuhuma ntamu ka yene wuvahanyisa hinkwavu.

20   Kutani atlakuxa nhloko alavisa vadondzrisiwa vake, aku: “Nyonxani kwenu n’wine svisiwana, hikusa Mfumu wa Xikwembu i wenu!”

21   “Nyonxani kwenu n’wine minga ni ndlala svosvi, hikusa mitaxuzrisiwa! “Nyonxani kwenu n’wine lavadzrilaka svosvi, hikusa mitahleka!

22   “Nyonxani kwenu loko vhanu vamivenga, ni loko vamihlongola, vamizruka, vatlhela vaminchimisa vito ingi hi loko mova vabihi hi mhaka ya N’wana wa Mhunu!

23   Nyonxani asikwini ledzro, mitlulatlula hi kunyonxa, hikusa hakelo dzrenu i dzrikulu atilweni; hikuva hi svosvosvo vatatana vavu avayenca vaprofeta.

24   “Kambe khombo dzrenu n’wine svigogo, hikusa svosvi mikuma kuchaveleliwa kwenu.

25   “Khombo dzrenu n’wine lavaxuzraka svosvi, hikusa mitafa hi ndlala. Khombo dzrenu n’wine mihlekaka svosvi, hikusa mitadzrila miba ni tihuwana.

26   “Khombo dzrenu loko vhanu hinkwavu vakhanela lesvinene hi n’wine, hikusa hi svosvosvo vatatana vavu avayenca vaprofeta va madzrimi.

27   “Kambe nili ka n’wine miyingisetaka: Zrandzrani valala venu, miyencela lesvinene lavamivengaka,

28   minavelela tinjombo lavamizrukaka, mikombelela lavamiyencelaka wubihi.

29   Lweyi akubaka mpama ka zrama dzrin’we, munyikete ni ledzrin’wana; ni lweyi akuwutlelaka mujasi, ungamuyaleli ni wo nkhancu.

30   Nyika mun’wana ni mun’wana lweyi akukombelaka; ni lweyi akuwutlelaka svaku, ungamulondzri.

31   “Nakone, lesvi minavelaka lesvaku vhanu van’wana vamiyencela svone, na n’wine vayencelani svosvo.

32   “Kutani loko mizrandzra lavamizrandzraka, mingakhensiwa hi mani kee? Hikusa nhambi vadohi vavazrandzra vanghanu vavu.

33   Nakone, loko miyencela lesvinene lavamiyencelaka lesvinene, mingakhensiwa hi mani? Nhambi vadohi vayenca svolesvo.

34   Nakone, loko miceneka vhanu lava misvitivaka lesvaku vatamitlhelisela mali yenu, mingakhensiwa hi mani? Nambi vadohi vacenekana hi xivone hi kutiva lesvaku vatatlhela vayikuma mali yavu hinkwayu.

35   Kambe, n’wine zrandzrani valala venu, miyenca lesvinene mitlhela micenekisa na mingayimeli kutlheliseliwa nchumu; kutani hakelo dzrenu dzritava dzrikulu, nakone mitava vana va Lwanga Henhlahenhla, hikusa i munene ka lavangakhensikiki ni lava kubiha.

36   Vanani ni timpsalu, svanga hesvi Tatana wenu anga ni timpsalu.

37   “Nakone, mingayavanyisi, akuva mingatichuka miyavanyisiwa; mingatsremeli van’wana xikhatiso, akuva mingatichuka mitsremeliwa xikhatiso. Dzrivalelani, akuva mitadzrivaleliwa.

38   Hananani, akuva mitahananiwa. Lomu maphakithini ya svifuva svenu, vatamichelela mpimu lowunene, lowudlimbeteliwiki, wuhlukuhletiwa wutlhela wuhalakela. Hikusa mpimu lowu mipimaka ha wone, na n’wine vatamipima ha wone.”

39   Agama avahambela xifaniso, aku: “Xana mhunu lwangavonikiki angasvikota kufambisa mhunu mumbeni lwangavonikiki? Ihina, hi wubidzri bzavu vatawela xikheleni!

40   Mudondzrisiwa angamutluli mudondzrisi wake, kambe mani na mani lwawupfisiwiki ha hombe atafana ni mudondzrisi wake.

41   Kutani ke, ulavisela yini xilavi lexinga tihlweni dzra makwenu kambe uhluleka kuvona ntsrandzra lowunga tihlweni dzraku?

42   Ungamubzelisa kuyini makwenu, uku: ‘Makwezru, yima nikususa xilavi lexinga tihlweni dzraku’, nakuve awuwuvoni ntsrandzra lowunga tihlweni dzraku? Mukanganyisi! Zranga ususa ntsrandzra atihlweni dzraku, kutani hi kone utakavona ha hombe lesvaku utaxisusisa kuyini xilavi lexinga tihlweni dzra makwenu.

43   “Hikusa aku na nsinya wa kunandzrika lowupsalaka mihandzru ya kubava, nakone aku na nsinya wa kubava lowupsalaka mihandzru ya kunandzrika.

44   Hikusa nsinya wun’wana ni wun’wana wutiviwa hi mihandzru ya wone. Hikusa makuwa amakhayiwi ka mitwa; nhambi mavhinya amakhayiwi ka minsinya ya svitlhavana.

45   Mhunu lwenene ahumexa lesvinene ka wukosi lebzinene bza mbilu yake, kambe mhunu wa kubiha ahumexa lesvibihiki awukosini bzake bza kubiha; hikusa nomu wuvulavula lesvi mbilu ya mhunu yitaliki ha svone.

46   “Kutani ke, minivitanela yini, miku: ‘Hosi! Hosi!’, nakuve amiyenci lesvi nihlayaka svone?

47   Mun’wana ni mun’wana lwabuyaka ayingela mazritu yanga agama amayenca, nitamikomba lweyi afanaka naye:

48   Afana ni mhunu, lweyi loko ayaka yindlu, akeliki hansi kuyenta svinene ava abeka masungulu ahenhla ka zribze. Kutani, loko kubuya ndhambhi, nambu wuba yindlu leyo kambe wungasvikoti kuyiwisa, hikusa ayiyakiwe ha hombe.

49   Kambe mun’wana ni mun’wana lweyi ayingelaka agama angayenci nchumu afana ni mhunu lweyi ayakiki yindlu ahenhla ka sava na angayikelelanga masungulu. Nambu wuyiba, yitekela kuhohloka, kutani mahohlokela ya yindlu ya kone mava makulu svinene.”