BRN

1   Kateloko ahete kudondzrisa vhanu timhaka leto, anhingena Kapernawume.

2   Kutani aku ni mun’we wa muzrangeli wa masocha lweyi aavabzeliwa ngopfu hi nandzra wake, lakakuva akesala kutsrongo akuva afa.

3   Loko ayingele ta Yesu, azruma van’we va vakulu va vajuda vayamukombela kuyadaha nandzra wake.

4   Kutani vayela Yesu vayamukombela hi mbilu hinkwayu, vaku: “Awafaneliwa hi kumuyencela lesvo,

5   hikusa azrandzra tiko dzrezru nakone hi yene angahiyakela sinagoga.”

6   Kutani Yesu afamba navu. Kambe loko ali kusuhi ni muti wa kone, akuma lesvaku lwewa muzrangeli wa masocha aazrumele vanghanu vake akuva vamubzela lesvi: “Hosi, ungatikazrati, hikusa anifaneliwi hi kuva wene unhingena hansi ka lwangu dzranga.

7   Xisvosvo anitivonanga na nifaneliwa hi kukutlhangaveta. Kambe hlaya zritu ntsena, kutani nandzra wanga atahanya.

8   Hikusa na mine nibekiwe hansi ka wuhosi, funtsrhi ni ni masocha manga hansi ka wuhosi bzanga, kutani nibzela ledzri, niku: ‘Famba!’, dzriva dzrifamba, ni dzrin’wana niku: ‘Hinga buya!’, kutani dzribuya; ni ye nandzra wanga, niku ‘Yenca lesvi!’, kutani asviyenca.”

9   Loko Yesu asviyingela, amuhlamala, agama andzruluka abzela xitsrhungu lexi aximulandzra, aku: “Nimibzela lesvi: Nhambi le Yisrayele anikumanga lipfumelo dzra kukulisa xilesvi.”

10   Kutani loko lava avazrumiwile vatlhelela akaya, vayakuma nandzra na ali ntomi.

11   Kutani antsrhakunyana ka svosvo, ayendzrela doropa ledzrivitaniwaka Nayini, afamba na aheleketiwa hi vadondzrisiwa vake ni xitsrhungu lexikulu.

12   Ate atlhasa kusuhi ni nyangwa ya doropa, ohatlana na kupingiwa mufi ahumexiwa handle, lweyi aali n’wana wa mun’we ka mamana wake nakuve lwewa mamana aafeliwe hi nuna. Aku ni xitsrhungu xa kuhlawa xa doropa ledzro lexi aximuheleketa.

13   Loko Hosi yivona lweyo wansati, yimutwela wusiwana, yiku ka yene: “Ungadzrili.”

14   Kutani yitsrhindzrekela yikhumba nkaxa, kutani lava avawupakatsrile vayima. Yigama yiku: “Wene wa jaha, nili ka wene: Pfuka!”

15   Mufi apfuka atsrhama ava asungula kuvulavula, kutani Yesu amunyiketa ka mamana wake.

16   Kutani hinkwavu vakhomiwa hi kuchava, vasungula kudzrumisa Xikwembu, vaku: “Kupfuxiwe muprofeta lwenkulu amakazri kwezru!” Vatlhela vaku: “Xikwembu xilanguse vhanu va xone!”

17   Kutani ndhuma yake yihangalaka Judeya hinkwaku ni le mugangeni hinkwawu wa le kusuhi.

18   Kutani vadondzrisiwa va Johani vamudzrungulela timhaka leti hinkwatu.

19   Kutani Johani avitana vabidzri va vadondzrisiwa vake, avazruma ka Hosi kuyavutisa lesvi: “Xana hi wene lwataka, kumbe hifanela kuyimela mun’wana?”

20   Kuteloko vamuyelile, vavanuna lavo vatlhasa vaku: “Johani Mubabatisi ahizrume kutatavutisa lesvi: ‘Xana hi wene lwataka, kumbe hifanela kuyimela mun’wana?’”

21   Hi nkama wolowo ahanyisa vhanu va kutala lava ava ni mavabzi, ni svivavu sva kuchavisa ni mimoya ya kubiha, atlhela apfula matihlo ya lavangavonikiki.

22   Kutani Yesu avayangula, aku: “Tlhelani miyadzrungulela Johani lesvi misvivoniki ni kusviyingela: Lavangavonikiki kutani vavona, lava kukhuta kutani vafamba, lava nhlokonho kutani vabasisiwa, lava kukala vangayingeli kutani vayingela, ni vafi kutani vapfuxiwa kufeni, nakone svisiwana svibzeliwa madzrungula lamanene.

23   Nakone nyonxani ka lweyi akalaka angakhunguvanyeki ha mine!”

24   Kutani loko vazrumiwa va Johani vafambile, asungula kuvulavula ni svitsrhungu ha Johani, aku: “Xana mihume miyavona yini amananga? Kuyavona lihlanga na dzritsrekatsrekisiwa hi moya?

25   Kutani ke, i yini lesvi mihumiki miyasvivona? Kuyavona mhunu wa kuyambala timpahla ta kudula? Phela, lavayambalaka timpahla ta kudula ni lavatikholisaka siku ni siku vatsrhama atindlwini ta wuhosi.

26   Kutani ke, i yini lesvi mihumiki miyasvivona? Kuyavona muprofeta? Nimibzela lesvaku ina; nakone miyevona ni sva kutlula muprofeta.

27   Hi yelweyi kutsraliwiki ha yene lesvi: ‘Lavisa, nikuzrumelela muzrumiwa wanga amahlweni kwaku, lwatakakululamisela ndlela amahlweni kwaku.

28   Nimibzela lesvi: Amakazri ka lavapsaliwiki hi wansati, aku na mhunu lwatlulaka Johani hi wukulu; ovaku lwentsrongo amfun’wini wa Xikwembu i nkulu kutlula yene.”

29   (Kutani vhanu hinkwavu ni vahakelisi va tinemba lavayingeliki lesvo, avaku Xikwembu xilulamile, hikusa avababatisiwe hi babatiso dzra Johani.

30   Kambe vafarisi ni tintivi ta nawu avange na mhaka ni lesvi Xikwembu axisvijula ka vone, hikusa avangababatisiwanga ha yene.)

31   “Xisvosvo, xana nitavafanisa na yini vhanu va nguva leyi? Vafana na mani?

32   Vafana ni svivanana lesvitsrhamaka abazara svitlanga hi kuvitanana, sviku: ‘Himichayele ximpompompo, kambe amikinanga; hidzrilile, kambe n’wine amibanga nkosi.’

33   Hi ndlela leyifanaka, Johani Mubabatisi abuyile, angadi svakuda nhambi kunwa vhinyo; kambe mili: ‘A ni demona.’

34   N’wana wa Mhunu atlhasile, ada atlhela anwa; kambe n’wine mili: ‘Hingavonani mhunu wa magolo ni mpopsi, munghanu wa vahakelisi va tinemba ni vadohi!’

35   Nhambitanu, lexikombisaka lesvaku wutlhazri bzilulamile i mihandzru ya bzone hinkwayu.”

36   Kutani mun’we wa vafarisi amukombela kuya akaya kwake ayada naye. Kutani anhingena akaya ka mufarisi lweyo atsrhama tafuleni.

37   Kahangayenceka lesvaku wansati mun’we wa doropa ledzro, lweyi aali mudohi, ayingela lesvaku Yesu ale kudeni akaya ka lwewa Mufarisi. Kutani abuya ni ngwama ya zribze ya mafuzra ya kunun’hwela,

38   atlhasa ayima antsrhaku kwake aminengeni, adzrila, asungula kutsrakamisa minenge ya Yesu hi minyembeti yake, ava ayisula hi misisi ya nhloko yake. Atlhela an’quta minenge ya Yesu hi lizrandzru, ayichela mafuzra ya kunun’hwela.

39   Kutani loko lwewa mufarisi angamuzramba asvivona, aku hi le mbilwini: “Loko mhunu lweyi aali muprofeta, aatasvitiva lesvaku wansati lweyi amukhumbaka i mani ni lesvaku atsrhamise kuyini, hikusa i mudohi.”

40   Kambe Yesu amuyangula, aku: “Simon, nijula kukubzela mhaka ya kukazri.” Aku: “Hlaya, mudondzrisi!”

41   “Aku ni vhanu vabidzri lava ava ni xikweneti ka mucenekisi wa mali; mun’we aa ni xikweneti xa 500 wa madenari, kasi lwemun’wana aa ni xikweneti xa 50.

42   Lesvi avange na xa kumuhakela ha xone, avadzrivalelile hi wubidzri bzavu. Xisvosvo, hi wini ka vone atakamuzrandzra ngopfu?”

43   Simoni ahlamula, aku: “Nipimisa lesvaku hi lweyi angamudzrivalela xikweneti xa xikulu.” Aku ka yene: “Upimise ha hombe.”

44   Agama andzruluka alavisa lwe wansati, aku ka Simoni: “Wamuvona wansati lweyi? Loko ninhingene akaya kwaku, awuninyikanga mati ya kuhlamba minenge. Kambe wansati lweyi atsrakamise minenge yanga hi minyembeti yake atlhela ayisula hi misisi yake.

45   Awunin’qutanga, kambe lwe wansati, kusukela ankama lowu ninhingeniki la ha wone, angatsrhikanga kunin’quta minenge hi lizrandzru.

46   Awunitotanga nhloko hi mafuzra, kambe lwe wansati anitote minenge hi mafuzra.

47   Hi svosvo niliki ka wene: Nhambilesvi svidoho svake svinga svinyingi, svidzrivaleliwile, hikuva azrandzre ngopfu. Kambe lweyi adzrivaleliwiki svidoho svitsrongo, azrandzra katsrongo.”

48   Agama aku ka lwe wansati: “Svidoho svaku svidzrivaleliwile.”

49   Kutani lava avada naye vasungula kukhanela hi xivone, vaku: “I mani mhunu lweyi, lweyi adzrivalelaka ni svidoho?”

50   Kutani aku ka lweyo wansati: “Lipfumelo dzraku dzrikuhuluxile. Tifambele hi kuzrula.”