BRN

1   Kutani antsrhakunyana ka lesvo, ayendzra hi doropa ni doropa ni xidoropana ni xidoropana, afamba azrezra madzrungula lamanene ya Mfumu wa Xikwembu. Nakone lava 12 avali naye,

2   kupatsra ni vavasati va kukazri lava avasusiwe mimoya ya kubiha ni mavabzi, anga Mariya lweyi aavitaniwa Madalena, lweyi akuhume 7 wa mademona ka yene;

3   Jowana, nsati wa Chuza, mutameli wa muti wa Heroda; Suzana; ni van’wana vavasati va kutala, lava avavatizrela hi minchumu ya ka kwavu.

4   Kuteloko kuhlengeletanile xitsrhungu xa xikulu ni vhanu lava avahumetela hi le madoropeni vamubuyela, avulavula hi svifananiso, aku:

5   “Mubzali ahume ayabzala mbewu yake. Kutani ankama lowu abzalaka, yin’we mbewu yiwela andleleni kutani yikandzreteliwa, ni tinyanyana ta tilo tiyida.

6   Kutani yin’wana yiwela amazribzeni, kutani loko yiku yamila, yibuna hi kupfumala ntsrhongo.

7   Yin’wana yiwela makazri ka mitwa, kutani mitwa leyikuliki na yone yiyikamalata yifa.

8   Kambe yin’wana yiwela amisaveni leyinene, kutani loko yimilile, yipsala mihandzru ka 100.” Loko aheta kuhlaya lesvi, atlakuxa zritu, aku: “Lweyi anga ni tindleve ta kuyingela aayingele.”

9   Kutani vadondzrisiwa vake vamuvutisa, vaku: “Xana xifaniso lexi xijula kuhlaya lesvaku yini?”

10   Aku: “N’wine minyikiwe kutwisisa svihundla sva Mfumu wa Xikwembu, kambe ka lavan’wana kutizra svifaniso, kuyencela lesvaku nhambi valanguta, vangavoni, ni loko vasviyingela, vangasvitwisisi.

11   Kutani xifaniso lexo xijula kuhlaya lesvi: Mbewu i zritu dzra Xikwembu.

12   Leyiwelaka andleleni hi lava vayingelaka, kutani Diyavulosi abuya avasusela zritu atimbilwini tavu kuyencela lesvaku vangapfumeli vava vahuluxiwa.

13   Kutani leyiwelaka amazribzeni hi lava loko vayingela zritu, vadzriyamukelaka hi kunyonxa, kambe vangadzimi mitsru. Vapfumela hi nkamanyana ntsena, kambe loko kutlhasa nkama wa ndzringo, vawa.

14   Kutani leyingawela makazri ka mitwa, hi lava vayingeliki, kambe hi mhaka ya kutsrhama hi kupimisa hi svikazratu sva wutomi, wukosi ni kutikholisa hi wutomi, vakamalateliwa, vangakoti kupsala mihandzru ya kuwupfa.

15   Kasi loko kuli leyiweliki amisaveni leyinene, hi lava loko vayingela zritu hi mbilu ya kuxonga ni ya yinene, vagamaka vadzribekisa vatlhela vapsala mihandzru hi kutiyisela.

16   “Anga kone lweyi loko atlhavike motsre, awufuneketa hi xibza kumbe awubekaka ahansi ka mubede, kambe awubeka ka kuhayeka motsre lesvaku lava vanhingenaka vakota kuvona livaningo.

17   Hikusa aku na nchumu lowufihliwiki lowungetikibekiwa alivaleni, kumbe xihundla ni xin’we lexikalaka xingetitiviwa ni kubekiwa alivaleni.

18   Xisvosvo, tivonelani ka ndlela leyi miyingisetaka ha yone, hikusa kutanyikiwa lweyi anga ni xa kukazri, kambe lweyi angeke na nchumu, nhambi svosvo apimisaka lesvaku a nasvu, atatekeliwa svone.”

19   Kutani mamana wa Yesu ni vamakwavu vamutela, kambe vahluleka kutlhasa lomu aali kone hi mhaka ya xitsrhungu.

20   Kutani van’we vamubzela, vaku: “Mamana waku ni vamakwenu vayime hala handle, vajulaka kuvonana na wene.”

21   Kutani Yesu avayangula, aku: “Mamana wanga ni vamakwezru hi lavayingelaka zritu dzra Xikwembu vatlhela vadzriyenca.”

22   Kate hi dzrin’wana siku, anhingena botini ni vadondzrisiwa vake, aku ka vone: “Ahitluleleni hiya halahaya ka tiva.” Kutani vasungula kufambisa boti.

23   Kambe ankama lowu vafambisaka boti, Yesu akhutsriyela. Kutani kusungula xidzedze xa kuchavisa ativeni, vataleliwa hi mati, vakumeka khombzeni.

24   Kutani vayamupfuxa, vaku: “Mudondzrisi, hafa!” Kutani apfuka akawuka moya ni mavimbi ya mati, svimiyela, kutani kuzrula kukuzwee.

25   Agama aku ka vone: “Kasi lipfumelo dzrenu dzri kwini?” Kambe lesvi avatale hi kuchava ni kuhlamala, vabzelana lesvi: “Kasi hi mani lweyi, lweyi wa kuva nhambi svidzedze ni mati oyenca hi kusvileleta, sviva svimuyingiseta?”

26   Kutani vayatlhasa vayima amugangeni wa vageraseni, lowu awulavisane na Galileya.

27   Loko Yesu akandzretela misava, atlhangavetiwa hi mhunu wa doropa ledzro lweyi aali ni mademona. Ahete nkama wa kuleha na angayambali mpahla, nakone aangatsrhami andlwini, kambe aatsrhama amasizreni.

28   Loko avona Yesu, abandlukana, awa hansi amahlweni kwake, kutani atlakuxa zritu, aku: “Ujula yini kwanga, wene Yesu, N’wana wa Xikwembu xa le Henhlahenhla? Nakukombela, unganixanisi.”

29   (Hikusa Yesu aalelete moya lowunyamiki lesvaku wuhuma ka mhunu lweyo. Minkama ya kutala aanhingeniwe hi moya lowo, kutani vhanu vamutsrimbelela hi machini ni tinghomondho akuva angasuki, kambe athinya hinkwasvu lesvi avamutsrimba ha svone, demona dzrigama dzrimukomba kuya amananga.)

30   Yesu adzrivutisa, aku: “U mani vito?” Dzriku: “Butsrhu”, hikusa aanhingeniwe hi mademona manyingi.

31   Kutani mamukombela lesvaku angamahlongoli amayisa Xidziveni.

32   Aku ni ntlhambi lowukulu wa tinguluve leti atida anhaveni, kutani mademona mamukombela kumapfumelela kuyanhingena ka tinguluve; amapfumelela.

33   Kutani mademona mahuma ka mhunu wa kone mayanhingena ka tinguluve, kutani hinkwatu ka tone titsrutsrumela wugan’wini bza nhava ka kuwela matini, tipela tiveni, tifa hi kunwela mati.

34   Kambe loko vabzisi vavone lesvingayenceka, vatsrutsruma vayadzrungulela vhanu adoropeni ni le ntlhaveni.

35   Kutani vhanu lavo vahuma vatatavona lesviyencekiki. Loko vayela Yesu, vakuma mhunu lweyi mademona mahumiki ka yene na ayambale mpahla, funtsrhi na nhloko yake yitizra ha hombe, na atsrhame hi le kusuhi ni minkondzro ya Yesu; kutani vachava.

36   Kutani lavasvivoniki, vavadzrungulela lesvi mhunu lweyi aa ni mademona ahanyisiwisiki xisvone.

37   Kutani kubuya vhanu va vanyingi hi le mugangeni wa le kusuhi ni vageraseni vakombela akuva Yesu asuka amugangeni wavu, hikuva avakhomiwe hi nchavu lowukulu. Lesvi atlheliki anhingena botini, afamba.

38   Kutani mhunu lweyi mademona mahumiki ka yene amukombela kufamba naye, kambe amutlhelisa, aku:

39   “Muka akaya kwaku, uyadzrungula hinkwasvu lesvi Xikwembu xikuyenceliki svone.” Kutani afamba, ayahuwelela adoropeni hinkwadzru lesvi Yesu angamuyencela svone.

40   Kutani loko Yesu atlhela, xitsrhungu ximuhoyozela, hikusa hinkwavu avamujula hi khale.

41   Kambe hi nkama lowo kotlhasa mun’we wanuna lwavitaniwaka Jayru, lweyi aali muzrangeli wa sinagoga. Awela minkondzrweni ya Yesu asungula kumukombela kufamba naye akaya kwake,

42   hikuva xin’hwanyatana xake, xa kusuhi ni 12 wa malembe, lexi aepsala xone ntsena, axili kusuhi ni kufa. Kutani ankama lowu Yesu afambaka, svitsrhungu svimukamalatela.

43   Kutani aku ni mun’we wansati lweyi aa ni 12 wa malembe na atsrhama hi kuhumela ngati, lweyi vadahi hinkwavu vangahluleka kumudaha.

44   Loko abuya hi ntsrhaku ka Yesu, akhumba wugamu bza nkhancu wake, ngati yake leyi ayitsrhama hi kuhumela yitsrema hi nkama wolowo.

45   Kutani Yesu aku: “Hi mani lwanikhumbiki?” Kambe hinkwavu vaku: “Mine ahi mine.” Kutani Petrosi aku: “N’wahosi, i svitsrhungu lesvinga matlhelweni kwaku svikukamalatelaka.”

46   Kambe Yesu aku: “Ku ni mhunu lwanikhumbiki, hikusa nasvitiva lesvaku kuhume ntamu kwanga.”

47   Loko wansati lweyo asvivona lesvaku vamutsrumbulile, abuya na azruzrumela, awela hansi amahlweni kwake, ahlaya amahlweni ka vhanu hinkwavu leximuyenciki amukhumba ni lesvi adahisiwiki xisvone hi nkama wolowo.

48   Kambe Yesu aku ka yene: “N’wananga, lipfumelo dzraku dzrikuhanyisile. Famba hi kuzrula.”

49   Ate na ahavulavula, kotlhasa mun’we wa madoda ya muzrangeli wa sinagoga, aku: “N’wanaku afile; ungahamunyiki ntizro Mudondzrisi.”

50   Kambe loko Yesu asviyingelile, amuyangula, aku: “Ungachavi, ntsena vana ni lipfumelo. N’wanaku atahanya.”

51   Loko atlhase akaya ka kone, angatsrhikanga mhunu anhingena handle ka Petrosi, Johani, Jakobe, ni tatana ni mamana wa xin’hwanyatana.

52   Kutani vhanu hinkwavu avali kazri vadzrila, vaba nkosi hi mhaka ya n’wana lweyo. Kutani aku: “Mingadzrili, hikusa angafanga kambe eyetlela.”

53   Kutani vamuhleka, hikuva avasvitiva lesvaku n’wana lwiya aafile.

54   Kambe amukhoma hi voko, amuvitana, aku: “Wene wa ntsrongwana, pfuka!”

55   Kutani moya wake wutlhela, apfuka hi nkama wolowo. Yesu avazruma kumunyika svakuda.

56   Kutani vapsele va lwewa n’hwanyana vangahatikoti hi kunyonxa, kambe avaleleta lesvaku vangabzeli mhunu lesviyencekiki.