BRN

1   Kutani atlhanganisa lava 12 ambangu mun’we, avanyika ntamu ni wusvikoti bza kuhlongola mademona hinkwawu ni kudaha mavabzi.

2   Kutani avazruma kufamba vayazrezra Mfumu wa Xikwembu ni kudaha vhanu,

3   aku ka vone: “Mingateki nchumu wa kuwutizrisa liyendzrweni, nhambi nhonga nhambi nkwama wa svakuda kumbe mapawu kumbe mali; nhambi minkhancu yibidzri.

4   Kambe tsrhamani ka yindlu yin’wana ni yin’wana leyi mitakanhingena ka yone, miva misukela ka yone.

5   Kutani kwini na kwini lomu vhanu vangamiyamukelikiki kone, loko mihuma adoropeni ledzro, phumunani ntsrhuzri aminkondzrweni yenu, bzitava wumboni bza lesvaku vayalile.”

6   Kutani vasuka vafamba hi xidoropana xin’wana ni xin’wana, na vazrezra madzrungula lamanene vava vadaha vhanu amimbangwini hinkwayu.

7   Kutani loko ayingela minchumu hinkwayu leyi ayiyenceka, Heroda, muzrangeli wa xifundzra, ahlamala ngopfu svinene hikuva van’we avaku Johani apfuxiwe kufeni,

8   kambe van’wana avaku i Eliya ahumeleliki, kasi vambenyana avaku kupfuke mun’we wa vaprofeta va khale.

9   Kutani Heroda aku: “Johani nimutsreme nhloko. Kutani ke, i mani lweyi niyingelaka minchumu leyi vhanu vayihlayaka ha yene?” Kutani ajuletela ndlela ya kumuvona.

10   Loko vapostola vatlhelile, vadzrungulela Yesu hinkwasvu lesvi vasviyenciki. Agama avateka asuka navu hi tlhelo avayisa adoropeni ledzrivitaniwaka Betsayda.

11   Kambe loko svitsrhungu svisvitivile, svimulandzra. Kutani asviyamukela hi wumbilu asungula kukhanela nasvu hi Mfumu wa Xikwembu, adaha lava avavilela kudahiwa.

12   Kutani dambu adzrijula kupela. Kutani lava 12 vamuyela, vaku: “Lelela vhanu lava vatakota kunhingena asvidoropaneni sva le kusuhi ni le handle ka madoropa akuva vakuma ka kuyetlela kone ni svakuda, hikuva lomu hinga kone i mananga.”

13   Kambe aku ka vone: “Vanyikani n’wine svakuda.” Vaku: “Ahi na nchumu handle ka ntlhanu wa mapawu ni tinhlampfi tibidzri; loko svinge tanu, svitajula hifamba ha wusvezru hiyaxavela svakuda vhanu lava hinkwavu.”

14   Hikusa aku ni kusuhi ni 5.000 wa vavanuna. Kutani aku ka vadondzrisiwa vake: “Vatsrhamisisani hi mintlawa ya kujula kutlhasa ka 50.”

15   Kutani vayenca tanu, vatsrhamisisa vhanu hinkwavu.

16   Kuteloko ateke ntlhanu wa mapawu ni tinhlampfi letibidzri, alangusa atilweni asvikatekisa. Agama asvikhemelela asvinyiketa vadondzrisiwa akuva vaphakela xitsrhungu.

17   Kutani hinkwavu vada vaxuzra, vateka matlhantlha lamangasala, svihamba 12 wa mintsrhava.

18   Ankama lowu aali kukhongoteni na ali wusvake, vadondzrisiwa vamuyela. Kutani avavutisa, aku: “Xana svitsrhungu svili ni mani?”

19   Vamuhlamula, vaku: “Johani Mubabatisi, kambe van’wana vali Eliya, kasi vambenyana vali kupfuke mun’we wa vaprofeta va khale.”

20   Agama aku ka vone “N’wine ke, mili ni mani?” Petrosi ahlamula aku: “Kriste wa Xikwembu!”

21   Kutani avabasopisa svinene, avaleleta lesvaku vangabzeli mhunu mhaka leyo,

22   kambe aku: “N’wana wa mhunu afanela kukumana ni tinxanisa tinyingi ava adzreliwa hi vakulu ni vaprista lavakulu ni vatsrali ava adlayiwa, kutani apfuxiwa hi siku dzra wuzrazru.”

23   Kutani abzela vhanu hinkwavu aku: “Loko mhunu ajula kunilandzra, aatitsrhike, azrwala mhandzre yake siku dzrin’wana ni dzrin’wana, anilandzrelela.

24   Hikusa lweyi ajulaka kuhuluxa wutomi bzake atabziluza, kambe lweyi aluzaka wutomi bzake hi mhaka yanga atabzihuluxa.

25   Hikusa, svitasiza yini loko mhunu akuma misava hinkwayu kambe aluza wutomi bzake kumbe akumiwa hi khombo?

26   Hikusa lweyi adanaka ha mine ni mazritu yanga, N’wana wa Mhunu atadana ha yene loko abuya akuphatimeni kwake ni ka Tatana ni ka tintsrumi leta kuxwenga.

27   Kambe nimibzela ntiyiso, nili: Ku ni van’we va lavayimiki lani lava vangetikidzringa lifu ni kutsrongo na vangesizranga hi kuvona Mfumu wa Xikwembu.”

28   Kutani antsrhaku ka loko ahlaye mazritu lawo, loko kukhalute kusuhi ni 8 wa masiku, ateka Petrosi, Johani na Jakobe atlhantuka nhava na vone, ayakhongota.

29   Kuteloko ahakhongota, mavonekela ya wuso bzake macinca ni sviyambalu svake sviphatima svikumpaa.

30   Kutani kuhumelela vavanuna vabidzri vasungula kubula naye; avali Moxe na Eliya.

31   Vahumelela hi kuphatima, vakhanela hi lifu dzrake ledzri aafanela kudzrikuma le Jerusalema.

32   Kutani Petrosi ni lava avali naye avabindzriwa hi wuzrongo, kambe loko vapfuke wuzrongweni, vavone kuphatima kwake ni vavanuna lavabidzri na vayime naye.

33   Kutani ankama lowu vasukaka vamusiya, Petrosi aku ka Yesu: “Mudondzrisi, i svinene kuva hiva lani. Xilesvo, ahidzimeni matende mazrazru, dzrin’we dzritava dzraku, dzrin’we dzra Moxe ni dzrin’we dzra Eliya.” Kambe ni lesvi aahlaya svone aangasvitivi.

34   Kambe ate na ahahlaya lesvo, kohumelela tlavi dzrivafuneketa. Vachava loko vanhingena atlavini.

35   Kutani kuhumelela zritu atlavini, dzriku: “Lweyi i N’wananga, lweyi nimuhlawuliki. Muyingisetani.”

36   Loko kutwale zritu dzra kone, Yesu akumeka wusvake. Kambe vamiyela vangabzeli mhunu amasikwini lawo lesvi vasvivoniki.

37   Hi siku ledzrilandzrelaka, loko vaxika anhaveni, xitsrhungu lexikulu ximutlhangaveta.

38   Kutani kuhumelela mun’we wanuna amakazri ka xitsrhungu, aku: “Mudondzrisi, nakukhongota, vona n’wananga, hikuva nepsala yene ntsena.

39   Kutani sviyenca lesvi: Kutlhasa moya wa kukazri wumukhoma, kolanu asungula kuba nyandha; wumuyenca achukuvanya, atlhutlha duvi hi nomu, wugama wumutsrhiketa hi nkanu na wumuvavisile.

40   Nikombele vadondzrisiwa vaku kuwuhlongola, kambe vahlulekile.”

41   Kutani Yesu ahlamula, aku: “N’wine lixaka dzra kusomboloka, dzra kupfumala lipfumelo, xana nitamihanyela kuyatlhasa siku muni? Buyisa n’wanaku halenu.”

42   Kambe ankama lowu ange awatsrhindzrekela, demona dzrimucukumetela hansi, dzrimuchukuvanyisa hi ntamu svinene. Kambe Yesu akawuka moya lowo lowunyamiki, adaha mupfana lweyo, amutlhelisa ka tatana wake.

43   Kutani hinkwavu vahlamalisiwa hi ntamu lowukulu wa Xikwembu. Na hinkwavu vahahlamala hi hinkwasvu lesvi aasviyenca, aku ka vadondzrisiwa vake:

44   “Yingisetani ha hombe mazritu lawa, hikusa N’wana wa Mhunu atanyiketiwa amavokweni ya vhanu.”

45   Kambe avasvitwisisanga lesvi aahlaya svone. Nakunene, mhaka leyo avafihleliwe yone akuva vangayitwisisi, nakone avachava kumuvutisa lesvaku aajula kuhlaya yini.

46   Kutani vasungula kuholovisana hi mhaka ya lesvaku i mani ka vone lweyi aali lwenkulu ka vone hinkwavu.

47   Kambe loko Yesu ative lesvi avasvipimisa atimbilwini tavu, ateka xin’wanana, axiyimisa atlhelweni kwake,

48   aku ka vone: “Lweyi ayamukelaka xin’wanana lexi hi vito dzranga na mine awaniyamukela; nakone lweyi aniyamukelaka ayamukela ni Lweyi anizrumiki. Hikusa lwentsrongo amakazri kwenu hinkwenu hi yene atakava lwenkulu.”

49   Kutani Johani ayangula, aku: “Mudondzrisi, hivone mhunu na ahlongola mademona hi vito dzraku, kutani himutsimbisile hikusa angafambifambi na hine.”

50   Kambe Yesu aku ka yene: “Mingamutsimbisi, hikusa lweyi akalaka angamikaneti ayima na n’wine.”

51   Kutani loko masiku ya kuntlhantuka kwake maya mahela, svimubzela kuya le Jerusalema.

52   Kutani azruma vazrumiwa vapfa vazranga. Kuteloko vafambile, vayanhingena axidoropaneni xa vasamariya akuva vamubekisela kone.

53   Kambe avamuyamukelanga hikusa aajula kuya Jerusalema.

54   Kutani loko vadondzrisiwa Jakobe na Johani vavone lesvo, vaku: “Hosi, wasvijula hivitana ndzrilo wuxika hi le tilweni wuvadlaya?”

55   Kambe andzruluka avakawuka.

56   Vagama vaya ka xidoropana ximbeni.

57   Kuteloko vafamba ndleleni, kuhumelela mhunu aku ka yene: “Nitakulandzra kwini na kwini lomu uyaka kone.”

58   Kambe Yesu aku ka yene: “Mabuwana ma ni mimpala, ni tinyanyana ta tilo ti ni svisaka, kambe n’wana wa mhunu anga na ka kudama kone nhloko.”

59   Agama abzela mun’wana, aku: “Nilandzre.” Lweyo wanuna aku: “Hosi, nitsrhike nizranga hi kuyalahla tatana wanga.”

60   Kambe aku ka yene: “Tsrhika vafi valahla vafi vavu, kambe wene famba uyatwalisa Mfumu wa Xikwembu.”

61   Kutani kutlhela kuta mun’wana, aku: “Nitakulandzra, Hosi, kambe kusungula nitsrhike niyalelela va le kaya kwanga.”

62   Yesu aku ka yene: “Aku na mhunu lwakhomiki gejo agama alavisa sva le ntsrhaku afaneliwaka hi Mfumu wa Xikwembu.”