BRN

1   Kusungula ka madzrungula lamanene ya Yesu Kriste, N’wana wa Xikwembu:

2   Svanga hesvi svitsraliwiki ha kone abukwini dzra muprofeta Ezaya, aku: “Lavisani! Nizrumela muzrumiwa wanga amahlweni kwenu, lwe atakamilulamisela ndlela.

3   Ku ni zritu dzra lwe abandlukanaka le mananga, aku: ‘Lulamiselani ndlela ya Jehovha! Yencani svitaratu svake svilulama.’”

4   Kuhumelele Johani Mubabatisi amananga, azrera babatiso dzra kutisola akuva vhanu vadzrivaleliwa svidoho.

5   Kutani tiko hinkwadzru dzra Judeya ni hinkwavu va Jerusalema avahuma vaya ka yene; avababatisa anambzeni wa Jordani, na vatihlaya svidoho svavu alivaleni.

6   Kutani Johani aayambala mpahla ya voya bza kamele, atsrimba bandhi dzra xikhumba amasengeni, ada mintete ni wulombe bza tinyonxi bza nhova.

7   Kutani aazrezra, aku: “Lwe anitlulaka hi ntamu awata antsrhaku kwanga, lweyi nhambi ngoti ya masandhazi yake nikalaka ningafaneli kukazrama niyitlhantlha.

8   Mine nimibabatisa hi mati, kambe yene atamibabatisa hi moya wa kuxwenga.”

9   Kutani amasikwini lawo, Yesu ata hi le Nazareta wa Galileya, ababatisiwa le Jordani hi Johani.

10   Ate na atlhantuka ahuma amatini hi kukahlula, ovona matilo na mayaviwa, kutani kuxika moya ahenhla kwake, svanga tuva.

11   Kutani kuhuma zritu hi le matilweni, dzriku: “Wene u N’wananga lwazrandzriwaka; nanyonxa ha wene!”

12   Kutani moya wutekela kumususumetela kuya mananga.

13   Kutani atsrhama amananga kudzringana 40 wa masiku, na adzringiwa hi Sathana. Aatsrhama ni svihazri sva nhova, kambe tintsrumi atimupfunisa.

14   Kutani antsrhaku ka kukhomiwa ka Johani, Yesu anhingena Galileya, azrezra madzrungula lamanene ya Xikwembu,

15   aku: “Nkama wuhetisekile, kutani Mfumu wa Xikwembu wutsrhindzrekelile. Tisolani, mipfumela ka madzrungula lamanene.”

16   Ate na afamba atlhelweni ka Lwandle dzra Galileya, ovona Simoni ni makwavu Andreye, na vacukumetela minkukutu yavu alwandle, hikusa avali vaphasi va tinhlampfi.

17   Kutani Yesu aku ka vone: “Nilandzrani, nitamiyenca vaphasi va vhanu.”

18   Kutani vatekela kutsrhika minkukutu yavu, vamulandzra.

19   Ate afambanyana, ovona Jakobe, n’wana Zebedewu, ni makwavu Johani, na vali botini dzravu, valunghisa minkukutu yavu,

20   kutani akahlula avavitana. Kutani vasiya tatana wavu Zebedewu abotini ni vatizri, vafamba naye, vamulandzra.

21   Lesvi vanhingeniki Kapernawume. Kutani, hi Savata, atekela kunhingena asinagogeni, asungula kudondzrisa.

22   Kutani vahlamala hi madondzrisela yake, hikusa aavadondzrisa svanga mhunu lweyi anga ni wuhosi, angafani ni vatsrali.

23   Ankameni wolowo aku ni wanuna asinagogeni dzravu lweyi aa ni moya lowunyamiki. Kutani a bandlukana, aku:

24   “Hikuhonele yini, Yesu, Munazareta? Ubuya uhihelisa kee? Nasvitiva lesvaku u mani, Muxwengi wa Xikwembu!”

25   Kambe Yesu awukawuka, aku: “Miyela, uhuma ka yene!”

26   Kutani moya lowunyamiki wuzruzrumelisa mhunu lweyo, wubandlukana hi zritu ledzrikulu, wugama wuhuma ka yene.

27   Kutani hinkwavu vahlamala ngopfu lakakuva vasungula kudokadokisana hi xivone, vaku: “Xa ke dondzro leyi leyimpsha i yini? Hikusa nhambi mimoya leyinyamiki, ayileleta kufana ni hosi, yimuyingiseta.”

28   Kutani ndhuma yake yihangalaka hi kukahlula matlhelo hinkwawu ya muganga wa Galileya.

29   Kolanu vasuka asinagogeni vaya akaya ka Simoni na Andreye, na va li na Jakobe na Johani.

30   Mamana wa nkata Simoni aayetlelile na avabza hi kuhiseta ka mizri, kutani vatekela kumudzrungulela ndzrava yake.

31   Lesvi amunhingeneliki, amukhoma hi voko, amupfuxa. Kuhiseta ka mizri kusuka ka yene, kutani asungula kuvayencela lesvi ni lesviyani.

32   Amadambzeni, loko dambu dzripelile, vhanu vasungula kumubuyisela hinkwavu lava avavabza ni lava ava ni mademona;

33   kutani doropa hinkwadzru dzritlhangana anyangweni.

34   Kutani adaha vanyingi lava avavabza hi mavabzi ya kusiyanasiyana, ava ahlongola mademona manyingi, kambe mademona aangamatsrhiki makhanela, hikusa amasvitiva lesvaku i Kriste.

35   Kutani ampundzrwini, na kahamphumile, apfuka ahuma ahandle, aya ka mbangu wa mananga, asungula kukhongota kone.

36   Kambe Simoni ni lava avali naye vafamba vamujuletela.

37   Kutani loko vamukumile, vaku ka yene: “Hinkwavu vakujuletela.”

38   Kambe aku ka vone: “Ahiyeneni kun’wana, ka madoropa lamanga kusuhi, akuva niyazrezra ni le ka wone, hikusa nitele svolesvo.”

39   Kutani afamba, ayazrezra amasinagoneni yavu atikweni hinkwadzru dzra Galileya na ahlongola ni mademona.

40   Kutani abuyeliwa hi mhunu wa nhlokonho, amukombela na akhinsamile, aku ka yene: “Loko usvijula, unganibasisa.”

41   Kutani amutwela wusiwana, analavuta voko amukhumba, aku ka yene: “Nasvijula! Basisiwa.”

42   Kolanu nhlokonho yinyamalala ka yene, abasa.

43   Kutani amunyika svileleto agama atekela kumumukisa,

44   aku ka yene: “Tivonele lesvaku ungabzeli mhunu nchumu, kambe famba uyatikombisa ka muprista, uhumexa magandzrelo ya kubasisiwa kwaku lamaleletiwiki hi Moxe, akuva bziva wumboni ka vone.”

45   Kambe loko mhunu lweyo asukile, asungula kuhuwelela hi ntamu ni kuhangalasa mhaka ya kone hala ni hala, lakakuva Yesu aangahasvikoti kunhingena adoropeni na avoniwa. Kambe ayetsrhama handle, ka mimbangu ya mananga, kutani vhanu vamubuyela hi matlhelo hinkwawu.