BRN

1   Kuteloko asuke kone, anhingena mindzrilakaneni ya Judeya ka kukhaluta Jordani; svitsrhungu svitlhela svihlengeletana ka yene. Kutani, tanihi lani aatolovele ha kone, asungula kusvidondzrisa.

2   Kutani vafarisi vamutsrhindzrekelela, vamuvutisa lesvaku nawu wapfumela kuva nuna atsrhika nsati kumbe ihina, na vayencela kumudzringa.

3   Kambe avahlamula, aku: “Xana Moxe amilelete lesvaku yini?”

4   Kutani vaku: “Moxe apfumelele kutsrala papela dzra kutimisa wukati, umuhlongola.”

5   Kambe Yesu aku ka vone: “Amitsralele xileleto lexo hi mhaka ya kutlanyala ka timbilu tenu.

6   Kambe kusukela amasungulwini ya ntumbuluku, ‘Xikwembu xivayence wanuna ni wansati.

7   Xilesvo, mhunu atasiya tatana wake ni mamana wake,

8   kutani ha vabidzri vatava nyama yin’we.’ Kutani avahali vabidzri, kambe nyama yin’we.

9   Xisvosvo, lesvi Xikwembu xisvitlhanganisiki, mhunu angasvihambanise!”

10   Ankama lowu vangatlhela vava andlwini, vadondzrisiwa vamuvutisa hi mhaka leyi.

11   Agama aku ka vone: “Mani na mani lwatsrhikaka nsati wake achata ni mumbeni adohela nsati hi wumbuye,

12   nakone loko wansati atsrhikana ni nuna wake agama achata ni mumbeni, ayenca wumbuye.”

13   Kutani vhanu vamubuyisela svivanana akuva asvikhumba, kambe vadondzrisiwa vavatshinya.

14   Loko asvivona, Yesu akwata, aku ka vone: “Tsrhikani svivanana svinibuyela; mingasvitsimbi, hikusa Mfumu wa Xikwembu i wa lavafanaka nasvu.

15   Nihlaya na nitiyisile niku ka n’wine: Mani na mani lwangayamukelikiki Mfumu wa Xikwembu kufana ni xin’wanana angaka anganhingeni ka wone.”

16   Kutani asvitlakula, asvikatekisa, asvitlhanteka mavoko.

17   Aku awasuka, kobuya mhunu hi kutsrutsruma, amukhinsamela, amuvutisa lesvi: “Mudondzrisi Lwenene, xana nifanela kuyenca yini akuva nida pfindla dzra wutomi lebzingahelikiki?”

18   Yesu aku ka yene: “Hayini univitana lwenene? Aku na mhunu anga lwenene handle ka Xikwembu ntsena.

19   Wayitiva minawu leyiliki: ‘Ungadlayi; ungambuyeti; ungayivi; ungafakazeli sva madzrimi; ungakanganyisi; komba xichavu tatana waku ni mamana waku.’”

20   Mhunu lweyo aku ka yene: “Mudondzrisi, nisungule na nahali ntsrongo kulandzra minawu leyi hinkwayu.”

21   Yesu amulavisa, amuzrandzra, agama aku: “Kehesala nchumu wun’we ntsena kuva uwuyenca: Famba uyaxavisa hinkwasvu lesvi unga nasvu, unyika svisiwana, kutani utava ni wukosi atilweni; ugama ubuya unilandzra.”

22   Kambe avaviseka hilesvi angasviyingela; asuka afamba na atlhaveke mbilu, hikusa aa ni minchumu ya yinyingi.

23   Kutani Yesu andzruluka alavisa hala ni hala, agama aku ka vadondzrisiwa vake: “Svitavakazratela njhani lavanga ni timali kunhingena amfun’wini wa Xikwembu!”

24   Kambe vadondzrisiwa vahlamala hi mazritu yake. Kutani Yesu atlhela ayangula, aku: “Vananga, svikazrata njhani kunhingena amfun’wini wa Xikwembu!

25   Svinabzala ngopfu kuva kamele dzrinhingena hi mbhovo ya ximazri kutlula kuva mhunu lwanga xigogo anhingena amfun’wini wa Xikwembu.”

26   Kutani vahlamalisisa, vaku ka yene: “Ke, hi mani lwangahulukaka?”

27   Yesu avalavisisa, aku: “Ka vhanu asvikoteki, kambe ka Xikwembu, asvi tanu, hikusa hinkwasvu svakoteka ka Xikwembu.”

28   Petrosi asungula kukhanela, aku: “Lavisa! Hine hisiye hinkwasvu hi kulandzra.”

29   Yesu aku: “Nihlaya na nitiyisile niku ka n’wine: Anga kone lwasiyiki yindlu, kumbe vamakwavu va xinuna kumbe va xisati, kumbe mamana, kumbe tatana, kumbe vana, kumbe masimu, hi mhaka yanga ni hi mhaka ya madzrungula lamanene,

30   lwatakaka angakumi ka-100 tiyindlu, vamakwavu va xinuna, vamakwavu va xisati, vamamana, vana ni masimu, svosvi ka nkama wolowu—ni kuxanisiwa—ni wutomi lebzingahelikiki, ka misava leyitaka.

31   Kambe vanyingi va lava vanga va kusungula vatava va wugamu, kutani lavanga va wugamu vatava va kusungula.”

32   Lesvi vagamiki vakhoma ndlela, vatlhantukela Jerusalema. Kutani Yesu avazrangela; vadondzrisiwa vatala hi kuhlamala, kasi lava avali ntsrhaku vatala hi kuchava. Atlhela ateka lava 12 hi tlhelo, asungula kuvabzela lesvi asvili kusuhi ni kumuyencekela, aku:

33   “Lavisani! Hitlhantukela Jerusalema, kutani N’wana wa mhunu atanyiketiwa ka vaprista lavakulu ni vatsrali. Vatamutsremela xikhatiso xa lifu vava vamunyiketa amavokweni ya va matiko,

34   kutani lavo vatatlanga ha yene, vamuthukela mazri, vamukwapa, vagama vamudlaya; kambe antsrhaku ka masiku mazrazru atapfuka.”

35   Kutani Jakobe na Johani, vana va Zebedewu, vamutsrhindzrekelela, vaku ka yene: “Mudondzrisi, ahinavela lesvaku uhiyencela lesvi hitakakukombela svone.”

36   Kutani aku ka vone: “Minavela lesvaku nimiyencela yini?”

37   Kutani vaku: “Tsrhika mun’we ka hine atsrhama atlhelweni dzraku dzra xinene, ni lwemun’wana atsrhama atlhelweni dzraku dzra ximatsri, amfun’wini waku lowa kuphatima.”

38   Kambe Yesu aku ka vone: “Amisvitivi lesvi mikombelaka svone. Xana mingasvikota kunwa lesvi nijulaka kusvinwa, kumbe kupela ka babatiso ledzri nijulaka kupela ka dzrone?”

39   Kutani vaku ka yene: “Hingasvikota.” Kutani Yesu aku ka vone: “Lesvi nijulaka kusvinwa, mitasvinwa, ni babatiso ledzri nijulaka kupela ka dzrone, mitapela ka dzrone.

40   Kambe kutsrhama axineneni xanga kumbe aximatsrini xanga, ahi mine ninga ni mfanelo ya kuminyika, kambe i sva lava svibekiseliwiki vone.”

41   Kutani loko lava va 10 vasviyingela, vahlundzrukela Jakobe na Johani.

42   Kambe Yesu avavitana, aku ka vone: “Masvitiva lesvaku lava vankontiwaka lesvaku hi vone vafumaka matiko vamakhonzisa, ni lesvaku lavakulu ka vone vatizrisa ntamu ahenhla kwavu.

43   Kambe svingave tanu amakazri kwenu; kambe lweyi ajulaka kuva nkulu amakazri kwenu afanela kuva mutizreli wenu,

44   nakone lweyi ajulaka kuva wa kusungula amakazri kwenu afanela kuva nandzra wa hinkwavu.

45   Hikusa nhambi N’wana wa mhunu angatelanga kutatatizreliwa, kambe atele kutatatizrela ni kunyikela wutomi bzake akuva ahuluxa lava kutala.”

46   Kutani vatlhasa Jeriko. Kambe loko aku awahuma Jeriko ni vadondzrisiwa vake ni xitsrhungu xa kuhlawa, okuma lesvaku andleleni kutsrhame Bartimewu, n’wana Timewu, lweyi aangavoni nakone aahanya hi kukombela.

47   Loko ayingela lesvaku i Yesu wa Nazareta, asungula kubandlukana, aku: “Yesu, N’wana Davhida, nitwele wusiwana!”

48   Kutani vanyingi vamukawuka, vaku: “Miyela!” Kambe abandlukana hi kutlulisa, aku: “N’wana Davhida, nitwele wusiwana!”

49   Kutani Yesu ayima, aku: “Muvitanani abuya halenu.” Kutani vavitana mhunu lweyo wa kukala angavoni, vaku ka yene: “Tiya nhlana, usekeleka; awakuvitana!”

50   Kutani acukumeta mujansi wake, asekeleka aya ka Yesu.

51   Kutani Yesu amuyangula, aku: “Xana unavela akuva nikuyencela yini?” Lwewa kukala angavoni aku ka yene: “Mudondzrisi, ninavela kutlhela nivona.”

52   Kutani Yesu aku ka yene: “Famba. Lipfumelo dzraku dzrikuhanyisile.” Kutani atekela kutlhela avona, ava asungula kumulandzra andleleni.