BRN

1   Kutani akusale masiku mabidzri akuva kudiwa Paxkwa ni Nkhuvu wa Makati Ya Kuka Svikukumukisu. Kutani vaprista lavakulu ni vatsrali avajuletela ndlela ya kumukhoma hi maqhinga vayamudlaya;

2   hikusa avaku: “Svingave ankhubzini; hikusa vhanu vangachuka vahamba svitereka.”

3   Loko ali Betanya, na alalela akaya ka Simoni, lwewa nhlokonho, kutlhasa mun’we wansati ni ngwama ya kutiyela ya mafuzra ya kunun’hwela ni ya kudula svinene, ya kuhambiwa hi xiluva xa kunandzrika xa le Indya xa kukala xingapatsriwanga na nchumu. Adlaya ngwama, achela mafuzra ya kone anhlokweni ya Yesu.

4   Kutani van’we vangurangura, vaku: “Hayini kutlangiwe hi mafuzra lawa ya kunun’hwela?

5   Hikusa mafuzra lawa ya kunun’hwela inhaka maxavisiwile hi mali ya kutlula 300 wa madenari yiyanyikiwa svisiwana!” Kutani vamusola svinene lwe wansati.

6   Kambe Yesu aku: “Mutsrhikani. Mimuhluphela yini? Aniyencele ntizro wa kuxonga.

7   Hikusa svisiwana mi nasvu minkama hinkwayu, nakone mingasviyencela lesvinene nkama wini na wini misvijulaka, kambe mine ami na mine nkama hinkwawu.

8   Ayence lesvi asvikotiki. Abuye achela mafuzra ya kunun’hwela amizrini wanga na kungesitlhasa xilahlu xanga.

9   Nihlaya na nitiyisile niku ka n’wine: Hinkwaku lomu kutakazrezriwa madzrungula lamanene amisaveni hinkwayu, lesvi lwe wansati angasviyenca svitadzrunguliwa, akuva adzrimukiwa ha svone.”

10   Kutani Juda Iskariyota, mun’we wa lava 12, ahuma ayakhanela ni vaprista lavakulu akuva akota kumunyiketa ka vone.

11   Loko vasviyingela, vanyonxa vava vamudumbisa lesvaku vatamunyika mali. Kutani asungula kujuletela nkama wa hombe wa kumunyiketa.

12   Kutani hi siku dzra kusungula dzra Makati ya Kuka Svikukumukisu, nkama lowu vatolovelaka kutlhava hamba ya Paxkwa, vadondzrisiwa vake vaku ka yene: “Xana unavela lesvaku hiyakululamiselela kwini mbangu wa kudela kone Paxkwa?”

13   Kutani azruma vabidzri ka vadondzrisiwa vake, aku ka vone: “Nhingenani doropeni. Mitatlhangana ni mhunu na azrwale hotsro ya mati. Mulandzrani.

14   Kutani lomu atakanhingena kone, bzelani n’winyi wa muti, miku: ‘Mudondzrisi ali: “Xi kwini xilawu xa vayeni la ningadaka kone Paxkwa ni vadondzrisiwa vanga?”’

15   Kutani atamikomba yindlu ya le henhla, leyinga ni tafula ni svitsrhamu, ni svibza hinkwasvu. Hilulamiselani kone.”

16   Kutani vadondzrisiwa vahuma vaya doropeni. Vayakuma xisvosvi angahlayisa xisvone, valulamisela Paxkwa.

17   Kutani loko dzripelile, abuya ni lava 12.

18   Kutani na vahatsrhame tafuleni vada, Yesu aku: “Nihlaya na nitiyisile niku ka n’wine: Mun’we ka n’wine atanixavisa; yelwe adaka na mine.”

19   Vasungula kutlhaveka timbilu, vamuvutisa ha mun’wemun’we, vaku: “Angava mine?”

20   Aku ka vone: “I mun’we ka lava 12; yelweyi acovelaka na mine kola ka ximbengana.

21   Hikusa N’wana wa mhunu awafamba, hi la svitsraliwiki ha kone mayelanu na yene. Kambe khombo dzra mhunu wa kone lweyi N’wana wa mhunu adlayisiwaka ha yene! Inhaka svimuyampselile loko mhunu wa kone aangapsaliwanga.”

22   Vaku na vahada, ateka kati, akhensa, adzrikhemelela, avanyika, aku: “Danani. Lesvi i mizri wanga.”

23   Agama ateka xinwelo, akhensa, avanyika, kutani hinkwavu vanwa ha xone.

24   Kutani aku ka vone: “Lesvi i ngati yanga ya xipfumelelanu, leyi yitakahalatiwa kupfuna vanyingi.

25   “Nihlaya na nitiyisile niku ka n’wine: Ningaka ningahanwi vhinyo kuyatlhasa asikwini ledzri nitakadzrinwa na dzrahakuhuma amfun’wini wa Xikwembu.”

26   Kutani vayimbelela svidzrumiso, vagama vaya Nhaveni ya Minhlwazri.

27   Kutani Yesu aku ka vone: “N’wine hinkwenu mitawela ntlhan’wini, hikusa kutsraliwe lesvi: ‘Nitaba mubzisi, kuhangalaka tihamba ta kone.’

28   Kambe loko nipfukile, nitazranga niyamiyimela le Galileya.”

29   Kambe Petrosi aku ka yene: “Nhambiloko hinkwavu lavan’wana vangowela ntlhan’wini, mine ningewi.”

30   Kutani Yesu aku ka yene: “Nihlaya na nitiyisile, niku ka wene: Wene, namunhla wusiku bzobzi, na nkuku wungesikukuluka kabidzri, utanihlamba kazrazru.”

31   Kambe atizra kuhlayetela lesvi: “Nhambi svokombela akuva nifa na wene, ningaka ningakuyali.” Na vone hinkwavu lavan’wana vahlaya svo sva svin’we.

32   Kutani vatlhasa ka mbangu lowu valiki i Getsemani. Kutani Yesu aku ka vadondzrisiwa vake: “Tsrhamani lani; nabuya, noyakhongota.”

33   Kutani ateka Petrosi, Jakobe na Johani afamba navu, asungula kukazrateka svinene amoyeni wake ni kukameka ngopfu mbilu.

34   Agama aku ka vone: “Nitwa gome dzrikulu ahikeni dzranga, kuyatlhasa akufeni. Tshramani la, mivonelela.”

35   Kutani atsrhindzrekanyana, awela hansi asungula kukhongota lesvaku, loko svikoteka, nkama lowo wungamukhaluta.

36   Kambe aaku: “Abba, we Tatana wanga! Hinkwasvu svakoteka ka wene; nisusele xinwelo lexi. Kambe kungayenceke kuzrandzra kwanga; akuyenceke kuzrandzra kwaku.”

37   Kutani atlhela, avakuma na vakhutsriyelile. Aku ka Petrosi: “Simoni, wokhutsriyela? Awuvanga nawu ntamu wa kuvonelela hi wora dzrin’we ntsena?

38   Vonelelani mitlhela mikhongota akuva mingaweli andzringweni. Wone moya wasvijula; kambe nyama ayi na ntamu.”

39   Kutani atlhela asuka ayakhongota, ahlaya mazritu wolawa ya man’we.

40   Kutani atlhela abuya, avakuma na vakhutsriyelile, hikusa matihlo yavu amabindzriwa hi wuzrongo; kutani vangativi ni xa kumuyangula.

41   Kutani atlhela abuya ka wuzrazru, aku ka vone: “Ka nkama wa kufana ni lowu, n’wine mokhutsriyela, miwisa! Gamani! Nkama wutlhasile! Lavisani! N’wana wa mhunu atanyiketiwa amavokweni ya vadohi.

42   Sekelekani hifamba. Lavisani! Lweyi anidlayisaka a kola kusuhi.”

43   Kutani, hi kukahlula, na ahavulavula, kotlhasa Juda, mun’we wa lava 12, na a ni xitsrhungu lexitameliki timpanga ni tinhonga, na vazrumeliwe hi vaprista lavakulu ni vatsrali, ni vakulu.

44   Kutani lweyi amudlayisaka aavanyike xikombiso, aku: “Lweyi nitakamun’quta, hi yelweyo. Mukhomani mifamba naye na avoneleliwa ha hombe.”

45   Kutani loko atlhasa, atekela kuyela Yesu, aku ka yene: “Mudondzrisi!” Agama amun’quta.

46   Kutani vamukhoma, vangamutsrhiki.

47   Kambe, mun’we wa lava avayime kusuhi ahlomula lipanga dzrake aba xitizri xa muprista lwenkulu, axitsrema ndleve.

48   Kambe Yesu avayangula, aku: “Xana mibuyela kutatanikhoma hi timpanga ni tinhonga ingiki nova xigevenga?

49   Siku ni siku anili na n’wine atempeleni na nidondzrisa, kambe amizanga minikhoma. Kambe, lesvi sviyencela kuhetisisa Matsralwa.”

50   Kutani hinkwavu vamutsrhika wusvake vatsrutsruma.

51   Kambe mumpsha wa kukazri aamulandzrelela na atikapeke mujansi wa linyu ntsena amizrini, ange na nkhancu; kutani vakumugi!

52   Kambe achupuka, asiya mujansi wake wa linyu, atsrutsruma na esala hi xizrangiso.

53   Kutani vateka Yesu vamuyisa ka muprista lwenkulu. Hinkwavu vaprista lavakulu ni vakulu, ni vatsrali, vahlengeletana.

54   Kambe Petrosi, amulandzra hi le kule, ayatlhasa akintazri wa muti wa muprista lwenkulu. Atlhasa atsrhama ni vatizri va muti, awozra ndzrilo.

55   Kutani vaprista lavakulu ni Huvo ya Xijuda hinkwayu avajula wumboni bza kuyavanyisa Yesu akuva vamudlaya, kambe vangabzikumi.

56   Hikusa vanyingi avamuhembela hi wumboni bzavu, kambe lesvi avafakaza svone asvingakumani.

57   Kugama kusekeleka van’we, vamuhembela hi wumboni bzavu, vaku:

58   “Hine himuyingele na aku: ‘Nitahohlota tempele ledzringahambiwa hi mavoko, niyaka dzrin’wana dzra kukala dzringahambiwanga hi mavoko hi masiku mazrazru.’”

59   Kambe nhambi vahlaya svosvo, lesvi avafakaza svone asvingakumani.

60   Kutani muprista lwenkulu asekeleka ayima amakazri kwavu, avutisa Yesu, aku: “Awuyanguli nchumu? Xana lava vafakaza lesvaku uhone yini?”

61   Kambe amiyela akuntse, angayanguli nchumu. Muprista lwenkulu atlhela amuvutisa, aku: “Xana u Kriste, N’wana wa Lwakhensiwaka?”

62   Kutani Yesu aku: “Ni yene; nakone n’wine mitavona N’wana wa mhunu na atsrhame avokweni dzra xinene dzra ntamu, loko abuya hi matlavi ya le tilweni.”

63   Kutani muprista lwenkulu ahandzrula xiyambalu xake, aku: “Hahajulela yini timboni?

64   Mixiyingelile xizruku! Misvivonisa kuyini?” Kutani hinkwavu vaku afaneliwa hi kukhatisiwa hi lifu.

65   Kutani van’we vasungula kumuthukela mazri, vamufuneketa wuso, vamubukutela hi tin’qindhi, na vaku: “Profeta!” Na vone vatizri va muti vamuteketa hi timpama.

66   Kutani na Petrosi ali hansi, le kintazri, kobuya mun’we wa vatizri va xisati va muprista lwenkulu.

67   Loko avona Petrosi na awozra ndzrilo, amulavisisa, aku: “Na wene awuli ni munazareta lweyi, Yesu.”

68   Kambe aphika, aku: “Animutivi, funtsrhi nesvaku ukhanela ha yini anisvitwisisi.” Agama ahuma aya nyangweni.

69   Kutani lwewa n’hwanyana wa xitizri amuvona, atlhela asungula kubzela lava avali kusuhi, aku: “Lweyi i mun’we wa vone.”

70   Kambe atlhela aphikisa. Kutani loko kukhaluta nkamanyana, lava avali kusuhi vatlhela vasungula kukhanela na Petrosi, vaku: “Wene mpela u mun’we wa vone, hikusa funtsrhi u mugalileya.”

71   Kambe asungula kutihlayela makhombo atlhela afunga, aku: “Animutivi mhunu lweyi mikhanelaka ha yene!”

72   Kolanu nkuku wukukuluka ka wubidzri, kutani Petrosi adzrimuka mazritu lawa Yesu angamahlaya ka yene, aku: “Na nkuku wungesikukuluka kabidzri, wene utanihlamba kazrazru.” Kutani atlhaveka mbilu, adzrila.