-
Marku 3
1 Atlheliki anghena ka sinagoga dzrin’we, akuma lesvaku ku ni mhunu wa kuwoma voko.
2 Kutani vamulangusisa kuvona lesvaku kumbe atadaha mhunu lweyo hi Savata kumbe ihina, akuva vatamuzrwexa nandzru.
3 Aku ka mhunu lwewa kuwoma voko: “Sekeleka uta lani makazri.”
4 Agama aku ka vone: “Hi Savata, svapfumeleliwa kuyenca sva svinene kumbe kuhona kee? Svapfumeleliwa kuhuluxa mhunu kumbe kumudlaya kee?” Kambe vamiyela vakuntse!
5 Kutani ntsrhaku ka kulangusa ha mun’we ni mun’we wa vone, na avasola hi kuvaviseka svinene hi mhaka ya kutlanyala kwavu timbilu, aku ka mhunu lwiyani: “Nalavuta voko.” Kutani analavuta voko, dzritlhela dzrihanya.
6 Kutani vafarisi vahuma, vakahlula vahlengeletana ni va ntlawa wa Heroda akuva valuka makungu ya kumudlaya.
7 Kambe Yesu asuka aya alwandle xikan’we ni vadondzrisiwa vake, kutani xitsrhungu lexikulu lexihumaka Galileya ni lexihumaka Judeya ximulandzra.
8 Nhambi hi le Jerusalema ni le Idumeya ni halahaya ka Jordani ni le matlhelweni ka Tire na Sidoni, aateliwa hi xitsrhungu xa xikulu svinene loko xiyingela minchumu ya kutala leyi aayiyenca.
9 Kutani abzela vadondzrisiwa vake lesvaku vatsrhama ni boti na dzrilungile akuva xitsrhungu xingamukamalati.
10 Lesvi aadaha va kutala, hinkwavu lava ava ni svivavu lesva kuchavisa avakamalatana matlhelweni yake akuva vamukhumba.
11 Nhambi mimoya leyinyamiki, loko yimuvona, ayimukhinsamela na yibandlukana, yiku: “Wene u N’wana wa Xikwembu!”
12 Kambe minkama yinyingi aayileleta svinene akuva yingamutivisi.
13 Atlhantuka nhava agama avitana lava aavajula, kutani vamutela.
14 Kutani avumba ntlawa wa 12, lava atlheliki avachula vapostola, lava avatatsrhama na yene ni lava aatavazrumela kuyazrezra,
15 ni kuva ni ntamu wa kuhlongola mademona.
16 Kutani svizro sva ntlawa wa lava 12 lowu awuvumbiki asvili Simoni, lweyi atlheliki amunyika vito dzra Petrosi,
17 Jakobe, n’wana Zebedewu, na Johani, makwa Jakobe (atlheliki avachula vito dzra Bowernegesi, lesvijulaka kuhlaya lesvaku “Vana va Kudzruma ka Tilo”),
18 Andreye, Filipi, Bartolomewu, Matewu, Tomasi, Jakobe, n’wana Alfewu, Tadewu, Simoni, mukanana,
19 na Juda Iskariyota, lweyi agamiki amudlayisa. Agama anhingena ndlwini ya kukazri.
20 Kutani kutlhela kutlhangana xitsrhungu, lakakuva vangahasvikoti nhambi kuda svakuda.
21 Kambe loko maxaka yake masviyingela, mahuma akuva matatamuteka, hikusa amaku: “Atitlhangani.”
22 Nakone, vatsrali lavatiki hi le Jerusalema avaku: “A ni Belezebubi, funtsrhi ahlongola mademona hi hosi ya mademona.”
23 Kutani antsrhaku ka loko avavitanile vata ka yene, akhanela navu hi svifaniso, aku: “Xana Sathana angahlongolisa kuyini Sathana?
24 Loko mfumu wuyavanile wutilwisa, mfumu lowo awu na kutama wuva kone;
25 nakone loko yindlu yoyavana yitilwisa, yindlu leyo ayi na kusvikota kutama yiva kone.
26 Nakone, loko Sathana asekeleke atilwisa atlhela ayavana, anga na kusvikota kutama ava kone kambe atawa.
27 Nhambitanu, aku na mhunu anganhingenaka ndlwini ka mhunu wa ntamu lwangakotaka kuyiva minchumu yake handle ka loko ozranga hi kutsrimbelela mhunu lwewa ntamu. Hi kone angasvikotaka kuphanga minchumu leyinga ndlwini.
28 Nimibzela na nitiyisile lesvaku minchumu hinkwayu yitadzrivaleliwa vana va vhanu, nhambi ova svidoho sva kuyini lesvi vasviyencaka ni svizruku sva kuyini lesvi vasvihlayaka.
29 Kambe mani na mani lwazrukaka moya wa kuxwenga anga na kudzrivaleliwa hi la kungahelikiki, kambe a ni nandzru wa xidoho xa hi la kungahelikiki.”
30 Ahlaye lesvo hikusa ava ku: “A ni moya lowunyamiki.”
31 Kutani kuta mamana wake ni vamakwavu, vatlhasa vayima handle, vazruma mhunu ayamuvitana.
32 Vaku ka yene mahlweni ka xitsrhungu lexi axitsrhame matlhelweni kwake: “Lavisa! Mamana waku ni vamakwenu va hala handle vakujulaka.”
33 Kambe avahlamula, aku: “I mani mamana wanga? Ni vamakwezru i vamani?”
34 Kutani alavisa lavatsrhamiki amatlhelweni kwake vamusiya makazri, aku: “Mamana wanga ni vamakwezru hi lava!
35 Mani na mani lwayencaka kuzrandzra ka Xikwembu, hi yene anga makwezru wa xinuna ni wa xisati ni mamana wanga.”