BRN

1   Kutani vatlhasa halahaya ka lwandle amugangeni wa vageraseni.

2   Kutani hi kukahlula loko Yesu ahume abotini, atlhangavetiwa hi mhunu lweyi aa ni moya lowunyamiki, na ahuma amasizreni,

3   lweyi aatsrhama amasizreni. Lweyo nhambi hi chini, akungahali na mhunu lwakotaka kumutsrimba ha dzrone,

4   hikusa minkama ya kutala aatsrimbiwa hi tinghomondho ni machini, kambe aathinya machini hi makazri ava atsrhovelela tinghomondho; kutani akungali na mhunu lwakotaka kumuhlula.

5   Kutani wusiku ni nhlikanhi aatsrhama hi kubonga, amasizreni ni le tinhaveni na atitsrema hi mazribze.

6   Kutani loko avona Yesu hi le kule, atsrutsruma, ayamukhinsamela.

7   Abonga hi zritu ledzrikulu, aku: “Nekuhonela yini wene, Yesu, N’wana wa Xikwembu Lexinga Henhlahenhla? Nakufungisa hi Xikwembu lesvaku unganixanisi.”

8   Hikusa Yesu aaku: “Huma ka mhunu lweyo, wene moya lowunyamiki!”

9   Kutani Yesu amuvutisa, aku: “U mani vito?” Ahlamula, aku: “Vito dzranga hi mine Butsrhu, hikusa hi vanyingi.”

10   Kutani akombela Yesu akuva angahlongoli mimoya leyo yiya handle ka tiko.

11   Kutani aku ni ntlhambi lowukulu wa tinguluve tidaka le nhaveni.

12   Kutani mimoya yimukombela, yiku: “Hizrumele tingulubzeni, akuva hinhingena ka tone.”

13   Kutani ayipfumelela. Mimoya leyinyamiki yihuma yiyanhingena atingulubzeni, kutani ntlhambi wutsrutsrumela ka mombo wa nhava, wupela lwandle; kolomu ka 2.000 wa tinguluve tifa hi kunwela mati andzreni ka lwandle.

14   Kutani lava avatibzisa vatsrutsruma vayahlaya adoropeni ni le ntlhaveni; vhanu vahumetela vayavona lesvihumeleliki.

15   Kutani vaya ka Yesu, vakuma lesvaku mhunu lweyi aakhomiwe hi butsrhu dzra mademona etsrhama nakone ayambale mpahla na nhloko yitizra ha hombe; kutani vachava.

16   Kutani lava vangasvivona vavadzrungulela lesvi svingayencekisa xisvone ka mhunu lweyi aa ni mademona ni ka tinguluve.

17   Kutani vasungula kumukombela lesvaku asuka amugangeni wavu.

18   Loko Yesu aku awanhingena abotini, mhunu lweyi aa ni mademona amukombela kufamba naye.

19   Kambe amutsimba, aku ka yene: “Muka akaya kwaku, ka vayakelani, uyavabzela hinkwasvu lesvi Jehovha akuyenceliki svone ni wusiwana lebzi angakutwela bzone.”

20   Kutani afamba, ayasungula kubzeletela vhanu va le Dekapolisi hinkwasvu lesvi Yesu angamuyencela svone; vhanu hinkwavu vahlamala.

21   Kuteloko Yesu atlhele atsremakanya hi boti aya tlhelo ledzrin’wana, vhanu va vanyingi svinene vabuya vahlengeletana ka yene, na yene ali nkingeni wa lwandle.

22   Kutani kutlhasa mun’we wa muzrangeli wa sinagoga, lweyi valiki i Jayru. Loko avona Yesu, atiwisa aminkondzrweni yake.

23   Amukombela, aku: “Xin’hwanyatana xanga kesala kutsrongo akuva xifa. Nikombela ubuya uxitlhanteka mavoko xitadaheka, xihanya.”

24   Kutani Yesu afamba naye. Kutani vhanu va vanyingi svinene vamulandzrelela, vamukamanyetela.

25   Kutani mun’we wansati lweyi angaheta 12 wa malembe na a ni mavabzi ya kuhumela ngati,

26   lweyi angahlupheka svinene amavokweni ya vadahi vanyingi ava aheta mali yake hinkwayu, kambe amatsrhan’wini ya kuyampsa, mavabzi yake amoya amahlweni makula,

27   loko ayingele vhanu vakhanela hi Yesu, ate hi le ntsrhaku kwake amakazri ka xitsrhungu, akhumba mpahla yake,

28   hikusa aaku: “Loko nokhumba ntsena mpahla yake, nitahanya.”

29   Kutani ngati yitekela kuyima kuhuma, asvitwa amizrini wake lesvaku xivavu xake lexa kuchavisa xiholile.

30   Kolanu Yesu asvitwa andzreni kwake lesvaku kuhume ntamu. Kutani andzruluka, aku ka xitsrhungu lexiyani: “Hi mani lwakhumbiki mpahla yanga?”

31   Kambe vadondzrisiwa vake vaku ka yene: “Wasvivona lesvaku xitsrhungu xakukamanyetela, kambe wahavutisa, uku: ‘I mani anikhumbiki?’”

32   Kambe, aalangusa matlhelo hinkwavu atavona lesvaku i mani lwangayenca lesvo.

33   Kutani lweyo wansati achava atlhela azruzrumela hi kutiva lesvingamuyencekela; atsrhindzrekela ka Yesu, amukhinsamela, amubzela ntiyiso hinkwawu.

34   Kutani Yesu aku ka yene: “N’wananga, lipfumelo dzraku dzrikuhanyisile. Muka hi kuzrula, uhola xivavu xaku lexa kuchavisa.”

35   Na ahavulavula, kutlhasa vhanu hi le kaya ka lweyi wa muzrangeli wa sinagoga, vaku: “N’wanaku afile! Wahamukazratela yini Mudondzrisi?”

36   Kambe Yesu ayingela mazritu yavu, kutani abzela lwewa muzrangeli wa sinagoga, aku: “Ungachavi; wene vana ni lipfumelo ntsena.”

37   Kutani angatsrhikanga mhunu amulandzra handle ka Petrosi, Jakobe na Johani, makwa Jakobe.

38   Kutani loko vatlhasa akaya ka muzrangeli wa sinagoga, akuma lesvaku ku ni pongwe ni vhanu lava vadzrilaka, vaba ni tihuwana.

39   Anhingeniki, aku ka vone: “I pongwe dzra yini ledzri mibaka? Midzrilela yini? N’wana lweyi angafanga kambe eyetlela.”

40   Kutani vamuhleka. Kambe loko ahumexe vhanu hinkwavu ahandle, ateka tatana wa n’wana ni mamana wa kone, ni lava angabuya navu, anhingena lomu n’wana aali kone.

41   Agama akhoma n’wana lweyo hi voko, aku ka yene: “Talitha kumi”, lesvi, loko svindzrulutiwa hi lidzrimi dzrin’wana, sviliki: “Wene wa xin’hwanyatana, nili ka wene: ‘Pfuka!’”

42   Kolanu lweyi wa n’hwanyana apfuka asungula kufambafamba. Hikusa aa ni 12 wa malembe ya kuhanya. Kolanu vangahatikoti hi kutala hi kunyonxa.

43   Kambe avaleleta svinene lesvaku kungachuke kuva ni mhunu lwasvitivaka lesvo; atlhela avazruma kunyika n’wana svakuda.