BRN

1   Agama ahuma kone aya atikweni dzra lekwavu; vadondzrisiwa vake vamulandzra.

2   Loko kutlhase Savata, asungula kudondzrisa asinagogeni. Kutani vanyingi va lavamuyingeliki vahlamala, vaku: “Xana mhunu lweyi asvikume kwini lesvi? Wutlhazri lebzi anyikiwiki bzone i bza kwini, ni masingita ya kutanu, lamayenciwaka hi mavoko yake?

3   Xana lweyi ahi yene lwewa muvatli, n’wana Mariya, lwewa makwa Jakobe, Josefa, Juda na Simoni? Ni vamakwavu va xisati ahi vone volava, vanga na hine?” Kutani vakhunguvanyeka ha yene.

4   Kambe Yesu aku ka vone: “Muprofeta akombiwa xichavu hinkwaku, handle ka lekwavu, amakazri ka maxaka yake ni va le kaya kwake.”

5   Kutani angakotanga kuyenca singita ni dzrin’we kone, handle ka kutlhanteka mavoko ka timbabzi tingali tingani, atihanyisa.

6   Atlhele ahlamala hi kupfumala kwavu lipfumelo. Agama azrendzreleka hi svidoropana, afamba adondzrisa.

7   Kutani avitana lava 12, asungula kuvazruma hi vabidzrivabidzri, avanyika ni ntamu wa kuhlongola mimoya leyinyamiki.

8   Ava avaleleta lesvaku vangateke nchumu wa kuwutizrisa andleleni handle ka nhonga; aku vangateke mapawu, nkwama, kumbe mali mabandhini yavu,

9   kambe aku avayambale masandhazi, vangayambali mijansi yibidzri.

10   Agama aku ka vone: “Kwini na kwini, loko minhingena amutini wa kukazri, tsrhamani ka wone miko misuka ka mbangu lowo.

11   Kutani loko mbangu wa kukazri wuyala kumiyamukela kumbe kumiyingiseta, sukani; phumunani ntsrhuzri lowunga minkondzrweni yenu akuva bziva wumboni ka vone.”

12   Kutani vafamba vazrezra lesvaku vhanu vafanela kutisola;

13   vahlongola ni mademona ya kutala, vatota hi mafuzra timbabzi ta kutala, vatidaha.

14   Kutani Hosi Heroda asviyingela, hikusa vito dzra Yesu adzri ni ndhuma, nakone vhanu avaku: “Johani Mubabatisi apfuxiwe akufeni; hi svosvo svimuyencaka akota kuhamba masingita.”

15   Kambe vambeni avaku: “I Eliya.” Kasi vambeni avaku: “I muprofeta, kufana ni mun’we wa vaprofeta va khale.”

16   Kambe loko Heroda ayingela lesvo, aku: “Johani, lweyi ningamutsrema nhloko, apfukile.”

17   Hikusa Heroda hi ntshima yake aazrume vhanu vayakhoma Johani, vamupfalela ajele hi mhaka ya Herodiya, nsati wa makwavu, Filipi, hikuva Heroda aachate naye.

18   Hikusa Johani aahamba aku ka Heroda: “Lesva kuteka nsati wa makwenu, nawu awusvipfumeleli.”

19   Kutani Herodiya aamubekele xiviti, ajula kumudlaya kambe angasvikoti.

20   Hikusa Heroda aachava Johani, hi kutiva lesvaku i mhunu wa kululama ni wa kuxwenga, kutani amusizrelela. Nkama hinkwawu loko akhanela na Johani, Heroda aatalataleka ngopfu svinene; nhambitanu aanyonxa hi kumuyingela.

21   Kambe kutlhasa siku ledzrinene, loko Heroda ahamba nkhuvu wa kutlhanganisa ka malembe ya kupsaliwa kwake, azramba tihosana take ni vazrangeli va masocha, ni vazrangeli va le Galileya.

22   Kutani loko n’wana wa xisati wa Herodiya anhingena akina, Heroda ni lava avatsrhame na yene atafuleni vanyonxa. Hosi yiku ka lweyi wa n’hwanyana: “Kombela xin’wana ni xin’wana lexi uxijulaka kwanga, nitakunyika.”

23   Yiva yimufungela, yiku: “Xin’wana ni xin’wana lexi utakanikombela xone, nitakunyika, kuyatlhasa ni hamfu ya mfumu wanga.”

24   Kutani lwewa n’hwanyana ahuma ayavutisa mamana wake, aku: “Nikombela yini kee?” Aku: “Nhloko ya Johani Mubabatisi.”

25   Kutani anhingena hi kukahlula ayakombela hosi, aku: “Nijula uninyika nhloko ya Johani Mubabatisi svosvisvosvi hi bandecha.”

26   Nhambilesvi hosi yingatlhaveka mbilu svinene hi lesvo, ayijulanga kumutsrona, hi mhaka ya lesvi yingasvifunga ni hi mhaka ya lava ayitsrhame navu atafuleni.

27   Kutani hosi yitekela kuzruma musocha mun’we, yimuleleta kuyabuyisa nhloko ya Johani. Kutani afamba ayamutsrema nhloko ajele,

28   abuyisa nhloko yake hi bandecha. Ayinyika lwewa n’hwanyana, kutani yene ayinyiketa mamana wake.

29   Kutani loko vadondzrisiwa vake vasviyingela, vabuya vateka ntsrumbu wake vayawulahla asizreni.

30   Kutani vapostola vahlengeletana ka Yesu vamudzrungulela hinkwasvu lesvi vangasviyenca ni lesvi vangasvidondzrisa.

31   Kutani aku ka vone: “Buyani, n’wine wusvenu ntsena, ka mbangu wa mananga, miwisanyana.” Hikusa akubuyetela vhanu va vanyingi na van’wana vafamba, lakakuva Yesu ni vapostola vangawukumi ni nkama wa kuda.

32   Kutani vasuka hi boti vaya ka mbangu wa mananga, vone wusvavu.

33   Kambe vhanu vavavona loko vafamba, kutani vanyingi vasvitiva; vahuma amadoropeni hinkwawu, vatsrutsrumela kone xikan’we hi minenge, vavachangwela.

34   Kutani loko ahuma, avona vhanu va vanyingi svinene; avatwela wusiwana, hikusa avafana ni tihamba letingeke na mubzisi. Kutani asungula kuvadondzrisa minchumu ya kutala.

35   Kutani lesvi nkama awufambile, vadondzrisiwa vake vamuyela, vaku ka yene: “Lomu akutsrhami mhunu, nakuve nkama kutani wufambile.

36   Valelele, vatakota kuya amigangeni ni le svidoropaneni sva le kusuhi, vayatixavela svakuda.”

37   Kambe avahlamula, aku: “Vanyikani n’wine svakuda.” Na vone vaku ka yene: “Xana hitayaxava mapawu ya 200 wa madenari hivanyika vada kee?”

38   Aku ka vone: “Mi ni mapawu mangani kee? Fambani miyakamba!” Loko vayile vayakamba, vaku: “I ntlhanu, ni tinhlampfi tibidzri.”

39   Kutani abzela hinkwavu vatsrhama hi mintlawantlawa abzanyini bza lihlaza.

40   Kutani vatsrhama hi mintlawa ya 100 ni ya 50 wa vhanu.

41   Kutani ateka mapawu laya ntlhanu ni tinhlampfi leta tibidzri, alavisa ahenhla atilweni, akhensa. Agama akhemelela mapawu, amanyiketa vadondzrisiwa vake akuva vaphakela vhanu; ayavela hinkwavu ni tinhlampfi leta tibidzri.

42   Kutani hinkwavu vada, vaxuzra.

43   Kutani vazrwala 12 wa mintsrhava ya kutala hi matlhantlha ni hi tinhlampfi.

44   Kutani lavadiki mapawu lawo avali 5.000 wa vavanuna.

45   Kutani azruma vadondzrisiwa vake vanhingena botini vapfana vazranga, vaya ka tlhelo ledzrin’wana dzra Betsayda, na yene ahalelelana ni xitsrhungu.

46   Kutani loko ahete kulelelana ni xitsrhungu, aya anhaveni ayakhongota.

47   Loko dambu dzripelile, boti adzrili makazri ka lwandle, kambe yene aali wusvake asaveni.

48   Kutani, loko avavona lesvaku vaweta hi kukazrateka, hikusa moya awuhunga wuvaba, na sviya mpundzrwini, avayela, na afamba ahenhla ka lwandle; kambe aajula kuvakhaluta.

49   Loko vamuvona na afamba ahenhla ka lwandle, vapimisa lesvaku i xipoko, kutani vasungula kuba tinyandha.

50   Hikusa hinkwavu vamuvonile, vachava. Kambe atekela kukhanela navu, aku: “Tiyani nhlana! Hi mine; mingachavi.”

51   Agama anhingena abotini ledzri avali ka dzrone, kutani moya wumiyela. Kutani vatala hi kuhlamala ka kutlula mpimu,

52   hikusa avangasvitwisisi lesvaku aajula kuhlaya yini hi mapawu, kambe timbilu tavu atitlanyalile.

53   Loko vawelile, vanhingena Genezareti, vatsrimba boti kone.

54   Kambe neti axika abotini, vhanu vamuvona lesvaku hi yene.

55   Kutani vatsrutsruma amugangeni luwani hinkwawu, vasungula kutlakulela timbabzi hi svinkukwana, vatiyisa hinkwaku lomu vayingelaka lesvaku a kone.

56   Nakone hinkwaku lomu aanhingena kone, asvidoropaneni kumbe amadoropeni, kumbe atintlhaveni, avabeka lava kuvabza amabazara, vamukombela lesvaku vangakhumba ntsena mponta ya mpahla yake. Kutani hinkwavu lava avayikhumba avahanya.