BRN

1   Kutani vafarisi ni van’we va vatsrali lava avapfa hi le Jerusalema vahlengeletana ka yene.

2   Kutani vavona van’we va vadondzrisiwa vake na vada svakuda hi mavoko ya kunyama, hi lesvaku, na vangahlambanga mavoko.

3   (Hikusa vafarisi ni vajuda hinkwavu avadi na vangazranganga hi kukombesela mati hi mavoko vamahlampsa, hi kulandzra xihila xa va khale,

4   nakone loko vabuya hi le bazara, avadi na vangahlambanga. Nakone ku ni svihila svinyingi vangaleletiwa kusvilandzrelela, sva kufana ni kuhlampsa svinwelo, makhuwana ni svibza sva nsuku.)

5   Kutani vafarisi ni vatsrali lavo vamuvutisa lesvi: “Hayini vadondzrisiwa vaku vangalandzreleli xihila xa va khale, kambe vada svakuda hi mavoko ya kunyama?”

6   Aku ka vone: “Ezaya angahembanga loko aprofete ha n’wine, vakanganyisi, tanihi lesvi kutsraliwiki lesvi: ‘Vhanu lava vanikomba xichavu hi minomu ntsena, kambe timbilu tavu ti kule na mine.

7   Kutani vonigandzrela mahala, hikuva vadondzrisa tidondzro letinga svileleto sva vhanu.’

8   N’wine mitsrhikete nawu wa Xikwembu milandzrelela xihila xa vhanu.”

9   Atlhela aku ka vone: “N’wine misvikota ngopfu kutlula nawu wa Xikwembu akuva mibekisa xihila xenu.

10   Hikusa Moxe ate: ‘Kombisa xichavu ka tatana waku ni mamana waku’; atlhela aku: ‘Lweyi azruketelaka tatana ni mamana wake afanela kudlawa.’

11   Kambe n’wine mili: ‘Mhunu antsrhunxekile loko aku ka tatana wake ni mamana wake: “Lesvi anitakupfuna ha svone i korban (hi lesvaku, xihananu lexinganyikiwa Xikwembu).”’

12   Amahamutsrhiki ayencela tatana wake kumbe mamana wake nchumu ni wa wun’we.

13   Xilesvo, midlaya zritu dzra Xikwembu hi xihila xenu lexi mingaxibeka. Funtsrhi miyenca ni svin’wana sva kutala sva kufana ni svosvo.”

14  Kutani avitana xitsrhungu xitsrhindzrekela, aku ka xone: “Niyingisetani, n’wine hinkwenu, mitlhela mitwisisa. 

15  Aku na nchumu ahandle ka mhunu lowu loko wunhingena andzreni kwake wungakotaka kumunyamisa; kambe lesvihumaka ka mhunu hi svone svimunyamisaka.” 

16  --

17  Kutani loko asiye xitsrhungu anhingena andlwini, vadondzrisiwa vake vamuvutisa lesvaku xifaniso lexo xitlhamuxela yini.

18   Kutani aku ka vone: “Xana na n’wine amitwisisi kufana ni xitsrhungu kee? Amisvitivi lesvaku hinkwasvu lesvisukelaka ahandle, loko svinhingena ka mhunu, asvisvikoti kumunyamisa?

19   Hikuva asvinhingeni ambilwini yake, kambe svinhingena akhuzrini dzrake, svigama sviyahuma axikoti!” Hi ndlela leyo, abasisa svakuda hinkwasvu.

20   Atlhela aku: “Lesvihumaka ka mhunu hi svone svimunyamisaka.

21   Hikusa hi le ndzreni ka mhunu, ambilwini, kuhuma mimpimiso ya kubiha, wugangu, wuyivi, wudlayi,

22   wumbuye, makwanga, mona, wukanganyisi, mahanyela ya tingana, matsrhoho, kuzruketela, kutikulisa ni wumphunta.

23   Hinkwayu minchumu leyi ya kubiha yihuma hi le ndzreni, kutani yinyamisa mhunu.”

24   Atiki asuka kone, anhingena amugangeni wa Tire na Sidoni. Kutani anhingena ka yindlu ya kukazri, na aangajuli akuva svitiviwa hi mhunu ni mun’we, kambe angasvikotanga kufihleka.

25   Kambe, loko hi kukahlula mun’we wansati lweyi xin’hwanyatana xake axi ni moya lowunyamiki ayingela lesvaku ku na Yesu, abuya akhinsama aminkondzrweni yake.

26   Lweyo wansati aali mugrika, wa kupsaliwa hi musirya ni mufenisya. Kutani amukombela kususa demona ka n’wanake.

27   Kambe Yesu aku ka yene: “Kusungula tsrhika vana vada vaxuzra, hikusa ahi svinene kuteka pawu dzra vana udzricukumetela svimbzanyana.”

28   Kambe lweyo wansati amuyangula, aku: “Ina, we hosi, kambe nhambi svimbzanyana lesvinga hansi ka tafula svida matlhantlha ya svivanana.”

29   Yesu aku ka yene: “Hi mhaka ya lesvi usvihlayiki, muka; demona dzrihumile ka n’wanaku.”

30   Kutani amuka akaya kwake, ayakuma lesvaku n’wana eyetlela amubedeni, ni lesvaku demona dzrisukile.

31   Loko Yesu atlhela hi le mugangeni wa le Tire, akhaluta hi le Sidoni, akongoma Lwandle dzra Galileya, atsremakanya muganga wa Dekapolisi.

32   Lesvi vamutiseliki mhunu lwangayingelikiki, wa kudukudela, vamukombela lesvaku amutlhanteka voko.

33   Loko amutsrhindzrete atlhelweni wusvake, ka kule ni xitsrhungu, abeka tintiho take atindleveni ta mhunu lweyo, athuka mazri, agama akhumba lidzrimi dzrake.

34   Atlhela alavisa atilweni, akonya, agama aku ka yene: “Efata”, lesviliki: “Pfuleka.”

35   Kutani tindleve take tipfuleka, ni nsiha wa lidzrimi dzrake wutlhantlheka, asungula kuvulavula mazritu ya kutwisiseka.

36   Agama avaleleta lesvaku vangabzeli mhunu, kambe loko aya avaleleta, hi lani avaya vasvihangalasa kone.

37   Nakone avahlamale ngopfu kutlula mpimu, vaku: “Hinkwasvu asviyence ha hombe. Lavangayingelikiki avayenca vayingela, ni lavangakhanelikiki avayenca vakhanela.”