BRN

1   Amasikwini lawo, katlhele kuva ni xitsrhungu lexikulu, kambe axingali na nchumu wa kuda. Kutani avitana vadondzrisiwa, aku ka vone:

2   “Navatsretsra vhanu lava, hikusa va ni masiku mazrazru na vatsrhame na mine, kutani ava na svakuda.

3   Nakone loko novamukisa amakaya kwavu ni ndlala, vatajiyela andleleni, hikusa van’we va vone vapfa kule.”

4   Kambe vadondzrisiwa vake vamuhlamula, vaku: “Xana mhunu angamakuma kwini mapawu ya kuxuzrisa vhanu lava hinkwavu ka mbangu lowu wa mananga?”

5   Kutani avavutisa, aku: “Mi ni mapawu mangani?” Vaku: “7 wa wone.”

6   Kutani aleleta xitsrhungu lesvaku xitsrhama ahansi. Loko ateke mapawu lawo ya 7, akhensa, amakhemelela, agama amanyiketa vadondzrisiwa vake lesvaku vamaphakela, kutani vamaphakela xitsrhungu. 

7   Handle ka lesvo, ava ni svinhlampfana svingali svingani. Kutani loko asvikatekisile, aleleta lesvaku na svone sviphakeliwa.

8   Kutani vhanu vada, vaxuzra; vagama vateka 7 wa mintsrhava leyikulu ya kutala hi matlhantlha lamangasala.

9   Kutani aku ni kolomu ka 4.000 wa vavanuna. Agama avalelela.

10   Akahlula anhingena abotini ni vadondzrisiwa vake, vanhingena amugangeni wa Dalmanuta.

11   Kutani kuhumelela vafarisi vasungula kuphikisana naye, vaku vajula ahamba singita dzra kupfa tilweni, na vayencela kumudzringa.

12   Kutani akonya svinene amoyeni wake, aku: “Xana lixaka ledzri dzrijulela yini singita? Nihlaya na nitiyisile niku ka n’wine: Aku na singita dzritakakombiwa lixaka ledzri.”

13   Agama asuka avasiya, atlhela anghena abotini, aya atlhelweni ledzrin’wana dzra lwandle.

14   Kambe vadzrivala kuteka mapawu, vakumeka na vangali na nchumu abotini handle ka pawu dzrin’we ntsena.

15   Kutani avabasopisa hi kutiyisa, aku: “Basopani. Tivonelani ka svikukumukisu sva vafarisi ni svikukumukisu sva Heroda.”

16   Kutani vasungula kuholovisana hi mhaka ya lesvi avangali na mapawu.

17   Loko avona lesvo, aku ka vone: “Miholovela yini hilesvi mingeke na mapawu? Moka mingavoni, ni kutwisisa mingatwisisi? Xana timbilu tenu tahatlanyalile?

18   ‘Nhambesvi minga ni matihlo, amivoni? Nambilesvi minga ni tindleve, amiyingeli kee?’ Amidzrimuki?

19   Ankama lowu ningakhemelela ntlhanu wa mapawu ninyika lava 5.000, xana mizrwale mintsrhava yingani ya kutala hi matlhantlha?” Vaku ka yene: “12 wa yone.”

20   “Ankama lowu ningakhemelela mapawu ya 7 ninyika lava 4.000, mizrwale mintsrhava yingani leyikulu ya kutala hi matlhantlha?” Vaku ka yene: “7 wa yone.”

21   Agama aku ka vone: “Ni svosvi amisitwisisa nchumu?”

22   Lesvi vagamiki vanhingena Betsayda. Kutani vamubuyisela mhunu wa kukala angavoni, vamukombela lesvaku amukhumba.

23   Akhomiki mhunu lweyo wa kukala angavoni hi voko, amuhumexa axidoropaneni. Athukela mazri amatihlweni yake, agama amutlhanteka mavoko, aku: “Xi kone uxivonaka?”

24   Alavisa, agama aku: “Nivona vhanu, hikusa svitsrhame ingiki i minsinya leyifambafambaka.”

25   Yesu atlhela akhumba matihlo ya mhunu lweyo, kutani matlhela mavona, ava asungula kuvona minchumu hinkwayu hi kukhanya.

26   Kutani amumukisa akaya kwake, aku: “Unganhingeni amugangeni.”

27   Yesu ni vadondzrisiwa vake vagama vasuka vaya asvidoropaneni sva Khezareya wa Filipi. Na vahali ndleleni, avutisa vadondzrisiwa vake, aku: “Xana vhanu vali ni mani?”

28   Vaku ka yene: “Johani Mubabatisi, kambe van’wana vali Eliya, kasi vambenyana vali u mun’we wa vaprofeta.”

29   Kutani avavutisa, aku: “N’wine, ke? Mili ni mani?” Petrosi amuhlamula, aku: “Hi wene Kriste.”

30   Kutani avabasopisa lesvaku vangachuke vabzela mhunu lesvaku hi yene mani.

31   Agama asungula kuvadondzrisa lesvaku N’wana wa mhunu afanela kutwisiwa tinxanisa tinyingi, adzreliwa hi vakulu ni vaprista lavakulu, ni vatsrali, ava adlayiwa, agama apfuxiwa antsrhaku ka masiku mazrazru.

32   Nakone aavatlhamuxela mhaka leyo alivaleni. Kambe Petrosi amutekela atlhelweni, asungula kumukawuka.

33   Kutani andzruluka alavisa vadondzrisiwa vake, akawuka Petrosi, aku: “Suka kwanga, Sathana! Hikusa lesvi upimisaka svone ahi sva Xikwembu, kambe i sva vhanu.”

34   Agama avitana xitsrhungu ni vadondzrisiwa vake vatsrhindzrekela, aku: “Loko mhunu ajula kunilandzra, aatitsrhike ava azrwala mhandzre yake, anilandzrelela.

35   Hikusa lweyi ajulaka kuhuluxa wutomi bzake atabziluza, kambe lweyi aluzaka wutomi bzake hi mhaka yanga ni madzrungula lamanene atabzihuluxa.

36   Hikusa svimupfuna yini mhunu, loko aganya misava hinkwayu kambe aluza wutomi bzake?

37   Hikusa mhunu anganyikela yini akuva axava wutomi bzake kee?

38   Hikusa lweyi adanaka ha mine ni mazritu yanga amahlweni ka lixaka ledzri dzra wumbuye ni dzra wudohi, N’wana wa mhunu na yene atadana ha yene loko abuya akuphatimeni ka Tatana wake ni tintsrumi ta kuxwenga.”