BRN

1   Atlhela aku ka vone: “Nihlaya na nitiyisile niku ka n’wine: Ku ni van’we amakazri ka lavayimiki la, lavangetikifa ni kutsrongo na vangasivona Mfumu wa Xikwembu wuta hi ntamu.”

2   Antsrhaku ka 6 wa masiku, Yesu ateka Petrosi, Jakobe na Johani, atlhantuka nhava ya kutlakuka na vone wusvavu. Kutani andzrulutiwa amahlweni kwavu.

3   Kutani mpahla yake yihatima ngopfu yikumpaa, sva kuva aku na muhlampsi la misaveni angakotaka kubasisa mpahla yikumpaa kufana na yone.

4   Kugama kuhumelela Eliya na Moxe amahlweni kwavu, vasungula kubula na Yesu.

5   Kutani Petrosi ayangula, aku ka Yesu: “Rabbi, svixongile kuva lani. Kutani ahihambeni minchacha yizrazru: wun’we wuva waku, wun’we wuva wa Moxe, ni wun’we wuva wa Eliya.”

6   Hikusa aangaxitivi ni xa kuhlaya, hilesvi vangachavisa xisvone.

7   Kutani kuhumelela tlavi dzrivafuneketa, kutwala ni zritu atlavini, dzriku: “Lweyi i N’wananga, lwazrandzrekaka. Muyingisetani.”

8   Kutani, hi xichuketa, loko valangusa amatlhelweni, vangahavoni mhunu mun’wana handle ka Yesu na vone.

9   Loko vahaxika hi le nhaveni, avaleleta lesvaku vangachuke vabzela mhunu lesvi vasvivoniki kuyatlhasa loko N’wana wa Mhunu apfuxiwa akufeni.

10   Kutani vabekisile zritu ledzro atimbilwini tavu, kambe avavutisana hi xivone lesvaku kupfuka akufeni i yini.

11   Vagama vamuvutisa, vaku: “Lesvi vatsrali valiki kufanela kuzranga kuta Eliya ke?”

12   Aku ka vone: “Eliya kunene hi yene azrangaka ata, ava atlhelisela hinkwasvu ambangwini wa svone. Kambe xana sviyencekisa kuyini kuva N’wana wa mhunu, svanga hesvi kutsraliwiki ha kone, atwisiwa tinxanisa tinyingi, atlhela adzreliwa?

13   Kambe nimibzela lesvi: Eliya kunene atile, vava vamuyenca hi la avazrandzra ha kone.”

14   Kutani loko vatlhasa ka vadondzrisiwa lavan’wana, vakuma lesvaku aku ni xitsrhungu lexikulu amatlhelweni yavu, ni vatsrali lava avakanetana navu.

15   Kutani, kolanu, loko xitsrhungu hinkwaxu ximuvonile, xitala hi kuhlamala, xitsrutsruma ximuyela, xiyamulosa.

16   Agama avavutisa, aku: “Miphikisana ha yini na vone?”

17   Kutani mun’we ka xitsrhungu amuhlamula, aku: “Mudondzrisi, nibuyise n’wananga ka wene hikusa a ni moya wumutsimbaka kuvulavula.

18   Nakone loko wumusungula, wumutlatlalatela ahansi, atlhutlha duvi, atilumetela matinyo, agama awoma svizro. Nitetakombela vadondzrisiwa vaku lesvaku vawuhlongola, kambe vahlulekile.”

19   Amuhlamula, aku: “Heyi n’wine, lixaka ledzringeke na lipfumelo. Xana nitava na n’wine kuyatlhasa siku muni? Nitamilehisela mbilu kuyatlhasa siku muni? Mubuyisani halenu.”

20   Kutani vamuyisa ka Yesu. Kambe, wonamuvona, moya wotekela kumuchukuvanyisa, kutani awa hansi, apuluvundzreka, na atlhutlha duvi.

21   Kutani Yesu avutisa tatana wake, aku: “Svimusungule siku muni lesvi?” Aku: “Kusukela awutsrongwaneni.

22   Nakone wutalisa kumutlatlalatela andzrilweni ni le matini na wujula kumudlaya. Kambe loko usvikota kuyenca xanchumu, hitwele wusiwana uhipfuna.”

23   Yesu aku ka yene: “‘Loko usvikota’! Hinkwasvu svakoteka ka lweyi apfumelaka.”

24   Kolanu, tatana wa n’wana lweyo abandlukana, aku: “Napfumela! Nipfune loko nipfumala lipfumelo!”

25   Kutani loko Yesu avona lesvaku xitsrhungu xitsrutsruma ximubuyela, atshinya moya lowunyamiki, aku ka wone: “Wene moya wa kukala wungavulavuli ni kuyingela, nakuleleta, nili: Huma ka yene, funtsrhi ungahaphindhi unhingena ka yene!”

26   Kutani moya wubandlukana, wuyenca n’wana lweyo achukuvanya kanyingi, wugama wuhuma. Ahamba ingiki efa, kutani vanyingi vaku: “Afile!”

27   Kambe Yesu amukhoma hi voko amusekelekisa, ayima hi minenge yake.

28   Kutani loko anhingene ka muti wa kukazri, vadondzrisiwa vake vamuvutisa hi tlhelo, vaku: “Hihluleke hayini kuwuhlongola?”

29   Aku ka vone: “Muxaka lowu wungehumi loko kungali hi xikhongoto.”

30   Kutani vasuka kone, vakhaluta hi le Galileya, kambe aangajuli lesvaku svitiviwa hi mhunu.

31   Hikusa aadondzrisa vadondzrisiwa vake, aku ka vone: “N’wana wa mhunu ataxavisiwa amavokweni ya vhanu, vamudlaya. Kambe, antsrhaku ka masiku mazrazru na adlayiwile, atapfuka.”

32   Kutani avayitwisisanga mhaka leyi, kambe vachave kumuvutisa.

33   Vagama vanhingena Kapernawume. Loko anghene andlwini, avavutisa, aku: “Amidokadokisana ha yini andleleni?”

34   Kutani vamiyela vakuntse, hikusa andleleni avadokadokisana hi lesvaku i mani lwenkulu ka vone.

35   Kutani atsrhama ahansi, avitana lava 12, aku ka vone: “Loko mhunu ajula kuva wa kusungula, afanela kuva lwewa wugamu wa kone atlhela atizrela hinkwavu lavan’wana.”

36   Agama ateka xitsrongotwana axibeka amakazri kwavu; axitlakula, aku ka vone:

37   “Mani na mani lwayamukelaka xin’we xa svitsrongotwana lesvi hi vito dzranga, na mine awaniyamukela; nakone mani na mani lwaniyamukelaka, angayamukeli mine ntsena kambe ayamukela ni Lweyi anizrumiki.”

38   Johani amuyangula, aku: “Mudondzrisi, hivone mhunu na ahlongola mademona hi vito dzraku, kambe himutsimbisile, hikuva aangahilandzri.”

39   Kambe Yesu aku: “Mingamutsimbisi, hikusa aku na mhunu lwatakayenca singita dzra kukazri hi vito dzranga atakakahlula ajika anizruka.

40   Hikusa mani na mani lwangalwikiki na hine ayima na hine.

41   Nakone mani na mani lwamihananaka xinwelo xa mati ya kunwa hilesvi minga vhanu va Kriste, Nihlaya na nitiyisile niku ka n’wine: Angaka angaluzi hakelo dzrake ni kutsrongo.

42   Kambe mani na mani lwakhunguvanyisaka mun’we wa lavatsrongo lavanga ni lipfumelo, asvitamuyampsela vateka zribze dzra kugaya ledzrikokiwaka hi mbongolo, vatsrimbelela anhan’wini yake, vagama vamucukumeta alwandle.

43   “Loko voko dzraku dzrikudohisa, dzritsreme. Svayampsa unhingena awuton’wini na ukiyela xizro kutlula kuyisiwa na u ni mavoko mabidzri Xikheleni xa Kuhelisiwa, andzrilweni lowu wungatimekikiki.

44   --

45   Ni loko nkondzro waku wukudohisa, wutsreme. Svayampsa unhingena awuton’wini na ukiyela xizro kutlula kucukumetiwa na u ni minkondzro yibidzri Xikheleni xa Kuhelisiwa.

46   --

47   Ni loko tihlo dzraku dzrikudohisa, dzricukumete. Svayampsa unhingena amfun’wini wa Xikwembu na u ni tihlo dzrin’we kutlula kucukumetiwa na u ni matihlo mabidzri Xikheleni xa Kuhelisiwa,

48   lomu timpetu ta kone tikalaka tingafi, ni ndzrilo wa kone wukalaka wungatimeki.

49   “Hikusa mun’wana ni mun’wana atalungiwa hi ndzrilo.

50   Munyu i wunene, kambe loko munyu wopshama, xana wutanandzrikisiwa ha yini? Tsrhamani na mi ni munyu andzreni kwenu, mihanyisana hi kuzrula.”