-
Matewu 1
1 Buku dzra tinxaka ta Yesu Kriste, n’wana Davhida, n’wana Abrahamu:
2 Abrahamu apsale Izaki,
kutani Izaki apsala Jakobe;
Jakobe apsala Juda ni vamakwavu;3 Juda apsala Perezi na Zera,
lavahumiki akhuzrini dzra Tamari;
Perezi apsala Hesroni;
Hesroni apsala Aramu;4 Aramu apsala Aminadabe;
Aminadabe apsala Nasoni;
Nasoni apsala Salmoni;5 Salmoni apsala Bowazi, lwahumiki akhuzrini dzra Rahabi;
Bowazi apsala Obede, lwahumiki akhuzrini dzra Ruti;
Obede apsala Jese.6 Jese apsala Hosi Davhida;
Davhida apsala Salomoni, lwahumiki akhuzrini dzra nsati wa Uriya;7 Salomoni apsala Rehobowamu;
Rehobowamu apsala Abija;
Abija apsala Asa;8 Asa apsala Jehosofati;
Jehosofati apsala Jehoramu;
Jehoramu apsala Uziya;9 Uziya apsala Jotamu;
Jotamu apsala Akazi;
Akazi apsala Hezekiya;10 Hezekiya apsala Manase;
Manase apsala Amoni;
Amoni apsala Josiya;11 Josiya apsala Jekoniya ni vamakwavu hi nkama lowu vayisrayele vayisiwiki ha wone Babilona.
12 Antsrhaku ka kuyisiwa Babilona, Jekoniya apsala Selatiyele;
Selatiyele apsala Zerubabele;13 Zerubabele apsala Abiyudi;
Abiyudi apsala Eliyakimi;
Eliyakimi apsala Azori;14 Azori apsala Zadoki;
Zadoki apsala Akimi;
Akimi apsala Eliyudi;15 Eliyudi apsala Eliyazari;
Eliyazari apsala Matani;
Matani apsala Jakobe;16 Jakobe apsala Josefa, nuna wa Mariya, lwaviki mamana wa Yesu, lwavitaniwaka Kriste.
17 Xilesvo, tinxaka hinkwatu kusukela ka Abrahamu kuyatlhasa ka Davhida atili 14 wa tone; kusukela ka Davhida kuyatlhasa ankameni lowu vayisrayele vayisiwiki ha wone Babilona, 14 wa tinxaka; kusukela ankameni lowu vayisrayele vayisiwiki ha wone Babilona kuyatlhasa ka Kriste, 14 wa tinxaka.
18 Kutani mapsaliwela ya Yesu Kriste mayencekise xilesvi: Antsrhaku ka loko mamana wake, Mariya, adumbisiwe muchatu hi Josefa, akume nyimba hi kola ka moya wa kuxwenga, na vangesihanya xikan’we.
19 Kambe, lesvi nuna wake, Josefa, aalulamile ni lesvi aangajuli kumudanisa avhanwini, aapimisa kumutsrhika axihundleni.
20 Kambe, kuteloko apimise lesvo, ohumeleliwa hi ntsrumi ya Jehovha anozrweni, yiku: “Josefa, n’wana Davhida, ungachavi kutitekela nkataku, Mariya, uyahanya naye, hikusa nyimba leyi anga nayu yipfela ka moya wa kuxwenga.
21 Atapsala n’wana wa jaha. Utamuchula Yesu, hikusa atahuluxa tiko dzrake asvidohweni sva dzrone.”
22 Kutani lesvi hinkwasvu sviyencekile akuva kuhetiseka lesvihlayiwiki hi Jehovha hi kutizrisa muprofeta wake, aku:
23 “Lavisani! Mun’we wa n’hwanyana atakuma nyimba, apsala jaha. Kutani vatamuchula Emanwele (lesvi, loko svindzrulutiwa hi lidzrimi dzrin’wana, sviliki “Xikwembu xi na hine”).”
24 Kutani Josefa apfuka awuzrongweni ayencisa xilesvi ntsrumi ya Jehovha yimuleletisiki xisvone; ateka nkatake ayahanya naye.
25 Kambe angayetlelanga naye ako aphuluka n’wana wa jaha; kutani amuchula vito dzra Yesu.