-
Matewu 11
1 Loko Yesu ahete kunyika svileleto vadondzrisiwa vake lava 12, asuke lanu ayadondzrisa ni kuzrezra amadoropeni yavu.
2 Kambe loko Johani ayingela mintizro ya Kriste na ali jele, azrumela vadondzrisiwa vake,
3 vayamuvutisa, vaku: “Hi wene Lweyi ataka, kumbe hifanela kuyimela mun’wana kee?”
4 Yesu avahlamula, aku: “Fambani miyadzrungulela Johani lesvi misviyingelaka ni lesvi misvivonaka:
5 Lava kuka vangavoni vavona; ni lava kukhuta vafamba hi minenge yavu; ni lava nhlokonho vabasisiwa; ni lavapfalekiki tindleve vayingela; ni vafi vapfuxiwa; ni svisiwana svibzeliwa madzrungula lamanene.
6 Nyonxani ka lwakalaka angakhunguvanyeki hi mhaka yanga!”
7 Kutani ankama lowu vasukaka, Yesu asungula kukhanela ni svitsrhungu hi Johani, aku: “Mihume miyavona yini amananga? Miyevona lihlanga na dzritsrekatsrekisiwa hi moya kee?
8 Ina ka, i yini lexi mihumiki miyaxivona? I mhunu lwayambaliki sviyambalu sva kudula? Phela ka, lavayambalaka sviyambalu sva kudula vatsrhama tindlwini ta tihosi.
9 Ina ka, amihumela yini? Kuyavona muprofeta? Ina, nimibzela lesvi: Ni wa kutlula ngopfu muprofeta.
10 Lweyi hi lweyi kutsraliwiki ha yene lesvi: ‘Lavisani! Nizrumela muzrumiwa wanga amahlweni kwanga, lweyi atakalulamisela ndlela yaku amahlweni kwaku!’
11 Nihlaya na nitiyisile niku ka n’wine: Amakazri ka lavapsaliwiki hi vavasati, akungihumelela mhunu wa kutlula Johani Mubabatisi hi wukulu. Kambe lwentsrongo, amfun’wini wa matilo, awamutlula hi wukulu.
12 Kusukela amasikwini ya Johani Mubabatisi kutatlhasa svosvi, Mfumu wa matilo i nchumu lowu vhanu valwelaka kuwukuma, kutani lava vatihitaka vawukuma.
13 Hikusa hinkwavu vaprofeta ni Nawu vaprofete vayagamela ka Johani;
14 kutani loko mijula kusvipfumela, pfumelani: Hi ye Eliya lwataka.’
15 Lweyi anga ni tindleve aayingisete.
16 “Xana lixaka ledzri nitadzrifanisa na yini? Dzrifana ni vatsrongwana lavatsrhamiki lomuya bazara, vavitanaka vanghanu,
17 vaku: ‘Himichayele ximpompompo, kambe n’wine amikinanga; hitlhave lisimu dzra le kufeni, kambe n’wine amidzrilanga.’
18 Hikuva, Johani ate na angadi nhambi kunwa, kambe vhanu vali: ‘A ni demona.’
19 N’wana wa Mhunu ate na ada atlhela anwa, kambe vhanu vali: ‘Hingavonani mhunu wa magolo ni wa kuzrandzra kunwa vhinyo, munghanu wa vahakelisi va tinemba ni vadohi!’ Nhambitanu, lexikombisaka lesvaku wutlhazri bzilulamile i mintizro ya bzone.”
20 Ankameni lowo, asungula kusola madoropa lawa ntalu wa masingita yake mangahambeliwa kone, hikusa amatisolanga, aku:
21 “Yowee, Korazini! Yowee, Betsayda! Hikusa loko masingita lamayencekiki atikweni dzrenu ameyenceka Tire na Sidoni, inhaka matisole khale na mayambale masaka matlhela maticheletela nkuma.
22 Kambe nili ka n’wine: Svitavevuka ka Tire na Sidoni hi siku dzra yavanyiso kutlula ka n’wine.
23 Na wene, Kapernawume, ungetitlakuxeliwa atilweni; utafulamela Sizreni. Hikusa loko masingita lamayencekiki atikweni dzraku ameyenceka atikweni dzra Sodoma, inhaka dzrahali kone kutlhasa ni namunhla.
24 Kambe nili ka n’wine: Svitavevuka ka tiko dzra Sodoma hi siku dzra yavanyiso kutlula ka n’wine.”
25 Kutani Yesu ayangula, aku: “Nakudzrumisa, Tatana, Hosi ya tilo ni misava, hikusa ufihlele tintlhazri ni tintivi minchumu leyi kambe uyipaluxele vatsrongwana.
26 Ina, Tatana, hikusa usvinyonxele hi ndlela yoleyo.
27 Hinkwasvu svinyiketiwe mine hi Tatana wanga, kutani anga kone lwativaka N’wana handle ka Tatana; nakone anga kone lwativaka Tatana handle ka N’wana, ni lweyi N’wana anyonxelaka kumukomba yene.
28 Tanani kwanga, hinkwenu n’wine mifomaka hi kutizra, na n’wine mibindzriwaka, nitamiwisisa.
29 Zrwalani mpinga wanga mitlhela midondzra ka mine, hikusa ni mhunu wa kuzrula ni wa kutitsrongahata, kutani mitakuma kupepa amahikeni yenu.
30 Hikusa mpinga wanga wanabzala, ni ntsrhwalu wanga wavevuka.”