BRN

1   Ankameni lowo, Yesu akhaluta hi le masin’wini ya tirigu hi Savata. Kambe vadondzrisiwa vake avatwa ndlala, kutani vasungula kukhaya mimoko vada.

2   Loko vavona lesvi, vafarisi vaku ka yene: “Hingalavisa! Vadondzrisiwa vaku vayenca sva kuka svingapfumeleliwi kusviyenca hi Savata.”

3   Aku ka vone: “Amidondzranga lesvi Davhida asviyenciki loko yene ni masocha yake vatwa ndlala?

4   Anhingene andlwini ya Xikwembu, ada navu makati ya magandzrelo, svinga lesvi asvingapfumeleliwi kuva yene kumbe lava avali naye vada, handle ka vaprista ntsena!

5   Kumbe amidondzranga abukwini dzra Nawu lesvaku hi masiku ya Savata vaprista lavanga tempeleni vatlula nawu wa Savata kambe avahlayeliwi nandzru?

6   Kambe namibzela lesvaku lani ku ni wa kutlula ni tempele hi wukulu.

7   Kambe, loko ametwisisa lesvaku majula kuhlaya yini mazritu lamaliki: ‘Lexi nixijulaka i timpsalu, kungali xitlhavelo’, inha mingasolanga lavangeke na nandzru.

8   Hikusa N’wana wa Mhunu i Hosi ya Savata.”

9   Loko asuke kone, anhingena asinagogeni dzravu.

10   Kutani akuma lesvaku ku ni mhunu lwakhwanyaliki voko! Kutani vamuvutisa, navajula kumuzrwexa nandzru, vaku: “Svapfumeleliwa kuhanyisa hi Savata?”

11   Aku ka vone: “I mani amakazri kwenu lweyi, loko yin’we ya tihamba take yopela axikheleni hi Savata, angeke na kuyikhoma ayihumexa?

12   Mhunu a ni lisima dzrikulu ngopfu svinene kutlula hamba! Xilesvo, svapfumeleliwa kuyenca nchumu lowunene hi Savata.”

13   Kutani aku ka mhunu lweyo: “Nalavuta voko.” Lesvi adzrinalavutiki; kutani dzriwololoka dzrihanya kufana ni ledzrin’wana.

14   Kambe vafarisi vahuma vayamulukela xikungu xa kumudlaya.

15   Kuteloko Yesu asvitivile, asuka kolanu. Kambe vanyingi vamulandzra, kutani avadaha hinkwavu,

16   kambe avaleleta svinene lesvaku vangamupaluxi,

17   akuva kuhetiseka lesvihlayiwiki hi muprofeta Ezaya, lwatiki:

18   “Mamuvona nandzra wanga, lweyi nimulangiki, muzrandzriwa wanga, lweyi hika dzranga dzrinyonxaka ha yene! Nitabeka moya wanga ahenhla kwake, kutani atadzrungulela matiko wululami.

19   Angetiholova kumbe kubandlukana, nhambi zritu dzrake dzringetiyingeliwa hi mhunu asvitaratwini.

20   Lihlanga ledzritsrhovekiki, angetidzripfatlanya, ni xiphefu lexifumfunhaka, angetixitima, ako ayenca wululami bzihlula.

21   Nakone vhanu va matiko vatadumba vito dzrake.”

22   Ankameni lowo, vamubuyisela mhunu lweyi aa ni demona, wa kuka angavoni kumbe kukhanela; kutani amudaha. Mhunu wa kuka angakhaneli asungula kukhanela ni kuvona.

23   Kutani svitsrhungu hinkwasvu svihlamala, sviku: “Njhe, lweyi ahi yene N’wana Davhida?”

24   Loko vasviyingela, vafarisi vaku: “Lweyi, ntamu lowu ahlongolaka mademona ha wone ahi wumbeni handle ka wa Belzebule, hosi ya mademona.”

25   Hi kutiva mimpimiso yavu, aku ka vone: “Mfumu wun’wana ni wun’wana lowuyavaniki wutasala na wuli zrumbi, nakone doropa dzrin’wana ni dzrin’wana kumbe yindlu yin’wana ni yin’wana leyiyavaniki ayi na kutiya.

26   Nakone, loko Sathana ahlongola Sathana, ayavanile; ke, mfumu wake wutatiyisa kuyini?

27   Nakone, loko mine nihlongola mademona ha Belzebule, vana venu vamahlongola ha mani? Hi mhaka yoleyi vatakamiyavanyisa.

28   Kambe loko nihlongola mademona hi moya wa Xikwembu, ke, Mfumu wa Xikwembu wumitlhaselile.

29   Kumbe, xana mhunu angapfhanyisa kuyini yindlu ya mhunu wa ntamu ateka minchumu yake na angazranganga hi kumutsrimba? Hi kone angaphangaka yindlu yake.

30   Lweyi angayimikiki na mine alwa na mine, nakone lweyi angahlengeletikiki na mine awahangalasa.

31   “Hi mhaka leyi nili ka n’wine: Svidoho ni svizruku hinkwasvu sva vhanu svitadzrivaleliwa, kambe xizruku xa kuzruka moya xingetidzrivaleliwa.

32   Nakone, lweyi asandzraka N’wana wa Mhunu atadzrivaleliwa; kambe lweyi asandzraka moya wa kuxwenga, angetidzrivaleliwa, nhambi ka misava ya nkama lowu, nhambi ka leyitaka.

33   “Nsinya, wuyencani wunene, kutani mihandzru ya wone yitava yinene, kumbe miwuyenca wa kubola, kutani mihandzru ya wone yiva ya kubola; hikusa nsinya wutiviwa hi mihandzru ya wone.

34   Vana va svipshahla, xana mingakhanelisa kuyini minchumu leyinene na kasi mibihile? Hikusa nomu wukhanela lesvi mbilu yitaliki ha svone.

35   Mhunu lwenene ahumexa minchumu leyinene awukosini bzake lebzinene, kasi mhunu wa kubiha ahumexa minchumu ya kubiha awukosini bzake bza kubiha.

36   Nimibzela lesvaku hi siku dzra yavanyiso vhanu vatavutisiwa hi mhaka ya zritu dzrin’wana ni dzrin’wana dzra kuka ndlela ledzri vadzrivulavulaka;

37   hikusa utahlayiwa lesvaku ululamile hi kola ka mazritu yaku, nakone utahlayiwa lesvaku ubihile hi kola ka mazritu yaku.”

38   Kutani, van’we va vatsrali ni vafarisi vamuyangula, vaku: “Mudondzrisi, hijula uyenca singita hi kuvona.”

39   Avahlamula aku ka vone: “Lixaka dzra kubiha ni dzra wumbuye dzrili dzrijula singita, kambe dzringetinyikiwa singita ni dzrin’we handle ka singita dzra muprofeta Jonasi.

40   Hikusa svanga hesvi Jonasi aviki akhuzrini dzra nhlampfi leyikulu masiku mazrazru ni wusiku bzizrazru, na ye N’wana wa Mhunu atava ndzreni ka misava masiku mazrazru ni wusiku bzizrazru.

41   Vhanu va le Ninivha vatapfuka akuyavanyisiweni ni lixaka ledzri vava vadzritsremela xikhatiso, hikusa vone vatisolile loko Jonasi azrezra. Kambe lavisani, kolani ku ni lweyi atlulaka Jonasi hi wukulu.

42   Nkosikazi ya nyingitimu yitapfuxiwa akuyavanyisiweni ni lixaka ledzri yiva yidzritsremela xikhatiso, hikusa yite hi le matikweni ya le kule ya misava akuva yitatayingiseta wutlhazri bza Salomoni. Kambe lavisani, kolani ku ni lweyi atlulaka Salomoni hi wukulu.

43   “Loko moya lowunyamiki wuhuma ka mhunu, wukhaluta hi le mimbangwini leyingeke na mati na wujula mbangu wa kuwisela ka wone, kambe wungawukumi.

44   Kutani wuku: ‘Nitatlhelela akaya kwanga lomu nizruzriki kone.’ Kutani loko wutlhasa, wukuma yindlu na yili phanga, yikukuliwe yibasa yitlhela yixongisiwa.

45   Kutani wufamba wuyateka mimoya yimbeni ya 7 ya kubiha ngopfu kutlula wone, kutani yinhingena ndzreni, yitsrhama kone; kutani xiyimu xa wugamu xa mhunu lweyo xibiha ngopfu kutlula lexa kusungula. Hi svosvi svitakayencekisa xisvone ka lixaka ledzri dzra kubiha.”

46   Ate na ahakhanela ni svitsrhungu, kotlhasa mamana wake ni vamakwavu vayima handle, na vajula kukhanela naye.

47   Kutani mun’we aku ka Yesu: “Lavisa, mamana waku ni vamakwenu veyima hala handle, vajulaka kukhanela na wene.”

48   Kutani amuhlamula, aku: “Mamana wanga hi mani, ni vamakwezru hi vamani?”

49   Agama akombeta vadondzrisiwa vake hi voko, aku: “Mamuvona mamana wanga ni vamakwezru!

50   Hikusa lweyi ayencaka kuzrandzra ka Tatana wanga lwanga tilweni, hi yelweyo anga makwezru wa xinuna, ni makwezru wa xisati, ni mamana wanga.”