BRN

1   Hi siku ledzro, Yesu asuka andlwini ayatsrhamisa kusuhi ni lwandle.

2   Vhanu lava avahlengeletane ka yene avatale ngopfu svinene lakakuva anhingena abotini atsrhamisa kone, kutani xitsrhungu hinkwaxu xiyima ankingeni wa lwandle.

3   Kutani avabzela minchumu ya kutala hi kutizrisa svifaniso, aku: “Masvivona! Kuhume mubzali ayabzala.

4   Ankama lowu abzalaka, timbewu tin’we tiwela kusuhi ni ndlela, kutani tinyanyana tibuya tida timbewu hinkwatu.

5   Tin’wana tiwela ka mimbangu ya mazribze lomu kungeke na misava yinyingi, kutani titekela kumila hikusa misava ayingali yinyingi.

6   Kambe loko kuhuma dambu, tipsha tiva tibuna hikusa atingali na mitsru.

7   Tin’wana tiwela amakazri ka mitwa, kutani mitwa yikula yititlimba.

8   Kasi letin’wana tiwele ka misava leyinene, kutani tisungula kubeka mihandzru: leyi yibeka 100, leyiya 60, leyin’wana 30.

9   Lweyi anga ni tindleve aayingisete!”

10   Kutani vadondzrisiwa vatsrhindzrekela, vaku ka yene: “Hayini ukhanela ni vhanu lava hi svifaniso?”

11   Avahlamula, aku: “N’wine minyikiwe kutwisisa svihundla sva Mfumu wa matilo, kambe vone avanyikiwanga.

12   Hikusa, lweyi anga nasvu atanyikiwa svin’wana, ava ni sva svinyingi; kambe lweyi angeke nasvu, nhambi lesvi anga nasvu atatekeliwa svone.

13   Hi yone mhaka leyi nikhanelaka navu hi svifaniso; hikusa nhambi vavona, avavoni; nhambi vayingela, avayingeli nhambi kutwisisa nchumu.

14   Kutani ka vone, kuhetiseka wuprofeta bza Ezaya, lebziliki: ‘Kuyingela, mitayingela kambe mingetisvitwisisa; nakone kulavisa, mitalavisa kambe mingetisvivona.

15   Hikusa mbilu ya tiko ledzri yitlanyalile, kutani hi tindleve tavu avayingeli ha hombe; nakone vasvonye matihlo, akuva vangetichuka vavona hi matihlo yavu, ni kuyingela hi tindleve tavu vava vatwisisa hi mbilu, vagama vandzruluka, mine nivadaha.’

16   “Kambe, ma ni njombo matihlo yenu hikusa mavona, ni tindleve tenu hikusa tayingela!

17   Hikusa Nihlaya na nitiyisile niku ka n’wine: Vaprofeta vanyingi ni valulami vanyingi vasvinavelile kuvona lesvi n’wine misvivonaka, kambe avasvivonanga, ni kuyingela lesvi n’wine misviyingelaka, kambe avasviyingelanga.

18   “Xilesvo, n’wine yingisetani xifaniso xa mubzali.

19   Mani na mani lwayingelaka zritu dzra Mfumu kambe angadzritwisisi, kuta Mubihi atatawutla lesvibzaliwiki ambilwini yake; lweyi i mbewu leyi yibzaliwiki kusuhi ni ndlela.

20   Kasi leyibzaliwiki amimbangwini ya mazribze, yone hi lweyi ayingelaka zritu, ava atekela kudzriyamukela hi kunyonxa.

21   Nhambitanu, anga na mitsru andzreni kwake; kambe atsrhama nkamanyana ntsena, kutani loko kuyata nhlomulo kumbe nxaniso hi mhaka ya zritu, otekela kuwa.

22   Kutani mbewu leyibzaliwiki amakazri ka mitwa, leyi hi lweyi ayingelaka zritu, kambe kukazrateka ka misava leyi ni kukanganyisa ka wukosi svitlimba zritu, kutani angabeki mihandzru.

23   Kambe mbewu leyibzaliwiki amisaveni leyinene, i mhunu lweyi ayingelaka zritu atlhela adzritwisisa, lweyi kunene abekaka mihandzru ava abindzrula: lweyi abindzrula 100, lweyiya 60, lwemun’wana 30.”

24   Avabzela xifaniso xin’wana, aku: “Mfumu wa matilo wungafanisiwa ni mhunu lweyi abzaliki mbewu leyinene amasin’wini yake.

25   Kutani, ankama lowu vhanu vayetleliki, kubuya nala wake abzala bzanyi amakazri ka tirigu, asuka afamba.

26   Kutani loko svibewu svizrumbuka svibeka mihandzru, na bzo bzanyi bzohumelela.

27   Kutani malandzra ya n’winyi wa muti mata, maku ka yene: ‘Hosi, xana awubzalanga mbewu leyinene amasin’wini yaku? Ke, sviyencekisa kuyini kuva mava ni bzanyi?’

28   Aku ka vone: ‘Ku ni mhunu wa kukazri, wa nala, angayenca lesvo.’ Malandzra maku ka yene: ‘Ke, wasvijula hifamba hiyabzisusa?’

29   Aku: ‘Ihina, hikusa, ankama lowu mitsruvulaka bzanyi, mingachuka mitsruvula ni tirigu.

30   Svitsrhikani svikula xikan’we ha svibidzri kuko kutlhasa nkama wa ntsrhovelo. Hi nkama wa ntsrhovelo nitabzela vatsrhoveli, niku: Zrangani hi kususa bzanyi mibzitsrimbelela hi tinyandzra mibzihisa; migama mihlengeleta tirigu axitlhanteni xanga.’”

31   Avabzela xifaniso xin’wana, aku: “Mfumu wa matilo wufana ni nhleke ya sinapi leyi mhunu ayitekiki ayibzala ansin’wini yake;

32   leyi, kunene, yinga leyitsrongo ka timbewu hinkwatu, kambe loko yikulile, yitlula svimila hinkwasvu sva le masin’wini, yigama yihamba nsinya, lakakuva tinyanyana ta tilo tibuya tiyaka svisaka sva tone amazravini ya wone.”

33   Avabzela xifaniso xin’wana aku: “Mfumu wa matilo wufana ni svikukumukisu lesvi wansati asvitekiki asvipfuva ni mimbenga yizrazru ya tirigu dzriza dzrikukumuka hinkwadzru.”

34   Yesu akhanele ni svitsrhungu minchumu leyi hinkwayu hi kutizrisa svifaniso. Kunene, aangakhaneli navu na angatizrisi xifaniso,

35   akuva kutahetiseka lesvihlayiwiki hi muprofeta lwatiki: “Nitapfula nomu wanga hi svifaniso; nitatwalisa minchumu leyifihlekiki kusukela akusunguleni.”

36   Kutani alelela svitsrhungu, agama anhingena ndlwini. Vadondzrisiwa vake vamubuyela, vaku: “Hitlhamuxele xifaniso xa bzanyi amasin’wini.”

37   Kutani avahlamula, aku: “Mubzali wa mbewu leyinene i N’wana wa Mhunu;

38   kutani nsimu i misava. Kasi mbewu leyinene, lava i vana va Mfumu, kambe bzanyi i vana va Mubihi,

39   kasi nala lweyi avabzaliki i Diyavulosi; kutani ntsrhovelo i kuhela ka misava, kasi vatsrhoveli i tintsrumi.

40   Xilesvo, svanga hesvi bzanyi bzihlengeletiwaka bzihisiwa andzrilweni, svitava tanu akuheleni ka misava ya nkama lowu.

41   N’wana wa Mhunu atazrumela tintsrumi take, kutani titahlengeleta amfun’wini wake hinkwasvu lesviwisanaka ni vhanu lavayencaka sva kubiha,

42   tivacukumetela andzrilweni lowukulu. Hi lanu vatakadzrila kone vatlhela vaketsrela matinyo.

43   Ankameni lowo, lavalulamiki vataphatima kufana ni dambu amfun’wini wa Tatana wavu. Lweyi anga ni tindleve aayingisete!

44   “Mfumu wa matilo wufana ni wukosi lebzifihliwiki ansin’wini, lebzi mhunu abzitsrumbuliki, abzifihla; kutani hi mhaka ya lesvi aanyonxise xisvone, afamba ayaxavisa hinkwasvu lesvi anga nasvu, axava nsimu leyo.

45   “Nakone, Mfumu wa matilo wufana ni muxavisi lwafambafambaka ajula tindzralama ta lisima.

46   Kutani loko akume ndzralama yin’we ya kudula svinene, asuka ayaxavisa minchumu hinkwayu leyi aali nayu, axava ndzralama leyo.

47   “Nakone, Mfumu wa matilo wufana ni nkukutu lowupetiwiki alwandle, wuhlengeleta tinhlampfi ta mixaka hinkwayu.

48   Loko wutalile, vawukoka wubuya asaveni, kutani vatsrhama, vahlengeleta leta tinene asvibzeni; kambe letingeke tinene, vaticukumeta.

49   Hi lesvi svitakava xisvone awugan’wini bza misava ya nkama lowu. Tintsrumi titahuma tihlawula vabihi amakazri ka valulami,

50   tivacukumetela ka mududumela lowukulu. Hi lanu vatakadzrila kone vatlhela vaketsrela matinyo.

51   “Misvitwisisile lesvi hinkwasvu?” Vaku: “Ina.”

52   Kutani aku ka vone: “Hi mhaka yoleyo, mudondzrisi wini na wini wa matsralwa lwadondzrisiwaka timhaka ta Mfumu wa matilo afana ni mhunu, lweyi anga n’winyi wa muti, lweyi ahumexaka minchumu ya nyiwana ni ya khale awukosini bzake.”

53   Kutani loko Yesu ahete svifaniso lesvi, asuka lomu aali kone.

54   Kuteloko anhingene atikweni dzra le kwavu, asungula kuvadondzrisa asinagogeni dzravu, lakakuva vatala hi kuhlamala, vaku: “Xana mhunu lweyi abzikume kwini wutlhazri lebzi ni ntamu wa kuyenca masingita lawa?

55   Xana lweyi ahi yene n’wana wa muvatli? Xana mamana wake ahi yene Mariya, ni vamakwavu ahi vone Jakobe, na Josefa, na Simoni, na Juda?

56   Ni vamakwavu va xisati, ahi vone lavanga na hine lani? Ke, lesvi hinkwasvu, asvikume kwini?”

57   Vakhunguvanyeka hi mhaka yake. Kambe Yesu aku ka vone: “Muprofeta akombiwa xichavu hi vhanu hinkwavu, kambe va le tikweni dzrake ni le kaya kwake avamuhlayeli nchumu.”

58   Kutani angayencanga masingita manyingi kone hilesvi avange na lipfumelo.