-
Matewu 14
1 Ankameni lowo, Heroda, hosi ya xifundzra, ayingela ndhuma ya Yesu.
2 Kutani aku ka malandzra yake: “Lweyi i Johani Mubabatisi. Apfuxiwe akufeni; kutani hi svosvo svimuyencaka akota kuhamba masingita lawa.”
3 Hikusa Heroda aakhome Johani amutsrimba, agama amupfalela jele hi mhaka ya Herodiya, nsati wa Filipi, makwavu.
4 Hikusa Johani aatsrhama hi ku: “Asvipfumeleliwi kuva umuteka.”
5 Kambe, nhambilesvi aajula kumudlaya, aachava xitsrhungu, hikusa axiku i muprofeta.
6 Kambe loko kuhambiwa nkhuvu wa kutlhanganisa ka malembe ya kupsaliwa ka Heroda, n’wana wa xisati wa Herodiya ayile ayavakinela, kutani anyonxisa Heroda svinene,
7 lakakuva adumbisa hi kufunga kumunyika xini na xini atokoxikombela.
8 Kutani, hi kuhlohloteliwa hi mamana wake, aku: “Ninyike kola nhloko ya Johani Mubabatisi hi bandecha.”
9 Kutani, nhambilesvi hosi ayivavisekile, hi mhaka ya lesvi yingafunga ni hi mhaka ya vazrambiwa, yileleta lesvaku vamunyiketa yone.
10 Kutani avazruma vayatsrema nhloko ya Johani ajele.
11 Kutani vabuyisa nhloko yake hi bandecha vanyika lwewa n’hwanyana, kutani yene ayibuyisa ka mamana wake.
12 Antsrhaku kuta vadondzrisiwa vake vasusa ntsrumbu wake vayawulahla; vagama vabuya vadzrungulela Yesu.
13 Kuteloko asviyingela, Yesu asuka lomu aali kone hi boti aya ambangwini wa mananga wusvake. Kambe loko svitsrhungu svisviyingelile, svihuma amadoropeni svimulandzra hi minenge.
14 Loko atlhasa ankingeni wa lwandle, avona xitsrhungu xa xikulu. Kutani axitwela wusiwana, adaha timbabzi amakazri ka xone.
15 Kambe loko madambu matlhasa, vadondzrisiwa vake vamubuyela, vaku: “Mbangu lowu wule kule ni vhanu nakuve nkama kutani wufambile. Ntsrhunxa vhanu lava vafamba, akuva vaya svidoropanini vayatixavela svakuda.”
16 Kambe, Yesu aku ka vone: “Asvikombeli kuva vasuka; vanyikani n’wine svakuda.”
17 Kutani vaku ka yene: “Ahi na nchumu la handle ka ntlhanu wa mapawu ni tinhlampfi tibidzri.”
18 Kutani aku: “Svibuyisani halenu kwanga.”
19 Aleleta svitsrhungu svitsrhama abzanyini. Kutani ateka mapawu laya ntlhanu ni tinhlampfi tibidzri, alavisa atilweni, asvikatekisa; agama akhemelela mapawu amanyiketa vadondzrisiwa, kutani vadondzrisiwa vamanyiketa svitsrhungu.
20 Hi ndlela leyo hinkwavu vada, vaxuzra; vateka matlhantlha ya kutata 12 wa mintsrhava.
21 Kutani lavadiki avali kusuhi ni 5.000 wa vavanuna, handle ka vavasati ni vatsrongwana.
22 Kutani, hi kukahlula, abzela vadondzrisiwa vanhingena abotini akuva vapfa vazranga vaya halahaya ka lwandle, na ahalelelana ni svitsrhungu.
23 Antsrhaku ka kulelelana ni svitsrhungu, atlhantukela anhaveni wusvake akuva ayakhongota. Kutani bzihamba wusiku na ali kolanu wusvake.
24 Ankameni lowo, boti adzrili makazri ka lwandle, na dzrikokakokiwa hi mavimbi hikusa moya awubela tlhelo dzra kuhambana navu.
25 Kambe ankama lowu wusiku bziyaka kuheleni, avabuyela, na afamba ahenhla ka lwandle.
26 Kuteloko vadondzrisiwa vamuvona na afamba ahenhla ka lwandle, vatalataleka, vaku: “I xipoko!” Kutani vaba nyandha hi kuchava.
27 Kambe hi kukahlula Yesu akhanela navu, aku: “Tiyani timbilu! Hi mine; mingachavi.”
28 Kutani Petrosi amuhlamula, aku: “Hosi, loko ali wene, nivitane nibuya kwaku na nifamba ahenhla ka mati.”
29 Kutani aku: “Buya!” Kutani Petrosi ahuma abotini afamba ahenhla ka mati, akongoma ka Yesu.
30 Kambe loko alavisa xidzedze, akhomiwa hi kuchava. Kutani, loko asungula kumbombomela, aba nyandha, aku: “Hosi, nihuluxe!”
31 Kutani Yesu atekela kunalavuta voko amukhoma, aku ka yene: “Wene wa lipfumelo dzritsrongo, hayini uganaganekile?”
32 Loko vanhingene abotini, xidzedze ximiyela.
33 Kutani lava avali botini vamukhinsamela, vaku: “Wene hakunene u N’wana wa Xikwembu!”
34 Kutani vatsremakanya, vaya Genezareti.
35 Kutani, loko vasvivonile lesvaku hi yene, vhanu va mbangu lowo vazrumela zritu dzriya ka mimbangu hinkwayu ya le kusuhi; kutani vhanu vamubuyisela hinkwavu lavavabzaka.
36 Kutani vamukombela lesvaku vangakhumba ntsena mponta ya mujansi wake, kutani hinkwavu lava vayikhumbiki vadahiwa.