-
Matewu 15
1 Kutani vafarisi ni vatsrali vasuka Jerusalema vayela Yesu, vaku:
2 “Hayini vadondzrisiwa vaku vatlula mukhuva wa va khale? Hikuva, avahlambi mavoko loko vajula kuda svakuda.”
3 Kutani avahlamula, aku: “Na n’wine hayini mitlula xileleto xa Xikwembu hi mhaka ya mukhuva wenu?
4 Hikuva, Xikwembu xite: ‘Kombisa xichavu ka tatana waku ni mamana waku’, nakone ‘lweyi azruketelaka tatana wake kumbe mamana wake aadlawe’.
5 Kambe n’wine mili loko mhunu aku ka tatana kumbe mamana wake: ‘Hinkwasvu lesvi anitakupfuna ha svone nisvihambe magandzrelo ka Xikwembu’,
6 mhunu lweyo angahasindzriseki kukombisa xichavu ka tatana wake.’ Kutani midlaye ntamu zritu dzra Xikwembu hi mhaka ya mukhuva wenu.
7 Vakanganyisi! Ezaya aprofete svone ha n’wine loko aku:
8 ‘Vhanu lava vanikomba xichavu hi minomu yavu ntsena, kambe timbilu tavu tile kule ngopfu na mine.
9 Vanigandzrela mahala, hikusa tidondzro leti vatidondzrisaka i svileleto sva vhanu.’”
10 Kolanu avitana vhanu lava avali kusuhi aku ka vone: “Yingisetani mitlhela misvitwisisa:
11 Lesvinyamisaka mhunu ahi lesvinhingenaka anon’wini wake, kambe hi lesvihumaka anon’wini wake.”
12 Kutani vadondzrisiwa vamuyela, vaku: “Wasvitiva lesvaku vafarisi vakhunguvanyekile hi kuyingela lesvi usvihlayiki?”
13 Kutani avahlamula, aku: “Nsinya wini na wini wa kuka wungabzaliwanga hi Tatana wanga wa le tilweni wutatsruvuliwa.
14 Vatsrhikani. I vakongomisi va kuka vangavoni. Kutani loko mhunu wa kuka angavoni akongomisa mun’wana wa kuka angavoni, ha vabidzri vatapela xikheleni.”
15 Kutani Petrosi ayangula, aku: “Hitlhamuxele xifaniso lexi.”
16 Kutani Yesu ahlamula, aku: “Na wene ni svosvi awusisvitwisisa?
17 Awusvitivi lesvaku hinkwasvu lesvinhingenaka anon’wini svikhaluta hi le khuzrini svigama svihumexiwa axikoti?
18 Kambe lesvihumaka anon’wini svipfela ambilwini; kutani lesvi hi svone svinyamisaka mhunu.
19 Hikuva ambilwini kupfela mimpimiso ya kubiha, wudlayi, wumbuye, wugangu, wuyivi, wumboni bza madzrimi, nhlamba.
20 Lesvi hi svone svinyamisaka mhunu; kambe kuda svakuda na ungahlambanga mavoko asvinyamisi mhunu.”
21 Kuteloko Yesu asuka kolanu, anhingena amugangeni wa Tire na Sidoni.
22 Kutani kohumelela wansati mun’we wa mufenisya, apfaka hi le mugangeni lowo, abandlukana, aku: “Nitwele wusiwana, Hosi, N’wana Davhida. N’wananga wa xisati axanisiwa svinene hi mademona.”
23 Kambe Yesu angamuyanguli ni kutsrongo. Kutani vadondzrisiwa vake vata vamutsratsriya, vaku: “Mubzele asuka la, hikusa atizra kuhilandzrelela na abandlukana.”
24 Yesu ahlamula, aku: “Anizrumeliwanga ka mhunu handle ka tihamba letilahlekiki ta yindlu ya Yisrayele.”
25 Kambe lweyo wansati abuya amukhinsamela, aku: “Hosi, nipfune!”
26 Yesu ahlamula, aku: “Asvixonganga kuteka pawu dzra vana udzricukumetela svimbzanyana.”
27 Kutani lwe wansati aku: “Ina, Hosi, kambe kunene svimbzanyana svada matlhantlha lamawaka hi le tafuleni dzra vinyi va svone.”
28 Kutani Yesu amuhlamula aku: “He wene wansati! Lipfumelo dzraku i dzrikulu; asvive xilesvi usvijulisaka xisvone.” Kutani n’wanake ahanya kusukela ankameni wolowo.
29 Yesu agama asuka lanu, atlhasa kusuhi ni Lwandle dzra Galileya; kuteloko atlhantukele anhaveni, atsrhama.
30 Kutani svitsrhungu sva svinyingi svitsrhindzrekela ka yene, na svitisa vhanu va kukhuta, lavanga ni wulima, va kuka vangavoni, va kuka vangayingeli ni kukhanela, ni van’wana va kutala, kutani svivatsrhiketela aminengeni yake, avahanyisa.
31 Kutani vhanu vahlamala loko vavona va kuka vangavulavuli na vavulavula, lavanga ni wulima na vadahiwa ni va kukhuta na vafamba ni va kuka vangavoni na vavona; vahangadzrumisa Xikwembu xa Yisrayele.
32 Kambe Yesu avitana vadondzrisiwa vake, aku: “Nitwela vhanu lava wusiwana, hikusa kutani vatsrhame na mine kudzringana masiku mazrazru kambe avadanga nchumu. Anijuli kuvamukisa ni ndlala, hikusa vangachuka vajiyela andleleni.”
33 Kambe vadondzrisiwa vaku ka yene: “Ka mbangu wa ku tani, wa le kule ni vhanu, hitamakuma kwini mapawu ya kudzringana xitsrhungu xa kutalisa xilesvi akuva xida xixuzra?”
34 Yesu avayangula, aku: “Mi ni mapawu mangani?” Vaku: “7 wa mapawu, ni svinhlampfana svingali svingani.”
35 Kuteloko alelete xitsrhungu lesvaku xitsrhamisa hansi,
36 ateka 7 wa mapawu ni tinhlampfi, akhensa, asvikhemelela, anyika vadondzrisiwa; vadondzrisiwa vasvinyika svitsrhungu.
37 Kutani hinkwavu vada vaxuzra, vava vazrwala 7 wa mintsrhava leyikulu ya kutala hi matlhantlha.
38 Kutani lavadiki avali 4.000 wa vavanuna, handle ka vavasati ni vatsrongwana.
39 Kuteloko alelelanile ni svitsrhungu, anhingena abotini atlhasa amugangeni wa Magadani.