BRN

1   Kutani vafarisi ni vasaduki vatsrhindzrekela ka yene, vamukombela kuvakomba singita dzra kupfa hi le tilweni, kumudzringa.

2   Kutani avahlamula, aku: “Loko dambu dzripela, mili: ‘Maxela matava manene hikusa tilo dzrizukile’,

3   ni le mixweni mili: ‘Namunhla kutava ni moya ni mpfula, hikusa tilo dzrizukile nakuve ku ni mphumelo.’ Masvitiva kutlhamuxela lesvi matsrhamela ya tilo majulaka kuhlaya svone, kambe lesvi svikombiso sva minkama svijulaka kuhlaya svone amisvikoti kusvitlhamuxela.

4   Lixaka dzra kubiha ni dzra wumbuye dzrili dzrijula kuvona singita, kambe dzringetinyikiwa singita ni dzrin’we handle ka singita dzra Jonasi.” Afambisa xisvosvo, avasiya.

5   Kutani vadondzrisiwa vawelela halahaya ka lwandle, kambe vadzrivala kuteka mapawu.

6   Kutani Yesu aku ka vone: “Tsrhamani na mipfule matihlo, mitivonela ka svikukumukisu sva vafarisi ni vasaduki.”

7   Kutani vasungula kudzrimuxana, vaku: “O! Ahibuyanga nawu mapawu.”

8   Kambe loko ativa lesvo, Yesu aku: “Miholovisanela yini hilesvi mingeke na mapawu, n’wine va lipfumelo dzritsrongo?

9   Amisvitwisisi, kumbe amimadzrimuki ntlhanu wa mapawu lawa kudiki lava 5.000 ni lesvaku miteke mintsrhava yingani?

10   Kumbe 7 wa mapawu lawa kudiki lava 4.000 ni lesvaku miteke mintsrhava yingani leyikulu?

11   Sviyencekisa kuyini kuva mingasvitwisisi lesvaku aningakhaneli na n’wine hi mapawu? Kambe tivonelani ka svikukumukisu sva vafarisi ni vasaduki.”

12   Hi kone vatwisisiki lesvaku aangahlayi lesvaku vativonela ka svikukumukisu sva mapawu, kambe vativonela ka dondzro ya vafarisi ni vasaduki.

13   Kuteloko anhingene amugangeni wa Khezariya wa Filipi, Yesu avutisa vadondzrisiwa, aku: “Xana vhanu vali N’wana wa Mhunu i mani?”

14   Kutani vaku: “Van’we vali i Johani Mubabatisi, van’wana vali i Eliya, kasi van’wanyana vali i Jeremiya kumbe mun’we wa vaprofeta.”

15   Aku ka vone: “N’wine ke, mili hi mine mani?”

16   Kutani Simoni Petrosi ahlamula, aku: “Wene u Kriste, N’wana wa Xikwembu lexihanyaka.”

17   Kutani Yesu amuyangula, aku: “U ni njombo wene, Simoni, n’wana Jonasi! Hikusa lesvo awupfuleteliwanga hi nyama ni ngati, kambe hi Tatana wanga lwanga matilweni.

18   Na mine, nili ka wene: Wene u Petrosi. Kutani azribzeni ledzri nitayaka bandla dzranga, nakone tinyangwa ta Sizra tingetidzrihlula.

19   Nitakunyika mimpfungulu ya Mfumu wa matilo, kutani xin’wana ni xin’wana lexi uxitsrimbaka amisaveni xitava na xitsrimbiwile amatilweni, nakone xin’wana ni xin’wana lexi uxitlhantlhaka amisaveni xitava na xitlhantlhiwile amatilweni.”

20   Kutani abasopisa svinene vadondzrisiwa akuva vangabzeli mhunu ni mun’we lesvaku i Kriste.

21   Kusukela ankameni wolowo, Yesu asungula kutlhamuxela vadondzrisiwa vake lesvaku afanela kuya Jerusalema ayaxanisiwa svinene hi vakulu ni vaprista lavakulu ni vatsrali, ava adlayiwa, agama apfuxiwa hi siku dzra wuzrazru.

22   Kolanu Petrosi amuteka hi tlhelo asungula kumukawuka, aku: “Titsretsrelele, Hosi; lesvo ungasvitsrhiki svikuyencekela ni kutsrongo.”

23   Kambe afulazra, aku ka Petrosi: “Suka aphambheni kwanga, Sathana! Wene u zribze dzra kuniwisa, hikusa awupimisi sva Xikwembu, kambe upimisa sva vhanu.”

24   Kutani Yesu aku ka vadondzrisiwa vake: “Loko mhunu ajula kunilandzra, aatitsrhike, azrwala mhandzre yake, anilandzrelela.

25   Hikusa lweyi ajulaka kuhuluxa wutomi bzake atabziluza, kambe lweyi aluzaka wutomi bzake hi mhaka yanga atabzikuma.

26   Hikuva, svitamupfuna yini mhunu loko akota kukuma misava hinkwayu kambe aluza wutomi bzake? Kumbe i mpsini lesvi mhunu atakacincisa wutomi bzake ha svone?

27   Hikusa N’wana wa Mhunu atabuya akuphatimeni ka Tatana wake ni tintsrumi take. Kutani ankameni wa kone atahakela mun’wana ni mun’wana hi kulandzra hanyela dzrake.

28   Nihlaya na nitiyisile niku ka n’wine: Ku ni van’we ka lavayimiki lani lavangetikidzringa lifu ni kutsrongo na vangazranganga hi kuvona N’wana wa Mhunu na abuya amfun’wini wake.”