BRN

1   Antsrhaku ka 6 wa masiku, Yesu ateka Petrosi na Jakobe ni makwavu, Johani, avatlhantukisa anhaveni ya kutlakuka svinene wusvavu.

2   Andzrulutiwa amahlweni kwavu, kutani liso dzrake dzriphatima kufana ni dambu, ni sviyambalu svake sviphatima ingaku i livaningo.

3   Kutani kuhumelela Moxe na Eliya amahlweni kwavu na vabula naye.

4   Kutani Petrosi aku ka Yesu: “Hosi, ka hine i svinene kuva hiva lani. Loko usvinavela, nitadzima matende mazrazru: dzrin’we dzraku, dzrin’we dzra Moxe, ni dzrin’we dzra Eliya.”

5   Ate na ahakhanela, kohumelela tlavi dzra kubasa dzrivafuneketa, kutani kutwala zritu ledzrihumaka atlavini, dzriku: “Lweyi i N’wananga, lwazrandzriwaka, lweyi nimunyonxelaka. Muyingisetani.”

6   Kutani loko vadondzrisiwa vayingela lesvo, vawa hansi hi mimombo, vachava ngopfu svinene.

7   Kutani Yesu atsrhindzrekela, avakhumba, aku: “Pfukani. Mingachavi.”

8   Kutani loko vatlakuxa tinhloko, vakuma lesvaku aku na mhunu handle ka Yesu wusvake.

9   Kutani ankama lowu vaxikaka hi le nhaveni, Yesu avaleleta, aku: “Mingabzeli mhunu xivoniso lexi na N’wana wa Mhunu angesipfuxiwa akufeni.”

10   Kambe, vadondzrisiwa vamuvutisa vaku: “Kutani ke, hayini vatsrali vahlaya lesvaku Eliya hi yene afanelaka kuta kusungula?”

11   Kutani avahlamula, aku: “Eliya nakunene awata nakone atlhelisela minchumu hinkwayu.

12   Kambe nimibzela lesvaku Eliya kutani atile, kambe avamutivanga. Nhambitanu, vayence lesvi vasvijuliki hi yene. N’wana wa Mhunu na yene ataxanisiwa hi ndlela yoleyo amavokweni yavu.”

13   Kutani vadondzrisiwa vatwisisa lesvaku aakhanela hi Johani Mubabatisi.

14   Kutani loko vatlhasa kusuhi ni xitsrhungu, kutsrhindzrekela mhunu ka yene amukhinsamela, aku:

15   “Hosi, twela wusiwana n’wananga, hikusa a ni mavabzi ya kuwa nakone axaniseka ngopfu. Hikuva atsrhama hi kuwa andzrilweni ni le matini.

16   Nimubuyise ka vadondzrisiwa vaku, kambe avasvikotanga kumudaha.”

17   Kutani Yesu ahlamula, aku: “N’wine lixaka dzra kupfumala lipfumelo ni dzra kusomboloka! Xana nitamihanyela kuyatlhasa siku muni? Nitamibzatsrha kuyatlhasa siku muni? Mubuyise halenu.”

18   Kutani Yesu aholovela demona, kutani dzrihuma ka yene, jaha dzrihanya kusukela ka nkama lowo.

19   Kutani vadondzrisiwa vabuyela Yesu hi tlhelo, vaku: “Hayini svihihlulile kudzrihlongola?”

20   Aku ka vone: “Hilesvi minga ni lipfumelo dzritsrongo. Hikusa nihlaya na nitiyisile niku ka n’wine: Loko mova ni lipfumelo dzra kudzringana ni nhleke ya sinapi, mitaku ka nhava leyi: ‘Suka lani uya lee’, kutani yitasuka; nakone mingetihluliwa hi nchumu.”

21   --

22   Kuteloko vatlhanganile Galileya, Yesu aku ka vone: “N’wana wa Mhunu atanyiketiwa amavokweni ya vhanu,

23   kutani vatamudlaya, kambe hi siku dzra wuzrazru, atapfuxiwa.” Kutani vavaviseka ngopfu svinene.

24   Kutani loko vatlhasa Kapernawume, vhanu lava avahakelisa madrakma mabidzri ya tinemba ta tempele vatsrhindzrekela ka Petrosi, vaku: “Xana mudondzrisi wenu angahakeli madrakma mabidzri ya tinemba ta tempele?”

25   Aku: “Ina.” Kambe, loko anhingena andlwini, Yesu akhanela naye kusungula, aku: “Usvivonisa kuyini, Simoni? Xana tihosi ta misava tiyikuma ka vamani minhlengo kumbe tinemba? Ka vana va tone kumbe ka vhanu va le handle?”

26   Kutani loko ahlamulile, aku: “Ka vhanu va le handle”, Yesu aku ka yene: “Sviliki, vana avahakelisiwi tinemba!

27   Kambe akuva hingavakhunguvanyisi, yana alwandle uyahoxeta ndzrovo, ukhoma nhlampfi ya kusungula leyitakahuma; loko uyipfula nomu, utakuma mali yin’we ya silivhela. Yiteke uvanyika akuva uhakelela mine na wene.”