BRN

1   Ankameni lowo, vadondzrisiwa vatsrhindzrekela ka Yesu, vaku: “Kutani ke, hi mani lwenkulu kutlula hinkwavu amfun’wini wa matilo?”

2   Kutani avitana xin’wanana xita ka yene, axiyimisa amakazri kwavu,

3   aku: “Nihlaya na nitiyisile niku ka n’wine: Loko mingandzruluki mifana ni svivanana, mingaka minganhingeni amfun’wini wa matilo ni kutsrongo.

4   Xilesvo, lweyi atitsrongahataka kufana ni xin’wanana lexi hi lweyi anga lwenkulu kutlula hinkwavu amfun’wini wa matilo;

5   nakone lweyi ayamukelaka xin’wanana xin’we xa kufana ni xoxi hi vito dzranga na mine awaniyamukela.

6   Kambe lweyi awisaka xin’we xa svivanana lesvi lesvipfumelaka ka mine, asvitamuyampsela loko ankolweni wake angotsrimbiwa zribze dzra kugaya ledzrikokiwaka hi mbongolo, anyuvetiwa alwandle amatini ya kuyenta.

7   “Yowee, misava, hi mhaka ya svikhunguvanyiso! Hikuva svikhunguvanyiso svitata, kambe khombo dzra mhunu lweyi xikhunguvanyiso xitaka ha yene!

8   Kutani, loko voko dzraku kumbe nkondzro waku wukudohisa, wutsreme uwucukumeta kule na wene. Sviyampsa ngopfu kuva unhingena awuton’wini na ukiyela xizro kumbe ukhuta kutlula kuva ucukumeteliwa andzrilweni lowungahelikiki na u ni mavoko mabidzri kumbe minkondzro yibidzri.

9   Nakone loko tihlo dzraku dzrikudohisa, dzritlwavule udzricukumeta kule na wene. Svayampsa kuva unhingena awuton’wini na u ni tihlo dzrin’we kutlula kuva ucukumeteliwa Xikheleni xa Kuhelisiwa hi ndzrilo na u ni matihlo mabidzri.

10   Tivonelani akuva mingadzreli ni mun’we wa lavatsrongo, hikusa nimibzela lesvaku tintsrumi tavu atilweni nkama hinkwawu tilavisa liso dzra Tatana wanga lwanga tilweni.

11   --

12   “Misvivonisa kuyini? Loko mhunu ova ni tihamba ta 100 kutani kulahleka yin’we ya tone, xana angetitsrhika leta 99 atinhaveni, afamba ajuletela leya yin’we leyilahlekiki?

13   Kutani loko ayikuma, nimibzela na nitiyisile lesvaku atanyonxa ngopfu ha yone kutlula lesvi anyonxisaka xisvone hi leta 99 ta kuka tingalahlekanga.

14   Hi kufana, Tatana wanga lwanga matilweni angasvinaveli kuva kuhelisiwa ni mun’we wa lavatsrongo.

15   “Nakone, loko makwenu ayenca xidoho, famba uyamukomba nandzru wake na mili n’wine vabidzri ntsena. Loko akuyingiseta, umuhuluxile makwenu.

16   Kambe loko angayingiseti, tlhela ufamba ni mun’we kumbe vabidzri, akuva mhaka yitatiyisiwa hi wumboni bza timboni tibidzri kumbe tizrazru.

17   Loko angavayingiseti, bzela bandla. Loko ni bandla angadzriyingiseti, ka wene aafane ni mhunu wa matiko ni muhakelisi wa tinemba.

18   “Nihlaya na nitiyisile niku ka n’wine: Hinkwasvu mitokosvitsrimba amisaveni svitava na kutani svitsrimbiwile atilweni, nakone hinkwasvu misvitsrhunxaka amisaveni svitava na kutani svitsrhunxiwile atilweni.

19   Nitlhela nihlaya na nitiyisile niku ka n’wine: Loko vabidzri ka n’wine amisaveni vatwanana hi nchumu wini na wini lowu vafanelaka kuwukombela, vatayenceliwa wone hi Tatana wanga lwanga matilweni.

20   Hikusa lani kunga na vabidzri kumbe vazrazru vatlhanganiki hi vito dzranga, na mine ni kone amakazri kwavu.”

21   Kutani Petrosi ata aku ka yene: “Hosi, xana makwezru atanidohela kangani mine nimudzrivalela? Kuyatlhasa ka 7 kee?”

22   Yesu aku ka yene: “Ni li ka wene: Kungave kuyatlhasa ka 7, kambe ka 77.

23   “Hi yo mhaka yoleyo Mfumu wa matilo wungafanisiwaka ni hosi leyi ayijula kuhakelisa svikweneti malandzra ya yone.

24   Loko yisungula kukambela tinkonta, kubuyisiwa nandzra mun’we amahlweni ka yone lweyi aa ni xikweneti xa 10.000 wa matalenta akuva ayihakela.

25   Kambe, lesvi aangali na ndlela ya kuhakela, n’winyi wake aleleta lesvaku kuxavisiwa yene ni nsati wake, ni vana vake, ni hinkwasvu lesvi aali nasvu, akuva kuhakeliwa xikweneti.

26   Kutani nandzra amukhinsamela, aku: ‘Nilehisele mbilu; nitakuhakela hinkwasvu.’

27   Hi kumutwela wusiwana, n’winyi wake amutsrhika afamba, amudzrivalela xikweneti.

28   Kambe loko nandzra lweyo ahuma, atlhangana ni mun’we wa nandzrakulobze, lweyi aamuceneke madenari ya 100, kutani amukhoma, amutlimba nkolo, aku: ‘Hakela xikweneti xaku.’

29   Kutani nandzrakulobze akhinsama amahlweni kwake amukombela, aku: ‘Nilehisele mbilu; nitakuhakela.’

30   Kambe angapfumelanga; amatsrhan’wini ya lesvo esuka ayamunhingenisa ajele kuko ahakela xikweneti.

31   Loko malandzrakulobze mavona lesviyencekiki, mavaviseka ngopfu svinene, kutani masuka mayabzela n’winyi wa wone hinkwasvu lesviyencekiki.

32   Kutani n’winyi wa nandzra lweyo amuvitana, aku ka yene: ‘Wene, nandzra wa kubiha! Nikudzrivalele xikweneti xaku hinkwaxu ankama lowu unganikombela.

33   Xana na wene awungafanelanga kutsretsrelela nandzrakuloni kufana na mine ningakutsretsrelela?’

34   Kolanu, n’winyi wa nandzra lweyo ahlundzruka ngopfu, amunhingenisa ajele kuko ahakela xikweneti xake hinkwaxu.

35   Na yene Tatana wanga wa le tilweni atayencisa xisvosvo ka n’wine loko mingadzrivalelani svanga vamakwavu na makwavu na svisukela ambilwini.”