BRN

1   Kutani ankama lowu vatsrhindzrekelaka kusuhi na Jerusalema vava vatlhasa Betifaxje le Nhaveni ya Minhlwazri, Yesu azruma vadondzrisiwa vabidzri,

2   aku ka vone: “Nhingenani ka xidoropana lexiya mixivonaka. Kutani mitatekela kukuma mbongolo na yitsrimbiwile, xikan’we ni n’wana wa yone. Titlhantlhani mitibuyisa ka mine.

3   Loko mhunu achuka amiyangula sva kukazri, hlayani lesvaku Hosi yativilela. Kutani loko ayingela lesvo, atatekela kumitsrhika mibuya na tone.”

4   Kutani lesvo sviyencekile, akuva kuhetiseka lesvihlayiwiki hi muprofeta, lwatiki:

5   “Bzela n’wana wa xisati wa Ziyoni, uku: ‘Wasvivona! Hosi yaku yakubuyela; yatitsrongahata nakone yifamba hi mbongolo, xinga ximbongolwana, n’wana wa xihazri xa kuzrwala.’”

6   Kutani vadondzrisiwa vafamba vayayencisa xisvosvi Yesu avaleletisiki xisvone.

7   Vabuyisa mbongolo ni n’wana wa yone vava vabeketela mijansi yavu henhla ka tone, kutani atitsrhamela.

8   Kutani xitsrhungu lexikulu xiyandlalela mijansi ya xone axitaratwini, na vambeni vatsrema tinkambu aminsinyeni vatiyandlalela axitaratwini.

9   Kutani svitsrhungu lesvi asvifamba mahlweni kwake ni lesvi asvimulandzra hi le ntsrhaku asvibandlukana, sviku: “Huluxa, hokombela, N’wana Davhida! Aakhensiwe lweyi abuyaka hi vito dzra Jehovha! Huluxa, hokombela, ahenhlahenhla!”

10   Kutani loko anhingena Jerusalema, doropa hinkwadzru dzritalataleka, dzriku: “Xana i mani lweyi?”

11   Kutani svitsrhungu sviku: “Lweyi i muprofeta Yesu, wa le Nazareta wa Galileya!”

12   Kutani Yesu anhingena atempeleni ahlongola hinkwavu lava avaxavisa ni kuxava atempeleni, abakanyisa mabanka ya vacincisi va mali ni svitsrhamu sva lavaxavisaka matuva.

13   Agama aku ka vone: “Kutsraliwe lesvi: ‘Yindlu yanga yitavitaniwa yindlu ya xikhongoto.’ Kambe n’wine miyiyenca mhakwa ya vayivi.”

14   Kutani vhanu va kuka vangavoni ni va kukhuta vamuyela atempeleni, avahanyisa.

15   Kutani loko vaprista lavakulu ni vatsrali vavona masingita lawa aamayenca ni svifanyatana lesvi asvibandlukana atempeleni, sviku: “Huluxa, hokombela, N’wana Davhida”, vahlundzruka,

16   vaku ka yene: “Wasviyingela lesvi lava vasvihlayaka?” Yesu aku ka vone: “Ina. Xana amingidondzra lesvi: ‘Anon’wini wa vatsrongwana ni wa svibebetana, uhumexe lidzrumu?”

17   Kutani asuka avasiya, ahuma adoropeni aya Betanya, ayayetlela kone.

18   Kutani ankama lowu atlhelelaka adoropeni ximixweni svinene, atwa ndlala.

19   Kutani loko avona nkuwa axitaratwini awuyela, kambe angakumi nchumu handle ka makamba ntsena. Kutani aku ka wone: “Kungahachuke kutlhela kuhuma handzru ka wene!” Kutani nkuwa wutekela kuwoma.

20   Kutani loko vadondzrisiwa vasvivona, vahlamala, vaku: “Xana nkuwa lowu wuwomise kuyini hi nkamanyana?”

21   Kutani Yesu avahlamula, aku: “Nihlaya na nitiyisile niku ka n’wine: Loko miva ni lipfumelo, mitlhela mingaganaganeki, mingetiyenca ntsena lesvi nisviyenciki ka nkuwa lowu, kambe nhambi mobzela nhava leyi, miku: ‘Suka uyapela lwandle’, svitayenceka.

22   Kutani hinkwasvu misvikombelaka hi xikhongoto, na mi ni lipfumelo, mitasvikuma.”

23   Kutani loko anhingene atempeleni, vaprista lavakulu ni vakulu va tiko vamubuyela na adondzrisa, vaku: “Uyenca lesvi hi ntamu muni? Nakone i mani akunyikiki ntamu lowu?”

24   Kutani Yesu avahlamula, aku: “Na mine nitamivutisa nchumu wun’we. Loko minibzela, na mine nitamibzela lesvaku niyenca lesvi hi ntamu wini:

25   Xana babatiso dzra Johani adzripfa kwini? Atilweni kumbe ka vhanu?” Kutani vasungula kuvonisana hi xivone, vaku: “Loko ho: ‘Atilweni’, ataku ka hine: ‘Ke, hayini mingakholwanga ka yene?’

26   Kambe loko ho: ‘Ka vhanu’, hichava xitsrhungu lexi hikusa hinkwavu vali Johani i muprofeta.”

27   Kutani vahlamula Yesu, vaku: “Ahisvitivi.” Na yene, ke, aku ka vone: “Na mine animibzeli lesvaku niyenca lesvi hi ntamu wini.

28   “Kambe misvivonisa kuyini? Mun’we wanuna aa ni vana vabidzri. Atiki ayela lwewa kusungula, aku: ‘N’wananga, famba uyatizra ansin’wini yanga ya mavhinya namunhla.’

29   Kutani n’wana lweyo amuhlamula, aku: ‘Ningetiya’, kambe antsrhaku, atitwa nandzru, ahuma afamba.

30   Atiki atsrhindzrekela ka lwewa wubidzri, ahlaya svo sva svin’we, kutani ahlamula, aku: ‘Hi svone, Tata’, kambe agama angayi mbangu.

31   Hi wini ka lavabidzri lweyi ayenciki kuzrandzra ka tatana wake kee?” Vahlamula, vaku: “Hi lwewa kusungula.” Yesu aku ka vone: “Nihlaya na nitiyisile niku ka n’wine: Vahakelisi va tinemba ni tinghwavana vamichangwela kunhingena amfun’wini wa Xikwembu.

32   Hikusa Johani amitelile hi ndlela ya kululama, kambe n’wine amikholwanga ka yene. Kambe vahakelisi va tinemba ni tinghwavana vakholwile ka yene; kasi n’wine, nhambilesvi misvivoniki lesvo, amigamanga hi kutitwa nandzru akuva mikholwa ka yene.

33   “Yingisetani xifaniso xin’wana: Aku ni mhunu, wa n’winyi wa muti, lwabzaliki nsimu ya mavhinya ayibiyela matlhelo hinkwawu, ava akela xipfuvelo xa vhinyo, ayaka ni xihondzro, agama ayivolekisa ka vadzrimi, ayendzrela matiko man’wana.

34   Loko kutlhasa nkama wa mihandzru, azruma malandzra yake ka vadzrimi vayateka mihandzru yake.

35   Kambe vadzrimi vakhoma malandzra yake, mun’we vamukwapa, mun’wana vamudlaya, mun’wanyana vamukhandla hi mazribze.

36   Atlhela azrumela malandzra mambeni, ya kutlula ya kusungula, kambe vamayenca svo sva svin’we.

37   Hi wugamu avazrumela n’wanake, na aku: ‘Lesvi anga n’wananga, vatamuhlonipha.’

38   Kambe loko vavona n’wanake, vadzrimi vabzelana, vaku: ‘Hi lweyi madapfindla. Tanani himudlaya, hiteka pfindla dzrake!’

39   Kutani vamukhoma vamucukumeta handle ka nsimu ya mavhinya, vamudlaya.

40   Xilesvo, loko n’winyi wa nsimu ya mavhinya abuya, xana atavayenca yini vadzrimi lavo?”

41   Vaku ka yene: “Lesvi vabihiki, atavahelisa hi ndlela leyichavisaka. Kutani nsimu ya mavhinya atayivolekisa ka vadzrimi van’wana, lavatakamunyika mihandzru loko kutlhasa nkama wa yone.”

42   Yesu aku ka vone: “Xana amingidondzra lesvi Matsralweni: ‘Zribze ledzri vayaki vadzridzreliki hi dzrone dzringayenciwa zribze ledzra lisima dzra masungulu. Lesvi svipfela ka Jehovha, funtsrhi svahlamalisa amatihlweni yezru’?

43   Hi mhaka yoleyo niliki ka n’wine: Mfumu wa Xikwembu wutatekiwa ka n’wine wunyikiwa tiko ledzripsalaka mihandzru ya dzrone.

44   Nakone, lweyi atakawa ahenhla ka zribze ledzro, atapshandlaka, kasi lweyi dzritakamuwela dzritamufuhlutela.”

45   Kutani loko vaprista lavakulu ni vafarisi vayingela svifaniso svake, vasvivona lesvaku akhanela hi vone.

46   Kambe nhambi vajula kumukhoma, avachava svitsrhungu, hikusa asviku i muprofeta.