BRN

1   Kutani Yesu atlhela aphindha avulavula navu hi svifaniso, aku:

2   “Mfumu wa matilo wungafanisiwa ni hosi leyihambeliki n’wana wa yone nkhuvu wa muchatu.

3   Kutani yizruma malandzra ya yone kuyavitana lavazrambiwiki amuchatwini, kasi vone avangasvijuli kuya.

4   Yitlhela yizruma malandzra ya yone, yiku: ‘Bzelani vazrambiwa, miku: “Lavisani! Nihetile kululamisela svakuda sva khuvu; tihomu tanga ni svihazri sva kunona svitlhaviwile, kutani hinkwasvu svilungile. Buyani amuchatwini.”’

5   Kambe lesvi avange na mhaka, vatifambela, mun’we ansin’wini yake, mun’wanyana akuxaviseni kwake;

6   kambe lavan’wana vakhoma malandzra vamaxanisa, vagama vamadlaya.

7   “Kutani hosi yihlundzruka, yizrumela masocha ya yone, yidlaya vadlayi lavo yigama yihisa doropa dzravu.

8   Kutani yiku ka malandzra ya yone: ‘Nkhuvu wa muchatu wulungile wone, kambe lavazrambiwiki avangafaneleki.

9   Xilesvo, fambani amatlhanganwini ya svitaratu, miyazramba mani na mani lweyi mimukumaka ata amuchatwini.’

10   Kutani malandzra lawo mahuma maya svitaratwini mayahlengeleta hinkwavu lava mavakumiki, va kubiha ni lavanene; kutani yindlu ya nkhuvu wa muchatu yitala hi lava avatsrhame akudeni.

11   “Kutani loko hosi yinhingena kutatavona lesvaku hi vamani avali kudeni, yovona mun’we wanuna lweyi aangayambalanga mpahla ya muchatu.

12   Kutani yiku ka yene: ‘Nandzruwe, unhingenise kuyini lani na unge na mpahla ya muchatu?’ Lweyo wanuna apfumala xa kuxihlaya.

13   Kutani hosi yiku ka malandzra ya yone: ‘Mutsrimbani mavoko ni minenge mimucukumeta amunyameni hala handle. Hi lanu atakadzrila atlhela aketsrela matinyo kone.’

14   “Hikusa lavazrambiwiki i vanyingi, kambe lavahlawuliwiki i vatsrongo.”

15   Kutani vafarisi vafamba vayahamba xikungu xa ndlela ya kumuphasa hi mazritu yake.

16   Kutani vazrumela vadondzrisiwa vavu ka yene, xikan’we ni vaseketeli va Heroda, vayaku: “Mudondzrisi, hasvitiva lesvaku ukhanela ntiyiso ni lesvaku udondzrisa ndlela ya Xikwembu hi ntiyiso, ni lesvaku awujuli kunyonxisa mhunu, hikusa awulangusi wuso bza vhanu.

17   Ke, hibzele: Uli yini hi mhaka leyi: Svapfumeleliwa kuhakela tinemba ka Khezari kumbe ihina?”

18   Kambe Yesu, hi kutiva mazrengu yavu ya kubiha, aku: “Minidzringela yini, vakanganyisi?

19   Nikombani mali leyi kuhakeliwaka ha yone tinemba.” Vamubuyisela denari.

20   Aku ka vone: “I xifaniso xa mani lexi ni mazritu mangatsraliwa lani kee?”

21   Vaku: “I sva Khezari.” Kutani aku ka vone: “Xisvosvo, tlheliselani Khezari sva Khezari, ni Xikwembu sva Xikwembu.”

22   Kutani loko vayingela lesvo, vahlamala; kutani vamutsrhika, vakhoma ndlela.

23   Hi siku dzrodzro, vasaduki, lavaliki aku na kupfuka ka vafi, vamutela, vamuvutisa lesvi:

24   “Mudondzrisi, Moxe ate: ‘Loko mhunu afa na angali na vana, makwavu aachate ni nsati wake, atapfuxela makwavu xiloso.’

25   Kutani, kave ni 7 wa vamakwavu amakazri kwezru. Lwewa kusungula achata agama afa na angali na vana, asiyela makwavu nsati.

26   Kutani sviva xisvosvo ka lwewa wubidzri ni lwewa wuzrazru, kuyatlhasa ka hinkwavu va 7.

27   Hi wugamu, lwe wansati afa.

28   Ke, akupfukeni ka vafi, lwe wansati atava nsati wa mani ka lava 7? Hikusa hinkwavu vachate naye.”

29   Yesu avahlamula, aku: “Milahlekile, hikusa amimativi Matsralwa nhambi ntamu wa Xikwembu.

30   Hikuva akupfukeni ka vafi, vhanu avachati nhambi kuchatisiwa, kambe vafana ni tintsrumi letinga tilweni.

31   Nakone, mayelanu ni kupfuka ka vafi, amidondzranga lesvingahlayiwa ka n’wine hi Xikwembu, xiku:

32   ‘Hi mine Xikwembu xa Abrahamu, ni Xikwembu xa Izaki, ni Xikwembu xa Jakobe’? Ahi Xikwembu xa vafi, kambe i Xikwembu xa lavahanyaka.”

33   Kutani loko sviyingela lesvo, svitsrhungu svihlamala hi dondzro yake.

34   Kutani loko vafarisi vayingela lesvaku apfale nomu vasaduki, vabuya xikan’we.

35   Kutani mun’we wa vone, lweyi aali ntivi ya Nawu, amudzringa hi kumuvutisa, aku:

36   “Mudondzrisi, andzreni ka Nawu hinkwawu, hi xini xileleto lexikulu xa kone?”

37   Kutani aku ka yene: “‘Zrandzra Jehovha, Xikwembu xaku, hi mbilu yaku hinkwayu, ni hi hika dzraku hinkwadzru, ni hi miyanakanyu yaku hinkwayu.’

38   Lexi hi xo xileleto lexikulu ni lexa kusungula.

39   Lexa wubidzri, xa kufana na xone, hi lexi: ‘Zrandzra mhunukuloni xilesvi utizrandzrisaka xisvone.’

40   Ahenhla ka svileleto lesvi kubekiwe masungulu ya Nawu hinkwawu ni vaprofeta.”

41   Kutani loko vafarisi vahlengeletanile, Yesu avavutisa aku:

42   “Mili yini ha Kriste? I n’wana wa mani kee?” Vaku ka yene: “Wa Davhida.”

43   Avavutisa, aku: “Ke, sviyencekisa kuyini kuva Davhida, hi kuhuhuteliwa hi moya amuvitana Hosi, aku:

44   ‘Jehovha ate ka Hosi yanga: “Tsrhamisa axineneni xanga niko nibeka valala vaku ahansi ka minkondzro yaku”’?

45   Ke, loko Davhida amuvitana Hosi, xana sviyencekisa kuyini kuva ava n’wanake?”

46   Kutani kungavi na mhunu wa kukota kumuhlamula hi zritu ni dzrin’we. Nakone kusukela ka siku dzrodzro, akahavanga na mhunu lwatiyiki kutlhela amuvutisa xanchumu.