BRN

1   Kutani loko Yesu agame kuhlaya lesvi hinkwasvu, aku ka vadondzrisiwa vake:

2   “Masvitiva lesvaku andzreni ka masiku mabidzri kudiwa Paxkwa, nakone N’wana wa Mhunu atanyiketiwa akuva adlayiwa amhandzreni.”

3   Kutani vaprista lavakulu ni vakulu va tiko vahlengeletana amutini wa muprista lwenkulu, lweyi aavitaniwa Kayafasi,

4   vabunga makungu ya kukhoma Yesu hi maqhinga ni kumudlaya.

5   Nhambitanu, avaku: “Kungave ankhubzini, akuva kungahumeleli dzolonga amakazri ka vhanu.”

6   Na Yesu ahali Betanya andlwini ya Simoni, lwewa nhlokonho,

7   abuyeliwa hi mun’we wansati na atamele ngwama ya kutiyela ya mafuzra ya kunun’hwela ni ya kudula, kutani amuchela anhlokweni na ali akudeni.

8   Kutani loko vavona lesvo, vadondzrisiwa vahlundzruka, vaku: “Hayini kutlangiwa hi mafuzra lawa?

9   Hikusa inhaka maxavisiwile hi mali ya yinyingi yinyikiwa svisiwana.”

10   Kutani loko Yesu asvivonile, aku ka vone: “Mimukazratela yini wansati lweyi? Aniyencele ntizro wa kuxonga.

11   Hikusa n’wine minkama hinkwayu mi ni svisiwana, kambe mine mingetiva na mine minkama hinkwayu.

12   Loko achele mafuzra lawa ya kunun’hwela amizrini wanga, asviyencele kunilulamisela akuva nilahliwa.

13   Nihlaya na nitiyisile niku ka n’wine: Kwini na kwini lomu madzrungula lamanene matakazrezriwa kone amisaveni hinkwayu, lesvi lweyi wansati asviyenciki na svone svitahlayiwa akuva adzrimukiwa.”

14   Kutani mun’we wa lava 12, lwavitaniwaka Juda Iskariyota, aya ka vaprista lavakulu,

15   aku: “Mitaninyika yini akuva nimunyiketa ka n’wine?” Kutani vamutsremela 30 wa macheleni ya silivhela.

16   Kutani kusukela kolanu, ajuletela mukhandlu lowunene wa kumunyikela.

17   Hi siku dzra kusungula dzra Makati ya Kuka Svikukumukisu, vadondzrisiwa vata ka Yesu, vaku: “Ujula hikululamisela kwini akuva udela kone Paxkwa?”

18   Kutani aku: “Nhingenani adoropeni, miya ka Manyana, miyaku ka yene: ‘Mudondzrisi ali: “Nkama wanga wu kusuhi. Nitada Paxkwa ni vadondzrisiwa vanga akaya kwaku.”’”

19   Kutani vadondzrisiwa vayencisa xilesvi Yesu avaleletisiki xisvone, valulamisela Paxkwa.

20   Kutani loko dambu dzripelile, atsrhamisa ada ni vadondzrisiwa vake lava 12 atafuleni.

21   Na vahada, aku: “Nihlaya na nitiyisile niku ka n’wine: Mun’we ka n’wine atanidlayisa.”

22   Kutani hi kuvaviseka svinene hi lesvo, mun’wana ni mun’wana asungula kuhlaya lesvi ka yene: “Hosi, angava mine?”

23   Kutani ahlamula, aku: “Lweyi apetaka voko dzrake na mine ka xibza hi yelweyo atakanidlayisa.

24   Kunene, N’wana wa Mhunu awafamba, svanga hesvi svitsraliwiki mayelanu na yene, kambe yowee mhunu lweyi N’wana wa Mhunu adlayisiwaka ha yene! Inhaka svimuyampselile loko mhunu lweyo ni kupsaliwa aangapsaliwanga.”

25   Kutani Juda, lweyi aajula kumunyikela, ahlamula, aku: “Angava mine, we Rabbi?” Yesu aku ka yene: “Uhlaye hi wusvaku.”

26   Vate na vahada, Yesu ateka kati, kutani loko akhensile ni kudzrikatekisa, adzrikhema, anyika vadondzrisiwa, aku: “Tekani mida. Kati ledzri i mizri wanga.”

27   Agama ateka xinwelo, akhensa, avanyika, aku: “Siyelanani ha xone hinkwenu,

28   hikuva vhinyo ledzri i ngati yanga ya xipfumelelananu, leyitakahalateliwa lavanyingi akuva vadzrivaleliwa svidoho.

29   Kambe nili ka n’wine: Ningetitlhela ninwa handzru lowu wa mavhinya kuyatlhasa asikwini ledzri nitakatlhela niwunwa na n’wine amfun’wini wa Tatana wanga.”

30   Kuteloko vayimbelele tinsimu ta svidzrumiso, vahuma vaya le Nhaveni ya Minhlwazri.

31   Kutani Yesu aku ka vone: “Hinkwenu lani mitawa hi mhaka yanga wusiku lebzi, hikusa kutsraliwe lesvi: ‘Nitaba mubzisi, kutani tihamba ta ntlhambi wa kone titahangalaka.’

32   Kambe antsrhaku ka loko nipfuxiwile, nitapfa nimizrangela niya Galileya.”

33   Kambe Petrosi ahlamula, aku ka yene: “Nhambi lava van’wana hinkwavu vangowa hi mhaka yaku, mine ningetiwa ni siku ni dzrin’we!”

34   Yesu aku ka yene: “Nihlaya na nitiyisile niku ka wene: Wusiku bzobzi, na nkuku wungesikukuluka, utanihlamba kazrazru.”

35   Petrosi aku ka yene: “Nhambiloko ningofa na wene, mine ani na kukuhlamba.” Na vone vadondzrisiwa lavan’wana hinkwavu vahlaya svo sva svin’we.

36   Kutani Yesu afamba ni vadondzrisiwa ambangwini lowuvitaniwaka Getsemani, aku ka vone: “Tsrhamani lani na nahaya lahayani niyakhongota.”

37   Kuteloko ateke Petrosi ni vana lavabidzri va Zebedewu, asungula kuvaviseka, akazrateka ngopfu svinene.

38   Kutani aku ka vone: “Hika dzranga dzrivaviseke ngopfu, kuyatlhasa akufeni. Tsrhamani lani milavelela na mine.”

39   Kuteloko aya amahlweninyana, awa hi mombo, akhongota, aku: “Tatana, loko svikoteka, xinwelo lexi axikhalute hi kule na mine. Kambe svingaye hi kuzrandzra kwanga, kambe hi kuzrandzra kwaku.”

40   Agama ayela vadondzrisiwa, avakuma na voyetlela; kutani aku ka Petrosi: “Svili amisvikotanga kulavelela na mine wora dzra dzrin’we?

41   Lavelelani mitlhela mikhongota, akuva minganhingeni andzringweni. Svone, moya wasvijula, kambe nyama ayi na ntamu.”

42   Atlhela asuka, ka wubidzri, ayakhongota, aku: “Tatana, loko svingakoteki kuva xinwelo lexi xikhaluta na ningaxinwanga, akuyenceke kuzrandzra kwaku.”

43   Kutani atlhela abuya, avakuma na vayetlela, hikusa matihlo yavu amabindzriwa hi wuzrongo.

44   Kutani avatsrhika, atlhela asuka ayakhongota ka wuzrazru, atlhela ahlaya svo sva svin’we.

45   Kutani ayela vadondzrisiwa, aku ka vone: “Wusiku bza kufana ni lebzi, n’wine moyetlela, miwisa! Lavisani! Wutsrhindzrekelile nkama wa kuva N’wana wa Mhunu anyiketiwa amavokweni ya vadohi.

46   Pfukani hifamba. Lweyi anidlayisaka hi lwe atsrhindzrekelaka.”

47   Ate na ahakhanela, kotlhasa Juda, mun’we wa lava 12, ni xitsrhungu lexikulu, lexitameliki timpanga ni tindhuku, na xizrumeliwe hi vaprista lavakulu ni vakulu va tiko.

48   Kutani lweyi amuxavisiki aavanyike xikombiso, aku: “Lweyi nitakamun’quta, hi yelweyo; mukhomani.”

49   Kutani akongoma Yesu, aku: “Hilosile, we Rabbi”, amun’quta.

50   Kambe Yesu aku ka yene: “Nandzruwe, ubuya uyenca yini lani?” Kutani vatsrhindzrekela, vayisa mavoko ka Yesu, vamukhoma.

51   Kambe mun’we wa lava avali na Yesu analavuta voko dzrake ahlomula lipanga, aba nandzra wa muprista lwenkulu, amutsrema ndleve.

52   Kutani Yesu aku ka yene: “Tlhelisa lipanga dzraku ambangwini wa dzrone, hikusa hinkwavu vakhomaka lipanga vatadlawa hi lipanga.

53   Kumbe wopimisa lesvaku ningekombeli Tatana wanga aninyika svosvisvosvi kutlula 12 wa mabutsrhu ya tintsrumi?

54   Ke, matahetisekisa kuyini Matsralwa lamaliki svifanela kuyencekisa xisvosvi kee?”

55   Ankameni lowo, Yesu aku ka svitsrhungu lesviyani: “Mibuya minikhoma na mitamele timpanga ni tindhuku svanga mojuletela muyivi?! Siku ni siku anetsrhama atempeleni nidondzrisa, kambe amibuyanga minikhoma.

56   Kambe hinkwasvu lesvi sviyencekile akuva kuhetiseka matsralwa ya vaprofeta.” Kutani vadondzrisiwa hinkwavu vamutsrhika wusvake, vatsrutsruma.

57   Kutani lavakhomiki Yesu vamuyisa ka Kayafasi, muprista lwenkulu, lomu vatsrali ni vakulu avatlhangane kone.

58   Kambe Petrosi aamulandzra hi le kule, akota ayatlhasa amutini wa muprista lwenkulu. Kutani loko anhingene ndzreni, atsrhamisa ni vatizri akuva avona magamela ya kone.

59   Kutani vaprista lavakulu ni Huvo ya Xijuda hinkwayu avajula wumboni bza madzrimi bza kulumbeta Yesu akuva vakota kumudlaya,

60   kambe avabzikumanga, nhambilesvi akutsrhindzrekela timboni tinyingi ta madzrimi akuva tifakaza. Hi wugamu, kutsrhindzrekela vabidzri,

61   vaku: “Lweyi ate: ‘Ningahohlota Tempele dzra Xikwembu nitlhela nidzriyaka hi masiku mazrazru.’”

62   Kolanu muprista lwenkulu asekeleka, aku ka yene: “Awuyanguli nchumu? Hi svini lesvi lava vakulumbetaka svone?”

63   Kambe Yesu amiyela akuntse! Kutani muprista lwenkulu aku ka yene: “Nakufungisa hi Xikwembu lexihanyaka: Hibzele loko uli Kriste, N’wana wa Xikwembu!”

64   Yesu aku ka yene: “Uhlaye hi wusvaku. Kambe nili ka n’wine: Kusukela ka svosvi mitavona N’wana wa Mhunu na atsrhamise avokweni dzra xinene dzra ntamu, abuya hi matlavi ya tilo.”

65   Kutani muprista lwenkulu ahandzrula nkhancu wake, aku: “Asandzrile! Hahajulela yini timboni? Lavisani! Mixiyingelile xisandzru.

66   Mili yini?” Kutani vahlamula, vaku: “Afaneliwa hi kufa.”

67   Kutani vamuthukela mazri ka liso vatlhela vamuhimetela. Van’wana vamuba liso hi timpama,

68   na vaku: “Hi profetele, we Kriste. Hi mani lwangakuba?”

69   Kasi Petrosi aatsrhame ahandle akintazri. Kutani mun’we wa n’hwanyana lwe aatizra kone amuyela, aku: “Na wene awuli na Yesu, lwewa mugalileya!”

70   Kambe aphikisa amahlweni ka hinkwavu, aku: “Anisvitivi lesvi ukhanelaka ha svone.”

71   Kutani loko ahume handle, aya nyangweni, n’hwanyana mumbeni amuvona, aku ka lava avali kone: “Lweyi aali na Yesu, lwewa munazareta.”

72   Atlhela aphikisa, na afunga, aku: “Animutivi mhunu lweyi!”

73   Antsrhaku ka nkamanyana lava avayime kusuhi vatsrhindzrekela, vaku ka Petrosi: “Nakunene na wene u mun’we wa vone, hikusa nhambi makhanelela yaku mokupaluxa.”

74   Kutani asungula kuzruka atlhela afunga, aku: “Animutivi mhunu lweyi!” Kolanu nkuku wuku: “Kikiligoo!”

75   Kutani Petrosi adzrimuka mazritu ya Yesu, loko aku: “Na nkuku wungesikukuluka, utanihlamba kazrazru.” Kutani ahuma handle, ayadzrila hi xiviti.