-
Matewu 28
1 Antsrhaku ka Savata, loko bziya kuxeni hi siku dzra kusungula dzra vhiki, Mariya Madalena na Mariya lwemun’wana vabuya vavona sizra.
2 Kutani vakuma lesvaku kuhumelele kutsrekatsreka lokukulu ka misava, hikusa akuxike ntsrumi ya Jehovha hi le tilweni yitatasusumeta zribze, yigama yitsrhama ahenhla ka dzrone.
3 Kutani lesvi ayili xisvone asvifana ni lihati, nakone mpahla ya yone ayiphatima yikumpaa kufana ni xitsrhwatsrhwa.
4 Kutani, hi kuyichava, lava avavonelela avawome hi kuzruzrumela ingiki vefa.
5 Kambe ntsrumi yiku ka vavasati lavayani: “Mingachavi, hikusa nasvitiva lesvaku mijuletela Yesu, lwadlayiwiki amhandzreni.
6 Anga kone lani, hikusa apfuxiwile, svanga hesvi ahlayiki ha kone. Buyani mivona mbangu lowu aalatiwe ka wone.
7 Kutani kahlulani mifamba miyabzela vadondzrisiwa vake lesvaku apfuxiwile akufeni. Nakone, phela apfe azranga amahlweni kwenu kuya Galileya. Mitayamuvona kohala. Hi svolesvo anibuya nimibzela svone!”
8 Kutani vakahlula vasuka asizreni, na vatale hi kuchava ni kunyonxa lokukulu; vatsrutsruma vayadzrungulela vadondzrisiwa vake.
9 Kolanu Yesu avatlhangaveta, aku: “Awuxeni!” Kutani vatsrhindzrekela vamukhoma minkondzro, vamukhinsamela.
10 Kutani Yesu aku ka vone: “Mingachavi! Fambani miyadzrungulela vamakwezru, vataya Galileya vayanivona.”
11 Kutani na vahafamba, van’we va vazrindzri vanhingena adoropeni vadzrungulela vaprista lavakulu hinkwasvu lesviyencekiki.
12 Kuteloko vanhingene nhlengeletanu ni vakulu vakombisana navu, vakulu vanyika masocha mali ya yinyingi,
13 vaku: “Hlayani lesvi: ‘Vadondzrisiwa vake vate ni wusiku vamuyiva na hiyetlelile.’
14 Kutani loko lesvi svochuka sviyingeliwa hi hosi ya xifundzrankulu, hitayizrulisa, himisizrelela.”
15 Kutani mateka mali, mayencisa xilesvi maleletisiwiki xisvone. Kutani mhaka leyi yihangalaka amakazri ka vajuda kutatlhasa ni namunhla.
16 Kambe, vadondzrisiwa lava 11 vaya Galileya, anhaveni leyi Yesu angavaleleta yone.
17 Loko vamuvona, vamukhinsamela, kambe van’we vaganaganeka.
18 Kutani Yesu atsrhindzrekela, akhanela navu, aku: “Ninyikiwe wuhosi hinkwabzu atilweni ni misaveni.
19 Xilesvo, fambani miyayenca vadondzrisiwa amakazri ka vhanu va matiko hinkwawu, mivababatisa hi vito dzra Tatana, ni dzra N’wana, ni dzra moya wa kuxwenga,
20 mivadondzrisa kulandzrelela hinkwasvu lesvi nimidondzrisiki svone. Nakone, lavisani, ni na n’wine masiku hinkwawu, kuko kutlhasa kuhela ka misava.”