-
Mintizro 1
1 We Tewoflu, wudzrunguli bza kusungula nibzitsralile mayelanu ni hinkwasvu lesvi Yesu asunguliki kusviyenca ni kusvidondzrisa,
2 kuyatlhasa asikwini ledzri atekiwiki ayisiwa ahenhla ha dzrone, loko ahete kusiyela vapostola lava avalangiki svileleto hi kutizrisa moya wa kuxwenga,
3 lava, antsrhaku ka loko axanisekile, angatikombisa ka vone na ahanya hi svikombiso lesva kutala lesvikholwisaka, andzreni ka 40 wa masiku, na avoniwa hi vone atlhela akhanela hi Mfumu wa Xikwembu.
4 Kutani loko ahlengeletane navu, avalelete lesvi: “Mingasuki Jerusalema, kambe yimelani lesvi Tatana asvidumbisiki, lesvi ningamibzela hi svone;
5 hikuva Johani kunene ababatise hi mati, kambe n’wine mitababatisiwa hi moya wa kuxwenga andzreni ka masiku mange mangani.”
6 Kutani, loko kunene vahlengeletanile, vamuvutise lesvi: “Hosi, xana utatlhelisela mfumu ka Yisrayele svosvi kee?”
7 Aku ka vone: “Asvilumbi n’wine kutiva minkama ni tinguva lesvi Tatana asvibekiki ahansi ka wuhosi bzake.
8 Kambe n’wine mitayamukela ntamu loko moya wa kuxwenga wumixikela, nakone mitava timboni tanga Jerusalema, ni le tikweni hinkwadzru dzra Judeya ni le Samariya, ni kuyatlhasa amimbangwini ya le kule svinene ya misava.”
9 Loko ahete kuhlaya lesvo, atekiwa ayisiwa ahenhla na vali kazri vamulangusa, kutani tlavi dzrimupfalela, vangahakoti kumuvona.
10 Kutani ankama lowu avahalangusise atilweni na ahafamba, kuhumelela vavanuna vabidzri na vayambale sviyambalu sva kubasa vatlhasa vayima kusuhi navu,
11 vaku: “Vavanuna va le Galileya, miyimela yini milavisa atilweni? Yesu, lwangatekiwa na ali makazri kwenu anhingena tilweni, atabuyisa xisvosvi mingamuvonisa xisvone na afamba aya tilweni.”
12 Kutani vatlhelela Jerusalema, na vasuka anhaveni leyivitaniwaka Nhava ya Minhlwazri, leyinga kusuhi na Jerusalema, ka kuteka kolomu ka kilometru dzrin’we ntsena.
13 Loko vatlhase kone, vakhwela vaya ka xilawu lexi avatsrhama ka xone. Akuli Petrosi na Johani, na Jakobe na Andreye, Filipi na Tomasi, Bartolomewu na Matewu, Jakobe n’wana Alfewu, na Simoni, Muhiseki, na Juda n’wana Jakobe.
14 Vone hinkwavu avakhinyela akuhambeni ka svikhongoto hi mbilu yin’we, kupatsra ni vavasati va kukazri na Mariya, mamana wa Yesu, ni vamakwavu va Yesu va xinuna.
15 Kutani amasikwini lawo, Petrosi asekeleka ayima amakazri ka vamakwavu, lava nhlayu yavu ayiya ka 120 wa vhanu lavatlhanganiki, aku:
16 “Vavanuna, vamakwezru, asvikombela kuva kuhetiseka tsralwa ledzri moya wa kuxwenga wudzriprofetiki hi kutizrisa Davhida mayelanu na Juda, lweyi aviki mukombi wa ndlela wa lavakhomiki Yesu.
17 Hikuva aankontiwe na hine nakone aanyikiwe xiyavelo awutizrelini lebzi.
18 (Kutani lwewa wanuna kunene atixavele nsimu hi muholo wa kukala wungalulamanga, agama ayatisunga hi kutisrhiketela awa hi nhloko, apandzreka hi le makazri, mazrumbu yake hinkwawu mahalaka.
19 Kutani mhaka leyo yitiviwile hi hinkwavu lavahanyaka Jerusalema. Xilesvo nsimu leyo yichuliwe lesvaku i Akeldama, lesviliki “Nsimu ya Ngati”, hi lidzrimi dzravu.)
20 Hikuva kutsraliwe lesvi abukwini dzra Mapisalma: ‘Akaya kwake akundzruluke zrumbi, kungave na mhunu lwatsrhamaka kone’, nakone ‘ntizro wake wa wulaviseli awutekiwe hi mun’wana.’
21 Xilesvo, svajuleka lesvaku ka vavanuna lavafambafambiki na hine nkama hinkwawu lowu Hosi Yesu atsrhamiki atlhela afambafamba na hine,
22 kusukela loko ababatisiwile hi Johani kuyatlhasa asikwini ledzri asusiwiki ha dzrone amakazri kwezru aya ahenhla, mun’we wa vavanuna lava ava mboni ya kupfuxiwa kwake xikan’we na hine.”
23 Kutani vahumexa vabidzri: Josefa, lwachuliwaka Barsaba, lweyi nakone aavitaniwa Juxtu, na Matiyasi.
24 Kutani vakhongota, vaku: “Wene Jehovha, lweyi utivaka timbilu ta vhanu hinkwavu, komba lesvaku hi wini ka lavabidzri umuhlawuliki,
25 akuva asiva mbangu lowu wa wutizreli ni wupostola, lesvi Juda ahambaniki na svone aya mbangwini wake.”
26 Kutani vavahambela mpshampsha, kutani mpshampsha yiyawela Matiyasi, kutani asungula kukontiwa xikan’we ni lava 11 wa vapostola.