BRN

1   Kutani le Khezariya aku ni mun’we wanuna lwavitaniwaka Kornelu, lweyi aali muzrangeli wa masocha ka xikwata xin’we xa 600 wa masocha lexi axivitaniwa Vataliyana.

2   Aali mhunu wa kuhanya hi wukhongoti ni lweyi aachava Xikwembu, yene ni ndangu wake hinkwawu. Handle ka lesvo, aahanana ngopfu vhanu svipfunu, nakone aatsrhama hi kukhongota ka Xikwembu nkama hinkwawu.

3   Loko sviya ka 15 wora, avone ntsrumi ya Xikwembu hi kukhanya axivonisweni na yimutela, yiku: “Kornelu!”

4   Kutani ayilangutisa, na achava, aku: “Nihone yini, we Hosi?” Yiku ka yene: “Svikhongoto svaku ni svipfunu svaku ka svisiwana svitlhantukele ka Xikwembu svanga xidzrimuxo.

5   Kutani svosvi zruma vavanuna vaya le Jopa vayavitana Simoni, lwavitaniwaka Petrosi.

6   Atsrhame akaya ka Simoni, lwanga mufuki wa svikhumba lweyi yindlu yake yinga kusuhi ni lwandle.”

7   Kuteloko ntsrumi leyi ayivulavula naye yisukile, avitana mabidzri ka malandzra yake ni socha dzrin’we dzra kuhanya hi wukhongoti amakazri ka lava avamutizrela,

8   avadzrungulela hinkwasvu atlhela avazruma kuya le Jopa.

9   Mundzruku ka kone, na vahali ndleleni, loko vali kazri vatsrhindzrekela adoropeni, Petrosi atlhantukela henhla ka yindlu hi nkama wa dina akuva akhongota.

10   Kambe asungula kutwa ndlala ya yikulu, anavela kuda xanchumu. Kambe na vahasveka svakuda, awela wuzrongweni bza xivoniso,

11   kutani avona tilo na dzripfulekile, ni xibza xa kukazri xa kufana ni kapulana dzra dzrikulu na xixixiwa amisaveni hi mune wa timponta ta xone.

12   Andzreni ka xone aku ni mixaka hinkwayu ya svihazri sva mune wa minenge ni svikokovi sva misava, ni tinyanyana ta tilo.

13   Kutani kuhuma zritu dzriku ka yene: “Petrosi, pfuka, udlaya uda!”

14   Kambe Petrosi aku: “Ningeyenci lesvo, we Hosi, hikusa aningida nchumu wa kunyama kumbe wa kukala wungabasanga.”

15   Kutani zritu dzritlhela dzrimutela ka wubidzri, dzriku: “Lesvi Xikwembu xisvibasisiki, ungahlayi lesvaku svinyamile.”

16   Kutani lesvi sviyenceke kazrazru, xibza xigama xitekela kukhwelisiwa xiya tilweni.

17   Na Petrosi ahativutisa lesvaku xivoniso lexi axivoniki xijula kuhlaya yini, kotlhasa vavanuna lavazrumiwiki hi Kornelu vavutisa lesvaku hi kwini kaya ka Simoni, vayima anyangweni.

18   Kutani vaba xipfalu, vavutisa lesvi: “Hi kola kuzruzreliwiki Simoni, lweyi avitaniwaka Petrosi kee?”

19   Na Petrosi ahapimisa hi xivoniso lexiyani, moya wuku: “Lavisa! Ku ni vavanuna vazrazru vakujuletelaka!

20   Kutani pfuka, uxika ufamba na vone, na ungaganaganeki ni kutsrongo, hikusa hi mine nivazrumiki.”

21   Kutani Petrosi axika ayakuma vavanuna lavo, aku: “Hi mine lweyi, lweyi mimujuletelaka. I yini ximitisiki lani?”

22   Vaku: “Kornelu, anga muzrangeli wa masocha, mhunu wa kululama ni lwachavaka Xikwembu, lwakhensiwaka hi tiko hinkwadzru dzra vajuda, anyikiwe svileleto sva kupfa ka Xikwembu hi ntsrumi ya kuxwenga, akuva ahizruma kuta kwaku hitatakuvitana uya kaya kwake akuva atayingela lesvi unga nasvu kusvihlaya.”

23   Kutani avazramba akuva vanhingena vatayetlela kone wusiku lebzo. Mundzruku ka kone, apfuka afamba navu; vamakwezru van’wana va le Jopa na vone vafamba na yene.

24   Mundzruku ka kone, anhingena Khezariya. Kutani Kornelu aavayimelile na azrambe maxaka ni vanghanu vake lavakulu.

25   Loko Petrosi aku awanhingena, Kornelu amutlhangaveta, awela hansi aminengeni yake, amukhinsamela.

26   Kambe Petrosi amusekelekisa, aku: “Sekeleka; na mine ni mhunu.”

27   Kutani anhingena na abula naye, akuma vhanu vanyingi na vahlengeletanile.

28   Kutani aku ka vone: “N’wine masvitiva lesvaku asvipfumeleliwi kuva mujuda atitlhanganisa ni mhunu wa tiko dzrimbeni kumbe kumutsrhindzrekelela. Kambe Xikwembu xinikombe lesvaku anifanelanga kuhlaya lesvaku mhunu wa kukazri anyamile kumbe angabasanga.

29   Xilesvo, nitekele kubuya ankama lowu ningazrambiwa. Kutani ke, navutisa: Ningava na nivitaniwela yini kee?”

30   Kutani Kornelu aku: “Mune wa masiku lamakhalutiki, ka nkama lowanga hi wolowu, anili kuhambeni ka xikhongoto andlwini yanga hi nkama wa dina. Kutani kochuka kuhumelela mun’we wanuna ayima amahlweni kwanga na ayambale mpahla ya kubasa ya kuphatima,

31   aku: ‘Kornelu, xikhongoto xaku xiyingeliwile, ni svihananu svaku sva kupfuna svisiwana svidzrimukiwile amahlweni ka Xikwembu!

32   Xilesvo, zruma vhanu vaya le Jopa vayavitana Simoni, lwavitaniwaka Petrosi. Ale kaya ka Simoni, lwewa mufuki wa svikhumba lwatsrhamaka atlhelweni ka lwandle.’

33   Kutani ke, nizrume vhanu vatatakuvitana hi kukahlula. Kutani uve ni wumbilu bza kuhitlhasela. Kutani svosvi hi kola hinkwezru amahlweni ka Xikwembu akuva hiyingela hinkwasvu lesvi uleletiwiki svone hi Jehovha.”

34   Kutani Petrosi apfula nomu, aku: “Svosvi nasvitwisisa hakunene lesvaku Xikwembu axi na xihlawuhlawu,

35   kambe atikweni dzrin’wana ni dzrin’wana lweyi axichavaka atlhela ayenca lesvilulamiki awayamukeleka ka xone.

36   Xizrumele zritu ka vana va Yisrayele akuva xivatlhasisela madzrungula lamanene ya kuzrula hi kola ka Yesu Kriste, lweyi anga Hosi ya hinkwavu.

37   N’wine vhela mayitiva mhaka leyi kukhaneliwiki ha yone hinkwaku le Judeya, kusukela Galileya antsrhaku ka babatiso ledzri Johani adzrizrezriki,

38   yinga ya Yesu lweyi aahuma Nazareta, ni ndlela leyi Xikwembu ximutotiki ha yone hi moya wa kuxwenga ni ntamu, agama afambafamba atikweni hinkwadzru ayenca lesvinene ni kuhanyisa hinkwavu lavaxanisiwaka hi Diyavulosi, hikusa Xikwembu axili na yene.

39   Kutani hine hi timboni ta hinkwasvu lesvi asvitizriki atikweni dzra vajuda ni le Jerusalema, lomu vamudlayiki hi kumuhayeka ka pulangu.

40   Xikwembu ximupfuxile hi siku dzra wuzrazru, xiva ximupfumelela kutivonekisa,

41   kunge ka hinkwavu vhanu, kambe ka timboni letizrangiki tibekisiwa hi Xikwembu, anga hine, hidiki hiva hinwa na yene antsrhaku ka loko apfuxiwile akufeni.

42   Nakone, ahilelete kuzrezrela vhanu ni kubeka wumboni hinkwabzu bza lesvaku lweyo hi yene abekiwiki hi Xikwembu akuva ayavanyisa lavahanyaka ni lavafiki.

43   Vaprofeta hinkwavu vabekela yene wumboni, bza lesvaku mani na mani lwapfumelaka ka yene atakuma kudzrivaleliwa svidoho hi vito dzrake.”

44   Na Petrosi ahahlaya mazritu lawa, moya wa kuxwenga wowela hinkwavu lava avayingiseta zritu.

45   Kutani hinkwavu vapfumeli lavasokiki lava avabuye na Petrosi vahlamala, hilesvi nyiko ya moya wa kuxwenga ayichululiwa ni le ka vhanu va matiko.

46   Hikuva avavayingela na vakhanela hi tindzrimi ta le matikweni, vadzrumisa wukulukumba bza Xikwembu. Kutani Petrosi ayangula, aku:

47   “Njhe, a kone lweyi angayalaka ni mati akuva asivela vhanu lava kubabatisiwa, lesvi vayamukeliki moya wa kuxwenga kufana na hine?”

48   Kutani aleleta lesvaku vababatisiwa avitweni dzra Yesu Kriste. Kutani vamukombela akuva atsrhama na vone masiku mange mangani.