-
Mintizro 11
1 Kutani vapostola ni vamakwezru lava avali Judeya vayingela lesvaku vhanu va matiko na vone vayamukele zritu dzra Xikwembu.
2 Kutani loko Petrosi atlhantukela le Jerusalema, lavaseketelaka kusoka vasungula vamusola,
3 vaku: “Wene unhingene andlwini ya vavanuna lava kukala vangasokanga uda na vone.”
4 Kutani Petrosi asungula kuvatlhamuxela ha xin’wexin’we, aku:
5 “Anili kazri nikhongota adoropeni dzra Jopa. Kutani loko niwele wuzrongweni na nivona, nive ni xivoniso lani ningavona xanchumu na xixika xa kufana ni kapulana ledzrikulu dzrixixiwaka hi le tilweni hi timponta ta dzrone ta mune, dzritlhasa kwanga.
6 Kutani loko nidzrilavisisa ha hombe, nivone svihazri sva mune wa minenge lesvinga kone amisaveni, ni svihazri sva nhova, svikokovi ni tinyanyana ta tilo.
7 Nitlhela niyingela zritu na dzriku ka mine: ‘Petrosi, pfuka udlaya, uda!’
8 Kambe niku: ‘Svingeyenceki lesvo, we Hosi, hikusa anon’wini wanga akungisama kunhingena nchumu wa kunyama kumbe wa kukala wungabasanga.’
9 Kambe zritu dzriyangula ka wubidzri na dzripfa tilweni, dzriku: ‘Lesvi Xikwembu xisvibasisiki ungasvihlayi lesvaku svinyamile.’
10 Kutani lesvi sviyenceke kazrazru, hinkwasvu svitlhela svikhwelisiwa sviya tilweni.
11 Phela, hi nkama wolowo, funtsrhi kuhumelele vavanuna vazrazru, vatlhasa vayima amutini lowu anitsrhama ka wone, na vazrumiwe kutatavonana na mine hi le Khezariya.
12 Kutani moya wunibzela kufamba navu, na ningaganaganeki ni kutsrongo. Kambe ni vamakwezru lava va 9 na vone vafambe na mine, hiyanhingena andlwini ya wanuna lweyi anganivitana.
13 “Kutani ahidzrungulela lesvi angavonisa xisvone ntsrumi na yiyime akaya kwake, yiku: ‘Zrumela vhanu le Jopa vayavitana Simoni lwavitaniwaka Petrosi.
14 Kutani atakubzela lesvi wene ni ndangu waku hinkwawu mitakahuluka ha svone.’
15 Kambe loko nisungule kukhanela, moya wa kuxwenga wuvaxikela kufana ni lesvi sviviki xisvone ni le ka hine akusunguleni.
16 Kutani nidzrimuka zritu dzra Hosi, lesvi ayihamba yisvihlaya yiku: ‘Johani kunene ababatise hi mati, kambe n’wine mitababatisiwa hi moya wa kuxwenga.’
17 Kutani ke, loko Xikwembu xivanyike nyiko yoleyo ya yin’we ni leyi xinyikiki hine lavangapfumela ka Hosi Yesu Kriste, anova mani mine lesvaku ningakota kusivela Xikwembu?”
18 Loko vayingele timhaka leto, vamiyela, vasungula kudzrumisa Xikwembu, vaku: “Kasi Xikwembu xinyike ni vhanu va matiko kutisola lokuyisaka wuton’wini!”
19 Kutani lava avahangalasiwile hi nxanisa leyipfukiki hi mhaka ya Stefano vafambe vayatlhasa ni le Fenisya, Xipre ni le Antiyokiya, kambe avangabzeli mhunu zritu, handle ka vajuda ntsena.
20 Nhambitanu, kuhume vavanuna va kukazri amakazri ka vone lavahumaka Xipre ni le Sireni, vayiki le Antiyokiya vayakhanela ni lavakhanelaka xigrika, vazrezra madzrungula lamanene ya Hosi Yesu.
21 Nakone voko dzra Jehovha adzrili na vone, kutani vhanu vanyingi vapfumela, vandzruluka vadondzrisiwa va Hosi.
22 Kutani madzrungula yavu mayayingeliwa hi bandla ledzringa Jerusalema, kutani vazrumela Barnaba afamba ayatlhasa le Antiyokiya.
23 Loko atlhasa kone avona wumbilu bza Xikwembu, anyonxa ava asungula kutsratsriya hinkwavu kuva vatiyisela ka Hosi hi mbilu ya kutiya;
24 hikuva Barnaba aali wanuna lwenene, wa kutala hi moya wa kuxwenga ni lipfumelo. Kutani kuyengeteleka xitsrhungu xa kuhlawa ka Hosi.
25 Kutani asuka aya le Tarsu ayajuletela Sawlu.
26 Loko amukumile, abuya naye Antiyokiya. Kutani vaheta lembe hinkwadzru na vahlengeletana ni bandla, vadondzrisa xitsrhungu xa kuhlawa. Kutani kuve le Antiyokiya lomu vadondzrisiwa vangasungula kone kuvitaniwa vakriste na svipfela ka Xikwembu.
27 Kutani amasikwini lawo, le Antiyokiya kubuye vaprofeta hi le Jerusalema.
28 Kutani kusekeleka mun’we wa vone, lwavitaniwaka Agabu, aprofeta hi moya lesvaku amisaveni hinkwayu akutava ni ndlala leyikulu, leyiviki kone ankameni wa Klawdu.
29 Kutani vadondzrisiwa vaboha lesvaku mun’wana ni mun’wana, hi la akotaka ha kone, atazrumela xipfunu ka vamakwezru lavatsrhamaka Judeya.
30 Vave vayenca tanu, vaxizrumela ka vakulu hi voko dzra Barnaba na Sawlu.