BRN

1   Ankameni lowo, hosi Heroda asungula kuxanisa svizro sva kukazri sva bandla.

2   Kutani adlaya Jakobe, makwavu wa Johani, hi lipanga.

3   Loko avona lesvaku lesvo svinyonxisa vajuda, aya mahlweni akhoma na Petrosi. (Kutani amali masiku ya Makati Ya Kuka Svikukumukisu.)

4   Amukhoma amupfalela ajele, amunyiketa ka mune wa mintlawa leyinga ni mune wa masocha wun’wana ni wun’wana akuva yimuvonelela, na ajula kumuhumexa amahlweni ka xitsrhungu antsrhaku ka Paxkwa.

5   Kutani Petrosi abekiwa ajele, kambe bandla adzrikhongota hi xiviti amahlweni ka Xikwembu dzrimukombelela.

6   Kutani awusikwini lebzi mundzruku ka kone Heroda aajula kumuhumexa ha bzone, Petrosi aatiyetlelelile na astrimbiwe hi machini mabidzri makazri ka masocha mabidzri, nakone aku ni vazrindzri amahlweni ka xipfalu lava avavonelela jele.

7   Kambe kuhumelele ntsrumi ya Jehovha yitlhasa yiyima kone, kutani livaningo dzrivaninga jele. Kutani yikhumba zreve dzra Petrosi yimuhlakahla apfuka, yiku: “Kahlula upfuka!” Kutani machini mawa amavokweni yake.

8   Kutani ntsrumi yiku ka yene: “Yambala mpahla, ubekela ni masandhazi.” Ayenca svosvo. Yigama yiku ka yene: “Funekela mujasi, unilandzra.”

9   Kutani ahuma ayilandzra, kambe aangasvitivi lesvaku lesvi asviyenceka hi kola ka ntsrumi asvoyenceka hakunene, hikusa aapimisa lesvaku aovona xivoniso.

10   Kutani vakhaluta hi ka muzrindzri wa kusungula ni wa wubidzri, vayatlhasa anyangweni ya nsimbi leyigoxometaka adoropeni, kutani yitipfulekela. Kuteloko vahumile, vanhingena ka xitaratu xin’we, kutani ntsrumi yitekela kusuka yimusiya.

11   Kutani Petrosi axalamuka, aku: “Svosvi nasvitiva hakunene lesvaku Jehovha azrumele ntsrumi yake kutanihuluxa avokweni dzra Heroda ni ka hinkwasvu lesvi vajuda avasviyimelile.”

12   Loko atwisise lesvo, aya akaya ka Mariya, mamana wa Johani, lwavitaniwaka Marku, lomu akuhlengeletane vhanu va kuhlawa vakhongota.

13   Kutani loko agongondzra xipfalu anyangweni, kubuya kuhlamula mun’we wa n’hwanyana lweyi aali xitizri, lwavitaniwaka Roda.

14   Kutani loko ayingela lesvaku zritu dzra kone i dzra Petrosi, anyonxa ngopfu lakakuva angasvikoti ni kupfula xipfalu, kambe atlhela hi kutsrutsruma, ayaku: “Petrosi ayime anyangweni.”

15   Kutani vaku ka yene: “Wahlanya wene.” Kambe aphikelela, aku: “I ntiyiso lesvi nimibzelaka svone.” Kutani vaku: “I ntsrumi yake.”

16   Kambe Petrosi aya mahlweni agongondzra xipfalu. Loko vapfula xipfalu, vamuvona, vatala hi kuhlamala.

17   Kambe akhanela na vone hi voko avakombela kuva vamiyela, avatlhamuxela lesvi Jehovha amuhumexisiki xisvone ajele, agama aku: “Dzrungulelani Jakobe ni vamakwezru timhaka leti.” Agama asuka ayendzrela mbangu wun’wana.

18   Kutani loko bzixile, kuva ni mpfilumpfilu leyikulu amakazri ka masocha hi kujula kutiva lesvaku keyenceka yini hi Petrosi.

19   Kutani Heroda amujuletela, kambe angamukumi. Athethisa vazrindzri agama aleleta lesvaku vadlayiwa; antsrhaku asuka Judeya afulamela Khezariya ayatsrhama kone.

20   Heroda aahlundzrukele ngopfu vhanu va le Tire na Sidoni, kambe vamubuyela hi wumun’we vakhanela naye. Kutani vatlhasa vakhanela na Blaxtu aza apfumela, lweyi aali mutameli wa muti wa hosi, vagama vakombela kuzrula ni hosi, hikusa tiko dzravu adzrihanya hi svakuda lesvihumaka atikweni dzra yone.

21   Kutani hi siku ledzribekisiwiki, Heroda ayambala sviyambalu sva wuhosi, atsrhamisa axitsrhan’wini xa wuyavanyisi akhanela ni xitsrhungu.

22   Kutani xitsrhungu xihuwelela, xiku: “I zritu dzra xikwembu ledzro, ahi dzra mhunu!”

23   Kolanu, ntsrumi ya Jehovha yimuba, hilesvi angadzrumisangakiki Xikwembu; kutani adiwa hi timpetu, afa.

24   Kambe zritu dzra Jehovha dzriya mahlweni dzrikula, dzrinava.

25   Kutani Barnaba na Sawlu, loko vahete wutizreli bzavu le Jerusalema, vamuka na Johani, lwavitaniwaka Marku.