BRN

1   Kutani le Antiyokiya aku ni vaprofeta ni vadondzrisi abandleni dzra kone, vanga va Barnaba, Simiyoni, lwavitaniwaka Mulandi, Lusyu wa le Sireni, Manayeni (lweyi angadondzrisiwa xikan’we na Heroda lwewa muzrangeli wa xifundzra), na Sawlu.

2   Ankama lowu avatizrela Jehovha na vatitsrona svakuda, moya wa kuxwenga wute: “Nibekelani hi tlhelo Barnaba na Sawlu akuva vayenca ntizro lowu nivavitaneliki wone.”

3   Kutani antsrhaku ka loko vatitsrone svakuda ni kukhongota, vavatlhanteke mavoko, vavazrumela.

4   Kutani vavanuna lava, lesvi mpela vazrumiwiki hi moya wa kuxwenga, vafulamele Selewsa, vagama vasuka kone vawela lwandle, vaya Xipre.

5   Loko va tlhasa le Salami, vasungula kuzrezra zritu dzra Xikwembu amasinagogeni ya vajuda. Kutani avali na Johani akuva avapfunisa.

6   Kuteloko vatsremakanye xihlale hinkwaxu vayatlhasa ni le Pafu, vatlhangana ni wanuna mun’we wa mujuda lwavitaniwaka Bariyesu, lweyi aali muloyi ni muprofeta wa madzrimi.

7   Aatsrhame na Serxju Pawlu, xiyandla xa hosi, lweyi aali wanuna wa kutiva ngopfu. Avitana Barnaba na Sawlu, hi kunavela kuyingela zritu dzra Xikwembu.

8   Kambe Elima, lwewa muloyi (hikusa svosvo hi lesvi vito dzrake dzritlhamuxelaka svone) avasivela, na ajula kuhambukisa lwewa xiyandla xa hosi alipfumelweni.

9   Kutani Sawlu, lweyi nakone avitaniwaka Pawlu, lesvi aatale hi moya wa kuxwenga, amulangutisisa,

10   aku: “Wene, mhunu wa kutala hi wukanganyisi hinkwabzu ni wubihi, n’wana Diyavulosi, nala wa hinkwasvu sva kululama, xana ungetitsrhika kusoholotela tindlela ta kululama ta Jehovha?

11   Kutani, lavisa! Voko dzra Jehovha dzritakuba, kutani utafa matihlo, utaheta nkama wa kukazri na ungavoni dambu.” Kolanu liphume ni munyama svimuwela, asungula kuyingayinga na ajuletela mhunu wa kumukhungisa hi voko.

12   Kutani lwewa xiyandla xa hosi, loko avone lesviyencekiki, andzruluka mupfumeli, hikusa aahlamalisiwe hi dondzro ya Jehovha.

13   Kutani Pawlu ni vanghanu vake vayendzra hi lwandle, vasuka Pafu vayatlhasa Perga, le Pamfilya. Kambe Johani asuka avasiya atlhelela Jerusalema.

14   Kambe loko vakhalute hi le Perga, vanhingene Antiyokiya wa Pizidiya. Kutani vatlhasa vanhingena asinagogeni hi siku dzra Savata, vatsrhamisa abankwini.

15   Kuteloko kugama kudondzriwa buku dzra Nawu ni mabuku ya vaprofeta, vafambisi va sinagoga vazrumela vhanu vayakhanela navu, vaku: “Vavanuna, vamakwezru, loko mi ni zritu dzra kutiyisa nhlana xitsrhungu, hlayani.”

16   Kutani Pawlu asekeleka, akombisa hi voko lesvaku ajula kukhanela, aku: “Vavanuna va Yisrayele, na n’wine lava michavaka Xikwembu, yingisetani.

17   Xikwembu xa tiko ledzri dzra Yisrayele xihlawule vatatana vezru, xitlakuxa vhanu lava avaluvelile atikweni dzra Gibita xivahumexa hi voko ledzra ntamu.

18   Nakone xitiyiselile kolomu ka 40 wa malembe na vali kazri vayencekana loko vahali le mananga.

19   Antsrhaku ka kuhelisa 7 wa matiko atikweni dzra Kanana, xivanyike tiko ledzro dzriva pfindla dzravu,

20   lesvi svitlhanganisiki 450 wa malembe. “Antsrhaku ka lesvo xivanyike vayavanyisi kuyatlhasa ankameni wa muprofeta Samuweli.

21   Kambe antsrhaku ka lesvo, vate vajula kuva ni hosi, kutani Xikwembu xivanyika Sawlu, n’wana wa Kixi, wanuna wa lixaka dzra Benjamini, kudzringana 40 wa malembe.

22   Antsrhaku ka loko ximususile, xivanyike Davhida akuva ava hosi, lweyi xingamubekela wumboni, xiku: ‘Nikume Davhida, n’wana wa Jese, wanuna lwanyonxisaka mbilu yanga, lwatakayenca kuzrandzra kwanga hinkwawu.’

23   Hi kulandzra xidumbiso lexi, ka vana va yelweyo, Xikwembu xitisele Yisrayele muhuluxi, anga Yesu.

24   Na yelweyo angesitlhasa, Johani azrezrele xitsrhungu hinkwaxu xa Yisrayele babatiso dzra kukomba kutisola.

25   Kambe ankama lowu Johani aayenca ntizro wake, aaku: ‘Xana mipimisa lesvaku ni mani? Ahi mine Kriste. Kambe lavisani! Awata antsrhaku kwanga lweyi nhambi masandhazi yake ningeke na mfanelo ya kumatlhantlha.’

26   “Vavanuna, vamakwezru, n’wine vana va ndangu wa Abrahamu, na n’wine vambeni minga lani, michavaka Xikwembu, zritu dzra huluku ledzro dzrizrumeliwe ka hine.

27   Hikuva vayaki va Jerusalema ni vafumi vavu avamutivanga lweyo, kambe vamuyavanyisile, vahetisisa mazritu ya vaprofeta, lawa madondzriwaka hi zritu dzra le henhla hi Savata dzrin’wana ni dzrin’wana.

28   Kutani nhambilesvi vangakumangakiki xivangelo xa kumudlaya, vakombele kuva Pilatu amudlaya.

29   Kutani loko vahetisisile hinkwasvu lesvitsraliwiki mayelanu na yene, vamuxixe apulangwini vayamulahla asizreni.

30   Kambe Xikwembu ximupfuxile akufeni,

31   ava ahumelela masiku ya kutala ka lavasukiki naye Galileya vatlhantukela Jerusalema, lava svosvi vanga timboni take amahlweni ka xitsrhungu.

32   “Kutani hine himibzela madzrungula lamanene ya minchumu leyingadumbisiwa vatatana vezru,

33   lesvaku Xikwembu xiyiyencile ka hine, vanavu, hi kupfuxa Yesu akufeni, svanga hesvi svitsraliwiki ha kone ka Pisalma dzra wubidzri: ‘U n’wananga; kusukela ka namunhla mine ni tatana waku.’

34   Kutani lesvi ximupfuxiki akufeni akuva angatlheleli akuboleni, xihlaye lesvi: ‘Nitakunyika minkateko ya Davhida leya kuxwenga ni ya kudumbeka.’

35   Nakone, ka Pisalma dzrin’wana kuhlayiwa lesvi: ‘Ungetitsrhika mhunu waku wa kuxwenga avona kubola.’

36   Kutani Davhida atizrele kuzrandzra ka Xikwembu alixakeni dzrake, agama afa, alandzra vatatana vake, ava avona kubola.

37   Kambe, lweyo Xikwembu ximupfuxile ava angavoni kubola.

38   “Xilesvo, svitivani, vamakwezru, lesvaku hi kola ka yelweyo kudzrivaleliwa ka svidoho katwalisiwa ka n’wine.

39   Nakone ka minchumu hinkwayu leyi amingakoti kuhlayiwa lavalulamiki hi kola ka Nawu wa Moxe, mani na mani lwapfumelaka ahlayiwa lwalulamiki hi kola ka yelweyo.

40   Kutani ke, tivonelani lesvaku mingahumeleliwi hi lesvingahlayiwa amabukwini ya vaprofeta, vaku:

41   ‘Lavisani, n’wine vahleki, mihlamala miva minyamalala, hikuva nitayenca ntizro amasikwini yenu, ntizro lowu mingetikiwukholwa ni siku ni dzrin’we nhambiloko modzrunguleliwa wone ha wun’wewun’we.’”

42   Kutani loko vahuma, vhanu vavakombela kutlhela vavulavula hi timhaka leti hi Savata ledzrilandzrelaka.

43   Kutani loko kuhumiwile asinagogeni, vajuda vanyingi ni vhanu va matiko lavachavaka Xikwembu lava avanhingenisiwe ka xijuda, valandzra Pawlu na Barnaba. Vone vakhanela navu, vavakuca kutsrhama atimpsalwini ta Xikwembu.

44   Kutani hi Savata ledzrilandzrelaka, kuhlengeletana kolomu ka vhanu hinkwavu va doropa akuva vayingela zritu dzra Jehovha.

45   Kambe loko vajuda vavona svitsrhungu, vatala hi wukwele, vasungula kuphikisa lesvi Pawlu aasvihlaya, vamunchimisa.

46   Kutani Pawlu na Barnaba vakhanela na vone hi xixixi, vaku: “Asvijulekile lesvaku zritu dzra Xikwembu dzrizranga dzribzeliwa n’wine. Kambe lesvi midzribakanyaka ni lesvi mitivonaka na mingafaneliwi hi wutomi lebzingahelikiki, svosvi ke, hiya ka vamatiko.

47   Hikuva Jehovha ahileletise xilesvi: ‘Nikulangile akuva uva livaningo dzra matiko, akuva uva huluku kuyatlhasa amimbangwini ya le kule ya misava.’”

48   Kutani loko vhanu va matiko vasviyingela, vanyonxa vadzrumisa zritu dzra Jehovha, kutani hinkwavu lava avali xiyin’wini xa kukuma wutomi lebzingahelikiki vandzruluka vapfumeli.

49   Kutani zritu dzra Jehovha dzrifambisiwa atikweni hinkwadzru.

50   Kambe vajuda vahlohlotela vavasati lavachavaka Xikwembu va xiyimu xa le henhla, ni vazrangeli va doropa, vayenca lesvaku Pawlu na Barnaba vahlongoliseliwa, vavahlongola axifundzreni xavu.

51   Kutani Pawlu na Barnaba vavaphumunela ntsrhuzri wa minkondzro yavu vagama vaya le Ikoniya.

52   Kutani vadondzrisiwa vatala hi kunyonxa ni moya wa kuxwenga.