-
Mintizro 15
1 Kutani kuhumelela van’we vabuyaka hi le Judeya vasungula kudondzrisa vamakwezru, vaku: “Loko mingasoki hi kuya hi mukhuva wa Moxe, mingetihuluxiwa.”
2 Kambe antsrhaku ka loko kuve ni mholova ni kudokadokisana amakazri kwavu na Pawlu na Barnaba, kubekisiwe lesvaku Pawlu, Barnaba, ni van’wana va vone vayela vapostola ni vakulu le Jerusalema vayavutisa mhaka leyi.
3 Kunene sviva tanu. Antsrhaku ka loko bandla dzrivaheleketile, vakhalute hi le Fenisya ni le Samariya, na vadzrungula ta kundzruluka ka vhanu va matiko, mhaka leyiyenciki lesvaku hinkwavu vamakwezru vatala hi kunyonxa.
4 Vatiki vatlhasa le Jerusalema, vahoyozeliwa hi bandla ni vapostola ni vakulu, vava vadzrungula hinkwasvu lesvi Xikwembu xingasviyenca hi kutizrisa vone.
5 Kambe kusekeleka van’we va lavangandzruluka vapfumeli, lava khale avali va xikole xa vafarisi, vaku: “Kujuleka kuva vasoka ni kuva valeletiwa kubekisa Nawu wa Moxe.”
6 Kutani vapostola ni vakulu vahlengeletana akuva vakambisisa mhaka leyi.
7 Antsrhaku ka loko kuve ni kudokadokisana lokukulu, Petrosi asekeleka aku ka vone: “Vavanuna, vamakwezru, n’wine masvitiva lesvaku kusukela amasikwini ya tolo Xikwembu xinihlawulile amakazri kwenu akuva hi nomu wanga vhanu va matiko vayingela zritu dzra madzrungula lamanene vava vapfumela.
8 Nakone Xikwembu, lexitivaka mbilu, xibeke wumboni hi kuvanyika moya wa kuxwenga, svanga hesvi xiyenciki ni le ka hine.
9 Funtsrhi axibekanga kuhambana ni kutsrongo makazri kwezru na vone, kambe xibasise timbilu tavu hi lipfumelo.
10 Kutani mixidzringela yini Xikwembu hi kutlhanteka mpinga anhan’wini ya vadondzrisiwa lowu nhambi vatatana vezru nhambi ova ye hine hihlulekiki kuwuzrwala?
11 Kambe, hi wumbilu bza Hosi Yesu, hi ni lipfumelo akuva hihuluxiwa kufana na vone hi ntshima.”
12 Kutani vhanu hinkwavu vamiyela, vayingiseta Barnaba na Pawlu loko vatsrhandzra masingita ni svihlamaliso hinkwasvu lesvi Xikwembu xingasviyenca ha vone amakazri ka matiko.
13 Kutani loko vamiyelile, Jakobe ayangula aku: “Vavanuna, vamakwezru, niyingisetani.
14 Simiyoni atlhamuxele ha hombe ndlela leyi ha yone Xikwembu xingasungula kuyendzrela vhanu va matiko akuva xititekela vhanu lavalumbaka vito dzra xone.
15 Nakone mazritu ya vaprofeta mapfumelelana na yone mhaka leyi, svanga hesvi kutsraliwiki lesvi:
16 ‘Antsrhaku ka lesvo, nitatlhela nibuya nipfuxeta tende dzra Davhida ledzriwiki. Nitapfuxeta mazrumbi ya dzrone, nidzrisekelekisa,
17 lesvaku lavasaliki amakazri ka vhanu vajuletela Jehovha, ni hinkwavu vhanu va matiko, lavavitaniwaka hi vito dzranga, kuhlaya Jehovha, lweyi ayencaka minchumu leyo,
18 leyitiviwaka kusukela khale ka khaleni.’
19 Xilesvo, nivona sviyampsa kukala hingabindzriseli lavahumaka ka matiko lavandzrulukaka vava vhanu va Xikwembu.
20 Kambe ahivatsraleleni hivabzela vafambela kule ni minchumu leyinyamisiwiki hi svithombe, ni wugangu, ni lesvidlayiwiki hi kutlimbiwa nkolo, ni ngati.
21 Hikuva kusukela khale ka khaleni Moxe ave ni lava vamuzrezraka amadoropeni hinkwawu, nakone adondzriwa amasinagogeni hi Savata dzrin’wana ni dzrin’wana.”
22 Kutani vapostola ni vakulu, xikan’we ni bandla hinkwadzru, vavona sviyampsa kuzruma vavanuna lavahlawuliwiki amakazri kwavu lesvaku vafamba na Pawlu na Barnaba le Antiyokiya, anga Juda, lwavitaniwaka Barsaba, na Silasi, vavanuna lavazrangelaka amakazri ka vamakwezru.
23 Vatsrala papela vadzrizrumela hi vone, na dzriku: “Hine vamakwenu, vapostola ni vakulu, hitsralela n’wine vamakwezru va matiko lavanga Antiyokiya, Sirya ni le Silisya: Hamilosa!
24 Lesvi hiyingeliki lesvaku kuhume van’we amakazri kwezru vatatamikazrata hi mazritu, vamidingilanisa miyanakanyu, na vangazrumiwanga hi hine,
25 hinkwezru hi wumun’we hivone sviyampsa kuhlawula vavanuna hivazrumela ka n’wine ni vazrandzriwa vezru Barnaba na Pawlu,
26 vavanuna lavapfumeliki kufela vito dzra Hosi yezru, Yesu Kriste.
27 Xilesvo, hizrumela Juda na Silasi, akuva na vone vamibzela timhaka letifanaka hi nomu wavu.
28 Hikuva moya wa kuxwenga na hine hivone sviyampsa kuva hingahamibindzriseli hi nchumu wun’wana handle ka minchumu leyijulekaka ntsena, yinga leyi:
29 kufambela kule ni timhamba ta svikwembu, ni ngati, ni lesvidlayiwiki hi kutlimbiwa nkolo, ni wugangu. Loko mitivonela ka lesvo hi wunyaminyami, mitava na miyenca svone. Salani ha hombe!”
30 Kutani ke, loko vavanuna lava valeleliwile, vafulamele Antiyokiya, vatlhasa vahlengeleta xitsrhungu vaxinyiketa papela.
31 Kuteloko vadzridondzrile, vhanu vanyonxa hi mazritu ya dzrone lamatiyisanaka nhlana.
32 Kutani Juda na Silasi, lesvi na vone avali vaprofeta, vatiyisa nhlana vamakwezru hi mazritu ya kutala, vavanyika ntamu.
33 Kutani loko vahete nkamanyana kone, vamakwezru vavatlhelisa hi kuzrula ka lava vangavazruma.
35 Kambe Pawlu na Barnaba vasala le Antiyokiya, vadondzrisa ni kutwalisa madzrungula lamanene ya zritu dzra Jehovha, xikan’we ni van’wana va kutala.
36 Antsrhaku ka masikunyana, Pawlu aku ka Barnaba: “Ahitlhelele amadoropeni hinkwawu lawa hitwalisiki zritu dzra Jehovha ka wone, hiyapfuxela vamakwezru, hiyavona lesvaku vo yini.”
37 Kambe Barnaba aanavela kuva vafamba na Johani, lwavitaniwaka Marku.
38 Kambe Pawlu aangasvivoni ha hombe kuva vamuteka vafamba naye, hilesvi asukiki avasiya le Pamfilya, angafambi navu antizrweni.
39 Kutani kupfuka mholova leyikulu lakakuva vahambana; kutani Barnaba ateka Marku vanhingena ngalaweni vaya Xipre.
40 Kambe Pawlu ahlawula Silasi akhoma ndlela, antsrhaku ka loko vamakwezru vamukombelele wumbilu bza Jehovha.
41 Kutani akhaluta hi le Sirya ni le Silisya, atiyisa mabandla.