-
Mintizro 18
1 Antsrhaku ka lesvo, asuka le Atena aya Korinte.
2 Kutani akuma mujuda mun’we lwavitaniwaka Akwila, lwapsaliwaka le Pontu, lweyi aahakubuya hi le Italya ni nsati wake, Prisila, hilesvi Klawdu angaleleta lesvaku hinkwavu vajuda vahuma Roma. Kutani avayela.
3 Kutani, lesvi avali ni ntizro wun’we wa mavoko, atsrhame akaya kwavu atizra na vone, hikuva avali vahambi va matende hi tlhelo dzra ntizro.
4 Kutani aanyikela dondzro asinagogeni Savata dzrin’wana ni dzrin’wana, akholwisa vajuda ni vagrika.
5 Kutani loko Silasi na Timotewu vatlhasile hi le Masedonya, Pawlu, akhomeke ngopfu hi zritu, abekela wumboni vajuda bza kukomba lesvaku Yesu i Kriste.
6 Kambe loko van’we va vone vamuphikisa vatlhela vamuhleka, ahlakahle mpahla yake, aku ka vone: “Ngati yenu ayive ahenhla ka tinhloko tenu. Mine ani na nandzru. Kusukela ka svosvi nitayela vhanu va matiko.”
7 Kutani azruzra kone ayatsrhama andlwini ya mun’we wanuna lwavitaniwaka Tisyu Juxtu, lweyi aali mugandzreli wa Xikwembu, lweyi yindlu yake ayivundzramane ni sinagoga.
8 Kambe Krixpu, muzrangeli wa sinagoga, apfumela ka Hosi, yene ni ndangu wake hinkwawu. Kutani vakorinte vanyingi lavasviyingeliki vapfumela vava vababatisiwa.
9 Kutani Hosi yikhanela na Pawlu hi xivoniso ni wusiku, yiku: “Ungachavi, kambe yana amahlweni uvulavula, ungamiyeli.
10 Hikuva ni na wene nakone anga kone lwatakakukhumba hi voko dzrake akuva akuvavisa; hikusa ni ni vhanu vanyingi adoropeni ledzri.”
11 Kutani atsrhama kone kudzringana lembe ni 6 wa tihweti, na adondzrisa zritu dzra Xikwembu amakazri kwavu.
12 Kambe ankama lowu Galyu aali xiyandla xa hosi le Akaya, vajuda vadumele Pawlu hi wumun’we vamuyisa hubzeni ya kuthetha timhaka,
13 vaku: “Lweyi akucetela vhanu kugandzrela Xikwembu hi ndlela leyihambanaka ni nawu.”
14 Kambe ankama lowu Pawlu aajula kupfula nomu, Galyu aku ka vajuda: “He n’wine vajuda, loko kunene, akova wubihi bza kukazri kumbe xihono lexikulu, asvitatwala loko nimilehisela mbilu nimiyingiseta.
15 Kambe loko svili sva kuphikisana kwenu hi mhaka ya mazritu kumbe mavito, ni sva kuyelana ni nawu wenu, svitivani n’wine. Anisvijuli kuthetha timhaka leti.”
16 Kutani avahlongola axitsrhan’wini xake xa wuyavanyisi.
17 Kutani hinkwavu vahlangamela Soxtene, lweyi aali muzrangeli wa sinagoga, vamuba amahlweni ka xitsrhamu xa wuyavanyisi. Kambe Galyu angavanga na mhaka na svone ni kutsrongo.
18 Nhambitanu, antsrhaku ka kutsrhama masiku ya kuhlawanyana, Pawlu alelelane ni vamakwezru ava akhoma ngalawa ya kuya Sirya, na aheketiwa hi Prisila na Akwila. Atlhasa atsremeta misisi le Senkereya, hikuva aadumbise Xikwembu sva kukazri hi kufunga.
19 Kutani vatlhasa le Efesa, avasiya kone; kambe yene anhingena asinagogeni abula ni vajuda.
20 Kutani loko vamukombele kutsrhama nkama wa kuyengeteleka, angapfumelanga,
21 kambe alelelane navu, aku: “Nitatlhela nimibuyela, loko Xikwembu xisvizrandzra.” Agama anhingena ngalaweni asuka Efesa,
22 afulamela Khezariya. Kutani atlhantuka ayalosa bandla, agama afulamela Antiyokiya.
23 Kuteloko atsrhame nkamanyana kone, asuka afambafamba atikweni dzra Galatiya ni le Frixjiya, atiyisa vadondzrisiwa hinkwavu.
24 Kutani mun’we wa mujuda lwavitaniwaka Apolu, lwapsaliwiki le Alexandriya, atlhasa hi le Efesa. Aali mhunu wa kukota kuvulavula lweyi aamativa ha hombe matsralwa.
25 Aadondzrisiwe ndlela ya Jehovha, nakone lesvi aahiseka hi minchumu ya moya, aakhanela atlhela adondzrisa ha hombe hi timhaka letikhumbaka Yesu. Kambe aotiva babatiso dzra Johani ntsena.
26 Kutani asungula kuvulavula hi xixixi asinagogeni. Kutani loko Prisila na Akwila vamuyingela, vamuteka vamutlhamuxelisisa ndlela ya Xikwembu kutlula lesvi aativa svone.
27 Kutani, lesvi aajula kutsremakanya aya le Akaya, vamakwezru vatsralele vadondzrisiwa papela, vavakuca akuva vamuhoyozela. Kutani loko atlhasile, apfune ngopfu vhanu lava avali vapfumeli, hi kola ka wumbilu bza Xikwembu;
28 hikusa hi ntamu lowukulu aakombisa amahlweni ka vhanu lesvaku vajuda avahlayi svone, ava akombisa hi Matsralwa lesvaku Yesu i Kriste.