BRN

1   Na Apolu aahali le Korinte, Pawlu akhalute hi miganga ya le xikazri, afulamela Efesa, atlhasa akuma van’we vadondzrisiwa va kukazri,

2   aku ka vone: “Xana n’wine miwuyamukelile moya wa kuxwenga ankama lowu mingandzruluka vapfumeli?” Kutani vamuhlamula, vaku: “Hine, nesvaku ku ni moya wa kuxwenga ahingisviyingela.”

3   Kutani aku: “Kutani ke, mibabatisiwe hi babatiso dzrini?” Vaku: “Hi babatiso dzra Johani.”

4   Pawlu aku: “Johani ababatise hi babatiso dzra kukomba kutisola, na abzela vhanu lesvaku vafanela kupfumela ka lweyi aahabuya antsrhaku kwake, anga Yesu.”

5   Vonasviyingela, vobabatisiwa hi vito dzra Hosi Yesu.

6   Kutani loko Pawlu avatlhanteka mavoko, moya wa kuxwenga wuxika ahenhla kwavu, vasungula kuvulavula hi tindzrimi ni kuprofeta.

7   Kutani hinkwavu ka vone avajula kuva 12 wa vavanuna.

8   Agama anhingena asinagogeni, lomu ahetiki tihweti tizrazru na avulavula hi xixixi, na anyikela tidondzro, abeka timhaka letikholwisaka mayelanu ni Mfumu wa Xikwembu.

9   Kambe loko vatiwomise tinhloko vayala kupfumela, vava vazruketela Ndlela leyi amahlweni ka xitsrhungu, asuka avasiya, ateka vadondzrisiwa hi tlhelo, ayavadondzrisa siku ni siku andzreni ka xikole xa Tiranu.

10   Lesvo svitame sviyenceka hi malembe mabidzri, lakakuva hinkwavu vajuda ni vagrika lava avatsrhama ka xifundzrankulu xa Azya vayingela zritu dzra Hosi.

11   Nakone Xikwembu axiyenca masingita ya kukala mangesivoniwa hi voko dzra Pawlu,

12   lakakuva nhambi svintuzrwana ni mavhentali lesvi asvikhumbe mizri wake, loko sviyisiwa ka timbabzi, mavabzi ya kone amosuka, ni mimoya ya kubiha yihuma.

13   Kambe vajuda van’we lava avafambafamba vahlongola mademona na vone vadzringise kutizrisa vito dzra Hosi Yesu ahenhla ka lava ava ni mimoya ya kubiha, vaku: “Nili huma hi vito dzra Yesu lweyi Pawlu amuzrezraka.”

14   Kutani aku ni 7 wa vana va majaha va mun’we wa muprista lwenkulu wa mujuda lwavitaniwaka Skevha lava avayenca lesvo.

15   Kambe moya wa kubiha wuvahlamula, wuku: “Yesu namutiva, na ye Pawlu, namuvona; kambe n’wine, hi n’wine vamani?”

16   Kutani mhunu lweyi aa ni moya wa kubiha atlula awela henhla kwavu, avawisa hinkwavu, avahlula, lakakuva vaphonyoka vahuma andlwini leyo hi kutsrutsruma na vangayambalanga nchumu, na vatikundzrumulile vakuzuu hi ngati!

17   Lesvo svitiviwe hi vajuda ni vagrika hinkwavu lava avatsrhama le Efesa; kutani hinkwavu vaweliwa hi nchavu, vito dzra Hosi Yesu dzriya mahlweni hi kukulisiwa.

18   Kutani vanyingi va lavandzrulukiki vapfumeli avabuya vatihlaya, vadzrungula minchumu leyi avahamba vayiyenca.

19   Nakone vanyingi va lava avayenca sva masalamusi vabuyise mabuku lawa avatizra ha wone vamahisa amahlweni ka hinkwavu. Kutani vankonta mali leyi mayitekiki, vakuma lesvaku amateke 50.000 wa macheleni ya silivhela.

20   Kutani zritu dzra Jehovha dzriya dzrikula hi ntamu, dzrihlula.

21   Kutani loko kuyenceke lesvo, Pawlu aboha amoyeni wake kukhaluta hi le Masedonya ni le Akaya, agama aya Jerusalema, aku: “Loko niyile kone, kujuleka niyatlhasa ni le Roma.”

22   Kutani azruma vabidzri va lava avamutizrela, kunga Timotewu na Eraxtu, vaya Masedonya, kambe yene asala atsrhama nkamanyana le xifundzrankulu xa Azya.

23   Kutani ankameni lowo kupfuka dzolonga ledzrikulu hi mhaka ya Ndlela leyi.

24   Hikuva mun’we wanuna lwavitaniwaka Demetru, lweyi aatizra hi silivhela, lweyi aahamba svitempelana sva silivhela sva Aritimiza, aayenca lesvaku vahambi va svithombe vakuma bindzru ledzrikulu.

25   Yene, ke, avahlengeleta hinkwavu ni vambeni lava avayenca ntizro wa kufana, aku: “Madoda, masvitiva n’wine lesvaku wukosi bzezru bzipfela ka bindzru ledzri.

26   Kutani masvivona nakone masviyingela lesvaku ahi lomu Efesa ntsena kambe hingaku hinkwaku lomu ndzreni ka xifundzrankulu xa Azya, lweyi valiki hi Pawlu akholwise vhanu va kutala ava avajikisa, aku svikwembu sva kuhambiwa hi mavoko ahi svikwembu.

27   Nakone, mhaka yikulu ahi ntsena lesvi ntizro wezru wunga khombzeni dzra kuvoniwa na wunge wa nchumu, kambe hi lesvi ni dzro tempele dzra xikwembu xezru lexikulu, mamana Artimiza, dzritakavoniwa na dzringe dzra nchumu, kutani lweyi agandzreliwaka hinkwaku lomu ndzreni ka xifundzrankulu xa Azya ni le misaveni hinkwayu asala na angehe na lisima.”

28   Kutani loko vayingela lesvo, vatala hi mahlundzru, vabandlukana vaku: “I nkulu Artimiza wa vaefesa!”

29   Kutani doropa hinkwadzru dzritala hi nkintsrinkintsri, kutani vhanu hinkwavu vatsrutsruma vayahlengeletana andlwini ya mintlangu, na vakokakoka Gayu na Arixtarku, vamasedonya lava avafambafamba na Pawlu.

30   Kambe Pawlu aajula kuyanhingena amakazri ka xitsrhungu, kambe vadondzrisiwa avamutsrhikanga.

31   Nakone nhambi hi van’we va vafambisi va minkhuvu ni mintlangu ya tiko lava avali vanghanu vake vamuzrumelele zritu, vamutsratsriya lesvaku angadzringisi kuyanhingena andlwini ya mintlangu.

32   Xilesvo, van’wana nakunene avabandlukana vahlaya lesvi na vambeni vahlaya svimbenyana; hikuva xitsrhungu axidludleke nhloko; nakone kutala ka vhanu avangaxitivi ni lexi vangahlengeletanela xone.

33   Kutani vahumexa Alexandre amahlweni ka xitsrhungu, na vajuda vamususumetela. Kutani Alexandre akombela vhanu hi voko akuva vamiyela, hikusa aajula kutiyimelela amahlweni ka xitsrhungu.

34   Kambe loko vasvivonile lesvaku i mujuda, hinkwavu ka vone vabandlukana kudzringana kusuhi ni mawora mabidzri, na vaku: “I nkulu Artimiza wa vaefesa!”

35   Kutani matsralana wa doropa ahuma azrulisa xitsrhungu, aku: “Vavanuna va le Efesa, kone i mani mhunu lwangasvitivikiki lesvaku doropa dzra vaefesa hi dzrone dzribekisaka tempele dzra Artimiza lwenkulu, ni xifaniso lexi xekeyenca hi kuwa hi le tilweni?

36   Lesvi timhaka leto tingeke na kuphikisiwa hi mhunu, kujuleka mizrula, mingayenci nchumu hi magugu.

37   Hikusa mibuyise vavanuna lava, nakuve ahi vatlhanyi va matempele nakone ahi vazruki va xikwembu xezru.

38   Kutani, loko kunene Demetru ni vahambi va svikhelekedana lavanga naye va ni mhaka leyi vaholovaka ha yone ni mhunu wa kukazri, ma kone masiku ya kuthetha timhaka ahubzeni, nakone svi kone sviyandla sva hosi andzreni ka xifundzrankulu. Avafambe vayapetelana kone timhaka!

39   Kambe loko mijula svin’wana sva kutlula lesvi, svifanela kutsremiwa anhlengeletanwini hi kulandzra nawu.

40   Hikusa kunene hi le khombzeni dzra kuzrwexiwa nandzru wa lesvaku hipfukela wuhosi hi mhaka ya lesviyencekiki namunhla, hikusa axi kone xivangelo lexi hitakakota kutlhamuxela ha xone mpfilumpfilu leyi hinkwayu.”

41   Kutani loko ahlaye lesvo, ahangalasa xitsrhungu lexi axihlengeletanile.