-
Mintizro 2
1 Kutani loko kutlhase siku dzra Nkhuvu wa Pentekoxta, hinkwavu avahlengeletane xikan’we ambangu wun’we.
2 Kutani hi xichuketa kuhuma pongwe hi le tilweni, dzra kufana ni kuhunga ka moya wa xidzedze, wutata yindlu hinkwayu leyi avatsrhame ka yone.
3 Kutani kuhumelela tindzrimi amahlweni kwavu ta kuyenca ingi i ta ndzrilo, tiyavana tigama titsrhama ahenhla ka mun’wana ni mun’wana wa vone,
4 kutani hinkwavu vatala hi moya wa kuxwenga vasungula kuvulavula hi tindzrimi timbeni, xilesvi moya awuvanyikisa xisvone kutivulavula.
5 Kutani aku ni vajuda lava avatsrhama Jerusalema, vanga vavanuna lavatinyiketeliki wukhongotini lava avahuma amatikweni hinkwawu lamanga hansi ka tilo.
6 Kutani loko mpfumawulu lowo wutwalile, kuhlengeletana vhanu vanyingi svinene, na vadzolonganeke miyanakanyu, hikusa mun’wana ni mun’wana aavayingela na vakhanela lidzrimi dzra ka kwake.
7 Nakone avapfilunganyekile vatlhela vahlamala, vaku: “He n’wine! Lava hinkwavu vakhanelaka ahi vagalileya?
8 Kutani ke, svikotekisa kuyini kuva mun’wana ni mun’wana wezru ayingela lidzrimi dzrake dzra mapsaliwa?
9 Vapartya, vamede ni vaelami; ni lavahanyaka Mezopotamya, Judeya, Kapadosya, Pontu ni le xifundzrankulu xa Azya,
10 Frijya na Pamfilya, Gibita ni miganga ya le Libya kusuhi na Sireni; ni vayeni lavataka hi le Roma, vajuda ni lavanhingenisiwiki ka xijuda;
11 vakreta; ni vaarabi— hivayingela na vakhanela hi mintizro ya Xikwembu leya kuhlamalisa hi tindzrimi tezru.”
12 Kutani hinkwavu vatala hi kuhlamala vatlhela vadzolonganeka tinhloko, kutani vavutisana, vaku: “Svijula kuhlaya yini lesvi?”
13 Kambe vambeni vatlanga hi vone, vaku: “Votwa vhinyo dzra kutsrokotsra vangadzrinwa kutlula mpimu.”
14 Kambe Petrosi asekeleka xikan’we ni lava 11 akhanela navu hi zritu dzra kutlakuka, aku: “Vavanuna va Judeya, na n’wine hinkwenu mitsrhamaka Jerusalema, tivisisani mhaka leyi, mizreyela ndleve mazritu yanga.
15 Hikusa vhanu lava avapopsanga, kuhambana ni lesvi mipimisaka svone, hikuva svosvi i 9 wora.
16 Kuhambana ni svosvo, lesvi hi lesvingahlayiwa hi muprofeta Jowele, aku:
17 ‘Xikwembu xili: “Kutani amasikwini ya wugamu, kutayenceka lesvaku nitachulula moya wanga ahenhla ka nyama hinkwayu, kutani vanenu va xinuna ni va xisati vataprofeta, ni majaha yenu matavonisiwa lesvahatakayenceka, ni sviduhwati svenu svitavonisiwa wuprofeta hi milozro,
18 nhambi malandzra yanga ya xinuna ni ya xisati nitachulula moya wanga ahenhla ka wone amasikwini lawo, kutani mataprofeta.
20 Dambu dzritandzruluka munyama na wone n’weti wutandzruluka ngati na kungesitlhasa siku ledzrikulu ni ledzringadzrivalekiki dzra Jehovha.
19 Nakone nitahumexa svihlamaliso ahenhla atilweni ni masingita ahansi amisaveni—ngati ni ndzrilo ni hunguva ya musi.
21 Kutani mani na mani lwavitanaka vito dzra Jehovha atahuluxiwa.”
22 “Vavanuna va Yisrayele, yingelani mazritu lawa: Yesu wa le Nazareta ave mhunu lwangakombekisiwa ka n’wine hi Xikwembu hi mintizro leya ntamu ni svihlamaliso ni masingita, lesvi Xikwembu xisviyenciki ha yene amakazri kwenu, svanga hesvi na n’wine misvitivaka ha kone.
23 Hi kungu dzra Xikwembu ledzribekisiwiki ni wusvikoti bza xone bza kutiva minchumu na yingesiyenceka, adlayisiwile hi mavoko ya vhanu va kubiha, miva mimugongondzrela amhandzreni, mimudlaya.
24 Kambe Xikwembu ximupfuxile hi kumuhumexa ka svivavu sva lifu, hikusa asvinge na kukoteka akuva akhomiwa hi dzrone.
25 Hikuva Davhida ahlaya lesvi ha yene: ‘Aphambeni kwanga, nitsrhama na matihlo yanga nimabeke ka Jehovha, hikuva ale xineneni xanga, akuva ningachuki nitsrekatsrekisiwa.
26 Xilesvo, mbilu yanga yinyonxile ni lidzrimi dzranga dzritsrhave ngopfu svinene. Nakone nyama yanga yitatsrhama na yi ni kudumba;
27 hikusa ungetitsrhika hika dzranga Sizreni, nhambi kutsrhika mhunu waku lwaxwengiki avona kubola.
28 Unitivise tindlela ta wutomi; utanitata hi kunyonxa lokukulu amahlweni kwaku.’
29 “Vavanuna, vamakwezru, svapfumeleliwa kuvulavula na n’wine hi nhloko ya ndangu Davhida na ningatilumalumi, lesvaku afile atlhela alahliwa, funtsrhi sizra dzrake dzri na hine kutatlhasa ni namunhla.
30 Hikusa lesvi aali muprofeta ni lesvi asvitiviki lesvaku Xikwembu aximufungelile hi kutiboha xiku mun’we wa vana vake aatabekiwa axitsrhan’wini xake xa wuhosi,
31 asvivone na svahali kule ava avulavula hi kupfuxiwa ka Kriste, lesvaku angatsrhikiwanga Sizreni, nhambi nyama yake ayivonanga kubola.
32 Yesu wa kone, Xikwembu ximupfuxile akufeni, kunga lesvi hinkwezru lani hinga timboni ta svone.
33 Kutani ke, lesvi atlakuxeliwiki axineneni xa Xikwembu ni lesvi ayamukeliki ka Tatana lesvingadumbisiwa, anga moya wa kuxwenga, achulule lesvi misvivonaka ni kusviyingela.
34 Hikuva Davhida angatlhantukelanga amatilweni, kambe yene hi ntshima ali: ‘Jehovha ate ka Hosi yanga: “Tsrhamisa axineneni xanga,
35 niko nibeka valala vaku vava wunalavutelo bza minkondzro yaku.”’
36 Xilesvo, yindlu hinkwayu ya Yisrayele ayisvitive hakunene lesvaku Xikwembu ximuyence Hosi ni Kriste, ye Yesu lweyi n’wine mingamugongondzrela amhandzreni.”
37 Loko kutani vayingela lesvo, vatlhaveka ambilwini, vaku ka Petrosi ni vapostola lavambeni: “Vavanuna, vamakwezru, hifanela kuyenca yini?”
38 Petrosi aku ka vone: “Tisolani, mun’wana ni mun’wana wenu ababatisiwa hi vito dzra Yesu Kriste akuva midzrivaleliwa svidoho svenu, kutani mitayamukela nyiko ya moya wa kuxwenga.
39 Hikuva xidumbiso lexi i xenu ni vanenu, ni hinkwavu lavanga kule, hinkwavu lava Jehovha, Xikwembu xezru, atakavavitana vaya ka yene.”
40 Kutani, hi kutizrisa mazritu man’wana ya kutala, avabekela wumboni hinkwabzu, na avatsratsriya, aku: “Hulukani ka lixaka ledzri dzra kusomboloka.”
41 Xilesvo, lava kunene vayamukeliki zritu dzrake vababatisiwile; kutani hi siku ledzro kuyengeteleka vhanu va kujula kuva 3.000.
42 Kutani avakhinyela adondzrweni ya vapostola, ni ka kutlhangana, ni kuda xikan’we, ni kuhambeni ka svikhongoto.
43 Kutani vhanu hinkwavu vatala hi kuchava; nakone akuyenceka svihlamaliso ni masingita laya kutala hi kola ka vapostola.
44 Kutani hinkwavu lavandzrulukiki vapfumeli avatsrhama ambangu wun’we, vayavelana hinkwasvu,
45 nakone avaxavisa masimu yavu ni minchumu yavu vayavelana ni hinkwavu, hi kuya hi lesvi mun’wana ni mun’wana aasvivilela.
46 Nakone siku ni siku avakhinyela ka kukumeka atempeleni hi wumun’we, vada xikan’we amakaya ya kuhambanahambana, vadelana svakuda svavu na vanyonxile nakone na svisukela mbilwini,
47 na vadzrumisa Xikwembu vatlhela vanyonxeliwa hi vhanu hinkwavu. Kutani siku ni siku Jehovha aaya mahlweni hi kuvayengetelela lava avaya akuhuluxiweni.