BRN

1   “Vavanuna, vamakwezru, ni vatatana, yingelani kutiyimelela kwanga svosvi.”

2   Kutani, loko vayingela lesvaku aakhanela navu hi lidzrimi dzra xiheberu, vahundzrisa kumiyela vakutititi. Kutani aku:

3   “Mine ni mujuda. Nipsaliwe le Tarsu wa Silisya, kambe nidondzre xikole ka doropa dzrodzri ahansi ka Gamaliyele, lani nidondzrisiwiki kulondzrisa svinene Nawu wa vatatana, nakone nihisekela Xikwembu xilesvi na n’wine hinkwenu mihisekisaka xisvone namunhla.

4   Lavafambaka hi Ndlela leyi nivaxanise kuyatlhasa akufeni, nikhoma vavanuna ni vavasati nivapeta majele,

5   svanga hesvi muprista lwenkulu ni huvo hinkwayu ya vakulu vanganifakazelaka ha kone. Nakone vaninyike mapapela ya kuya ka vamakwezru va le Damaxku, kutani anili ndleleni ya kuyabuyisa vhanu va kone na vatsrimbiwile lani Jerusalema akuva vakhatisiwa.

6   “Kambe ankama lowu anili ndleleni, loko niku natsrhindzrekela Damaxku, hi nkama wa dina, hi xichuketa kohumelela livaningo ledzrikulu hi le tilweni dzriphatima hinkwaku amatlhelweni kwanga.

7   Kutani niwela hansi, niyingela zritu dzriku ka mine: ‘Sawlu, Sawlu, unixanisela yini?’

8   Kutani nihlamula, niku: ‘Hi wene mani, Hosi?’ Kutani zritu dzriniyangula, dzriku: ‘Hi mine Yesu wa Nazareta, lweyi umuxanisaka.’

9   Kutani lava avafamba na mine, kudzrivona vadzrivonile livaningo, kambe zritu dzra lweyi aavulavula na mine avadzriyingelanga.

10   Kutani niku: ‘Xana nifanela kuyenca yini, we Hosi?’ Kutani Hosi yiku ka mine: ‘Sekeleka uya Damaxku; utabzeliwa kone hinkwasvu lesvibekisiwiki akuva usviyenca.’

11   Kambe lesvi aningahakoti kuvona nchumu hi mhaka ya kuphatima ka livaningo ledzro, nitlhase Damaxku na noyenca hi kukhungisiwa hi lava avali na mine.

12   “Kutani mun’we wanuna, lwavitaniwaka Ananiya, lwahanyaka hi wukhongoti hi kulandzra Nawu ni lwativiwaka hi lesvinene hi vajuda hinkwavu lavahanyaka kone,

13   anibuyelile ayima atlhelweni kwanga, aku ka mine: ‘Sawlu, makwezru, tlhela uvona!’ Kutani nimuvona hi nkama wolowo.

14   Agama aku: ‘Xikwembu xa vatatana vezru xikuhlawulile akuva utiva kuzrandzra ka xone ni kuva uvona Mululami ni kuyingela zritu dzra nomu wake.

15   Hikusa amahlweni ka vhanu hinkwavu utava mboni yake ya minchumu leyi uyivoniki ni kuyiyingela.

16   Kutani wahahetela yini nkama? Sekeleka, ubabatisiwa, uhlampsa svidoho svaku svisuka hi kuvitana vito dzrake.’

17   “Kutani loko nitlhelele Jerusalema, hi nkama lowu anili kazri nikhongota atempeleni, niwele wuzrongweni bza xivoniso,

18   nivona Hosi na yiku ka mine: ‘Kahlula uhuma Jerusalema, hikusa vangetiyamukela wumboni bzaku mayelanu na mine.’

19   Kutani niku: ‘Hosi, kambe na vone vasvitiva lesvaku anihamba nikhomisa nitlhela niyevula xikhumba hi minkhavi lavapfumelaka ka wene amasinagogeni hinkwawu.

20   Funtsrhi ankama lowu akuhalatiwa ngati ya Stefano, mboni yaku, mine aneyima tlhelweni nisviseketela, na nivonelela mijansi ya lava avamudlaya.’

21   Kambe Hosi yite ka mine: ‘Famba, hikusa nitakuzrumela ka vhanu va matiko lavanga kule.’”

22   Kutani vamuyingiseta kuyatlhasa ka zritu ledzri. Vagama vatlakuxa mazritu yavu, vaku: “Mususani amisaveni lweyo, hikuva angafaneliwi hi kuhanya!”

23   Kutani ankama lowu vabandlukanaka, na vacukumetela mijansi yavu ahenhla, vatsrutsrusela ntsrhuzri ahenhla,

24   hosi ya masocha yileleta lesvaku Pawlu anhingenisiwa agoveleni dzra masocha, yiva yiku afanela kuthethisiwa na akwapiwa hi ntshilana, akuva yitakota kutiva lexi axivayenca vabandlukana amahlweni ka Pawlu.

25   Kambe loko vamulata na vamutsrimbile akuva vamukwapa, Pawlu aku ka muzrangeli wa masocha lweyi aayime kolanu: “Nawu wasvipfumelela kukwapa mhunu lwanga muroma na angesitsremeliwa xikhatiso xa kone hi muyavanyisi kee?”

26   Kutani, loko lwewa muzrangeli wa masocha ayingela lesvo, asuka ayakhanela ni lwewa hosi ya masocha, ayamutivisa, aku: “Utayenca yini kee, lesvi mhunu lweyi anga muroma?”

27   Kutani hosi ya masocha yitsrhindzrekela, yiku ka Pawlu: “Hinganibzela, u muroma wene?” Aku: “Ina.”

28   Lwewa hosi ya masocha ahlamula, aku: “Mine svinidulele ngopfu svinene kuxava mfanelo ya kuva muroma.” Kambe Pawlu aku: “Kambe mine nepsaliwa na yone.”

29   Kutani lava avajula kumuthethisela na vamuba hi ntshilana vasuka vamusiya. Kutani hosi ya masocha yichava hilesvi yitiviki lesvaku i muroma ni lesvi ayimutsrimbe hi machini.

30   Kutani mundzruku ka kone, hi kujula kutivisisa ha hombe lesvi vajuda avamulumbeta svone, yimuntsrhunxa, yileleta lesvaku vaprista lavakulu ni Huvo hinkwayu ya Vajuda vahlengeletana. Kutani yibuyisa Pawlu yimuyimisa amakazri kwavu.