-
Mintizro 23
1 Kutani Pawlu alangusisa Huvo ya Xijuda, aku: “Vavanuna, vamakwezru, nihanye amahlweni ka Xikwembu hi lipfalu ledzribasiki hi kuhelela kutatlhasa asikwini ledzri.”
2 Kutani muprista lwenkulu Ananiya azruma lavayimiki kusuhi na Pawlu kumuba nomu.
3 Kutani Pawlu aku ka yene: “Xikwembu xitakuba, wene khumbi dzra kupendiwa dzribasa hi le handle ntsena. Utsrhama akuva uniyavanyisa hi kulandzra Nawu kambe utlhela utlula Nawu hi kuvazruma vaniba?!”
4 Kutani lavayimiki atlhelweni kwake vaku: “He wene! Wozruketela muprista lwenkulu wa Xikwembu?”
5 Kutani Pawlu aku: “Vamakwezru, aningasvitivi lesvaku hi ye muprista lwenkulu. Hikuva kutsraliwe lesvi: ‘Ungachuki uzruketela mufumi wa vhanu.’”
6 Kutani lesvi Pawlu aasvitiva lesvaku ntlawa wun’we awuli wa vasaduki kambe lowun’wana awuli wa vafarisi, abandlukana amahlweni ka Huvo ya Xijuda, aku: “Vavanuna, vamakwezru, mine ni mufarisi, ninga n’wana wa vafarisi. Phela lexi niyavanyiseliwaka xone lani i mhaka ya dumbo dzra kupfuxiwa ka vafi!”
7 Loko ahlaye lesvo, kupfuka mholova makazri ka vafarisi ni vasaduki, kutani nhlengeletanu yiyavana.
8 Hikuva vasaduki vali aku na kupfuxiwa nhambi tintsrumi kumbe mimoya, kambe vafarisi vapfumela ka lesvo ha svibidzri.
9 Kutani kusungula pongwe ledzrikulu. Van’we va vatsrali va ntlawa wa vafarisi vasekeleka valwa hi mazritu ya ntamu, vaku: “Ahikumi nchumu ni wa wun’we wa kubiha ka mhunu lweyi. Kutani hitaku yini loko moya wa kukazri kumbe ntsrumi yevulavula na yene?”
10 Kutani mholova yikula, lakakuva hosi ya masocha yichava lesvaku vangachuka vaphatlulela Pawlu; yizruma masocha mafulamela mayamuwutla amakazri kwavu, mamutisa agoveleni dzra masocha.
11 Kambe hi wusiku lebzilandzrelaka, Hosi yiyayima kusuhi naye, yiku: “Vana ni xixixi! Hikuva svanga hesvi unibekeliki wumboni bza kuhelela le Jerusalema, ufanela kubeka wumboni ni le Roma.”
12 Kutani loko bzixile, vajuda vabunga xikungu, vatiboha hi kufunga, vaku: “Hingetida nhambi kunwa na hingesidlaya Pawlu”.
13 Kutani aku ni kutlula 40 wa vavanuna lavayenciki xikungu lexi,
14 lavayeliki vaprista lavakulu ni vakulu, vaku: “Hitibohe hi kufunga lesvaku hingetida nchumu ni wutsrongo na hingesidlaya Pawlu.
15 Kutani, svosvi, n’wine ni Huvo ya Xijuda kombelani hosi ya masocha lesvaku yimutisa kwenu ingiki mojula kukambisisa mhaka yake hi wunyaminyami. Kutani kutaku na angesitsrhindzrekela, hitava na hitibekiselile kumudlaya.”
16 Nhambitanu, loko mumpshana wa Pawlu asviyingelile lesvaku va ni makungu ya kumutumbelela, anhingene agoveleni dzra masocha abzela Pawlu.
17 Kutani Pawlu avitana mun’we wa vazrangeli va masocha, aku: “Heketa mufana lweyi ka hosi ya masocha, hikuva a ni sva kukazri ajulaka kuyibzela svone.”
18 Kutani amuteka mpela amuheketa ka hosi ya masocha, aku: “Mubohiwa Pawlu anivitanile anikombela kutisa mufana lweyi kwaku hikusa a ni sva kukazri ajulaka kukubzela svone.”
19 Kutani hosi ya masocha yimukhoma hi voko yitsrhindzreka yiya ka mbangu wa xihundla, yimuvutisa, yiku: “I yini lesvi ubuyaka unibzela svone?”
20 Kutani aku: “Vajuda vatwanane kukukombela lesvaku mundzruku uyisa Pawlu ka Huvo ya Xijuda, svanga hi loko vojula kuvutisisa svimbeni hi yene.
21 Kambe ungavakholwi, hikuva vavanuna va kutlula 40 vamutumbelelile, nakone vatibohe hi kufunga lesvaku vangetida nhambi kunwa na vangesimudlaya. Kutani svosvi vatibekiselile, nakone voyimela wene uvatiyisa lesvaku utasviyenca lesvo.”
22 Kutani hosi ya masocha yimukisa mufana lweyo, na yizrange hi kumuleleta lesvi: “Ungabzeli mhunu lesvaku unitivisile mhaka leyi.”
23 Yigama yivitana vabidzri ka vazrangeli va masocha, yiku: “Lulamisani 200 wa masocha akuva maya Khezariya, ni 70 wa vakhandzriyi va mahanxi ni 200 wa lavalwaka hi tlhazri, hi 9 wora wusiku bzobzi.
24 Nakone, bekisani ni mahanxi akuva kukhandzriya Pawlu, matamuyisa hi kuzrula ka hosi ya xifundzrankulu Felksi.”
25 Yigama yitsrala papela ledzringa ni mazritu lawa:
26 “Klawdu Liziya, ka Muchaviseki wezru, Hosi ya Xifundzrankulu Felksi: Nalosela!
27 Lweyi wanuna aakhomiwe hi vajuda nakone avali kusuhi ni kumudlaya, kambe nitsrutsrume ni masocha yanga niyamulamulela, hikusa niyingele lesvaku i muroma.
28 Kutani, lesvi anijula kutiva xivangelo lexi avamusola ha xone, nimuyise ka Huvo ya Xijuda ya ka kwavu,
29 niva nikuma lesvaku vamulumbeta hi timhaka ta Nawu wavu, kambe angazrwexiwi nandzru hi nchumu wa kukazri wa kufaneliwa hi lifu kumbe kupfaleliwa jele.
30 Kambe lesvi nitivisiwiki zrengu ledzri adzrilukeliwe wanuna lweyi, nitekele kumuzrumela kwaku antsrhaku ka kuleleta lavamuzrwexaka nandzru lesvaku avatetamuzrambela amahlweni kwaku.”
31 Kutani masocha lawo mavhela mateka Pawlu hi la maleletiwiki ha kone, mamuyisa le Antipatri ni wusiku.
32 Kutani mundzruku ka kone, matlhelela agoveleni dzra masocha, kambe matsrhika vakhandzriyi va mahanxi vafamba naye.
33 Loko lavo vatlhase Khezariya, vanyikete hosi ya xifundzrankulu papela vatlhela vayikomba Pawlu.
34 Kutani yidzridondzra yiva yimuvutisa lesvaku ahuma ka xifundzrankulu xini. Kutani loko yitive lesvaku i wa Silisya,
35 yiku: “Nitakuyingela ha hombe loko lavakuzrwexaka nandzru vatlhasile.” Yigama yileleta lesvaku avoneleliwa Ndlwini ya Wuhosi ya Heroda.